मोठी बातमी! बीडमध्ये आणखी 6 आरोपींविरोधात मकोका; पोलीस अ‍ॅक्शनमोडमध्ये

बीड जिल्ह्याच्या मस्सोजोग गावचे सरपंच संतोष देशमुख यांचं अपहरण करून हत्या करण्यात आली, या घटनेनंतर बीडसह राज्यात वातावरण चांगलंच तापलं आहे. या प्रकरणातील सात आरोपींवर पोलिसांनी मकोका अंतर्गत कारवाई केली आहे. वाल्मिक कराडवर देखील मकोका लावण्यात आला आहे. दरम्यान एकीकडे संतोष देशमुख यांच्या हत्याप्रकरणातील सर्व आरोपींना मकोका लावण्यात आला आहे. तर दुसरीकडे बीडमधूनच आणखी एक मोठी बातमी समोर आली आहे ती म्हणजे एका गोळीबार प्रकरणात अक्षय आठवले गँगविरोधात देखील पोलिसांनी मकोकाची कारवाई केली आहे.

अक्षय आठवले गँगच्या सहा जणांविरोधात मकोका लावण्यात आला आहे, एकूण सहा आरोपींविरोधात मकोका अतंर्गत कारवाई करण्यात आली आहे. सहापैकी चार आरोपींना अटक करण्यात आली आहे, तर दोन आरोपी फरार आहेत. या आरोपींना गोळीबार प्रकरणात अटक करण्यात आली आहे. या प्रकरणात अक्षय आठवले, ओंकार सवाई, मनीष क्षीरसागर यांना अटक करण्यात आली आहे, तर सनी आठवले सह अन्य एकजण फरार आहे. संतोष देशमुख हत्याप्रकरणातील आरोपींवर मकोका लावण्यात आला होता, त्यानंतर बीडमध्ये आता दुसऱ्यांदा या कायद्याची अंमलबजावणी करण्यात आली आहे.

काय आहे नेमकं प्रकरण? 

बीडमध्ये जुन्या वादात बदनामी झाल्याच्या रागातून घरात घुसून गोळीबार करण्यात आला होता. या घटनेत एक तरुण गंभीर जखमी झाला होता. विश्वास दादाराव डोंगरे असं या घटनेत जखमी झालेल्या तरुणाचं नाव आहे. डोंगरे आणि आठवले यांच्यात जुना वाद आहे. यापूर्वी देखील आठवले आणि डोंगरे गटात जोरदार राडा झाला होता, दोन्ही गटांकडून परस्परविरोधी तक्रार दाखल करण्यात आली होती. त्यानंतर  अक्षय आठवले याने डोंगरे यांच्या घरात घुसून गोळीबार केला होता. यामध्ये  विश्वास दादाराव डोंगरे हा तरुण गंभीर जखमी झाला होता. त्यानंतर पोलिसांनी या प्रकरणातील आरोपींना अटक केली. आता त्यांच्यावर मकोका अंतर्गत कारवाई करण्यात आली आहे, या प्रकरणातील दोन आरोपी अजूनही फरार आहेत.