School Reopens: औरंगाबाद शहरात पहिली ते पाचवीच्या शाळा 10 डिसेंबरपासून सुरू होणार, महापालिकेचा निर्णय

ओमिक्रॉन या कोरोनाच्या नव्या व्हेरिएंटचे संकट पुन्हा एकदा जगासमोर उभे ठाकले आहे. त्या पार्श्वभूमीवर औरंगाबादमध्येही महापालिका प्रशासन अलर्ट झाले आहे. म्हणूनच शहरातील शाळा आता 1 डिसेंबरऐवजी 10 डिसेंबरपासून सुरु करण्याचा निर्णय पालिकेने घेतला आहे.

School Reopens: औरंगाबाद शहरात पहिली ते पाचवीच्या शाळा 10 डिसेंबरपासून सुरू होणार, महापालिकेचा निर्णय
प्रातिनिधिक छायाचित्र

औरंगाबादः शहरातील पहिली ते पाचवीच्या शाळा 10 डिसेंबरनंतर सुरु होतील असा निर्णय महापालिकेच्या वतीने घेण्यात आला आहे. ओमिक्रॉन (omicron) या कोरोनाच्या नव्या व्हेरिएंटने जगभरात थैमान माजवलं आहे. त्या धर्तीवर महाराष्ट्रातही मुख्यमंत्र्यांनी (Uddhav Thackeray) खबरदारीच्या उपाययोजना राबवण्याचे आदेश दिले आहेत. त्यामुळे औरंगाबाद महापालिकेअंतर्गत येणाऱ्या शहरातील पहिली ते चौथीच्या शाळा आता 1 डिसेंबरऐवजी 10 डिसेंबर रोजी सुरु होतील, असे महापालिकेच्या वतीने कळवण्यात आले आहे.

महापालिका उपायुक्तांची माहिती

औरंगाबाद महापालिकेचे उपायुक्त संतोष टेंगळे यांनी दिलेल्या माहितीनुसार, कोरोनाचा प्रादुर्भाव वाढू नये यासाठी खबरदारीचे उपाय म्हणून शहरातील पहिली ते चौथीच्या शाळा येत्या 10 डिसेंबरपर्यंत बंदच राहतील. 10 तारखेनंतर शहरातील आरोग्य व्यवस्थेचा आढावा घेतल्यानंतर शाळा सुरु करायच्या की नाही, याबाबत निर्णय घेतला जाईल.

शाळेत पाठवावे की नाही, पालकांमध्ये अजूनही संभ्रम

दरम्यान, 1 डिसेंबरपासून शाळा सुरु होणार असल्याच्या वृत्तामुळे शहरातील पालकांमध्ये काहीसे चिंतेचे वातावरण होते. लहान मुलांना कोरोनाची लागण होऊ नये, यासाठी मुलांना स्कूल व्हॅनमधून शाळेत पाठवावे की नाही, किंवा मुलांना लसीकरणाशिवाय शाळेत पाठवावे की नाही, अशी चिंता पालकांना सतावत होती. त्यातच मागील चार दिवसात ओमिक्रॉन या कोरोनाच्या नव्या व्हेरिएंटचे संकट उभे राहिल्याने या चिंतेत अधिकच भर पडली. शहरातील पाचवी ते दहावीच्या शाळा सुरु असून अद्याप त्या पुढे किती दिवस सुरु ठेवायच्या, यावर निर्णय झालेला नाही.

इतर बातम्या- 

सोमय्यांचे धक्के सुरूच, आणखी चार मंत्र्यांचे घोटाळे बाहेर काढणार; नावं गुलदस्त्यात ठेवल्याने तर्कांना उधाण

Aurangabad: ठाकरे स्मारकाच्या कामाची स्वतंत्र पाहणी करा, कोर्टाचे आदेश, प्रस्तावित नकाशा अव्यवहार्य असल्याचे निरीक्षण!

 

Published On - 2:22 pm, Tue, 30 November 21

Click on your DTH Provider to Add TV9 MARATHI