दुसऱ्यांदाही मुलगीच झाली, नाराज मातेने नकोशीसोबत केले ‘हे’ कृत्य

लातूर : माणुसकीला काळिमा फासणारी घटना लातूर जिल्ह्यातील काटगाव-तांडा येथे घडली आहे. दुसरीही मुलगीच झाल्याने नाराज झालेल्या मातेने दोन दिवसांच्या बाळाची हत्या केल्याची धक्कादायक घटना उघडकीस आली आहे. पोलिसांनी क्रूर मातेला ताब्यात घेतले आहे. पोलीस पुढील कारवाई करत आहेत. रेखा चव्हाण असे आरोपी मातेचे नाव आहे. पोलिसांनी तिला अटक करत न्यायालयासमोर हजर करण्यात आले. याप्रकरणी पोलीस सखोल तपास करत आहेत.

प्रसुतीसाठी लातूरमध्ये माहेरी आली होती महिला

लातूर जिल्ह्यातील काटगाव तांडा येथील रेखा हिचा उस्मानाबाद जिल्ह्यातील होळी येथील किसन चव्हाण याच्याशी विवाह झाला होता. रेखाला पहिली मुलगी आहे. दुसऱ्यांदा गरोदर राहिलेली रेखा प्रसुतीसाठी माहेरी काटगाव तांडा येथे आली होती.

दुसऱ्यांदाही मुलगी झाल्याने नाराज होती महिला

रेखाला 27 डिसेंबर रोजी जवळा येथील प्राथमिक आरोग्य केंद्रात प्रसुतीसाठी दाखल करण्यात आले. रेखाला दुसऱ्यांदाही मुलगी झाली. यामुळे रेखा नाराज होती. यातूनच तिने नकोशीला संपवले.

तपासादरम्यान आईनेच मुलीची हत्या केल्याचे उघडकीस आले

बाळाचा मृत्यू झाल्याचे उघडकीस येताच पोलिसांनी घटनेचा तपास सुरु केला. तपासाअंती दुसरी मुलगी झाल्याने आईनेच मुलीची हत्या केल्याचे उघडकीस आले. यानंतर पोलिसांनी या क्रूर मातेला अटक केली आहे.

गातेगाव पोलीस ठाण्यात खूनाचा गुन्हा दाखल करण्यात आला असून, महिलेला न्यायालयासमोर हजर करण्यात आले. महिलेचा पती पुण्यात मोलमजुरीचे काम करतो.