Girish Mahajan: संकटमोचकच संकटात? ऑपरेशन ब्लू स्टारविषयीच्या वक्तव्याने वादात… गिरीश महाजनांवर भाजपचे केंद्रीय नेतृत्व नाराज?
Girish Mahajan On Operation Blue Star: ऑपरेशन ब्लू स्टारविषयी मंत्री आणि भाजप नेते गिरीश महाजन यांच्या वक्तव्याने वाद उफाळला आहे. याप्रकरणाची भाजपच्या केंद्रीय नेतृत्वाने तातडीने दखल घेतल्याची माहिती सूत्रांनी दिली आहे. महाजनांच्या वक्तव्यावर भाजपने भूमिका जाहीर केली आहे.
Girish Mahajan On Operation Blue Star: भारतीय इतिहासात ऑपरेशन ब्लू स्टारची नेहमी चर्चा होते. ऑपरेशन ब्लू स्टारच्या 42 व्या स्मृतीदिनानिमित्त पंजाबमधील अमृतसर येथे कार्यक्रम आयोजित करण्यात आला होता. राज्याचे जलसंपदामंत्री आणि भाजपचे ज्येष्ठ नेते गिरीश महाजन यांनी अमृतसर येथे केलेले वक्तव्य वादात सापडले. त्यावरून राजकीय गोंधळ उडाला. ऑपरेशन ब्लू स्टार हा काळा दिवस असल्याचा साक्षात्कार गिरीश महाजनांना झाला. या कारवाईत मृत्यूमुखी पडलेल्यांचा त्यांनी शहीद असा उल्लेख केल्याने वाद भडकला. आता याप्रकरणी भाजपने हात झटकले आहेत. भाजपच्या केंद्रीय नेतृत्वाने महाजनांवर नाराजी व्यक्त केल्याची माहिती सूत्रांनी दिली आहे.
इंदिरा गांधींच्या निर्णयावर टीका
1984 मध्ये झालेल्या ऑपरेशन ब्लू स्टारविषयी भावना व्यक्त करताना गिरीश महाजन यांनी वाद ओढावून घेतला. त्यांनी तत्कालीन पंतप्रधान इंदिरा गांधी यांच्या निर्णयावर टीका केली. सुवर्ण मंदिर परिसरात सैन्य कारवाईवर त्यांनी नाराजी व्यक्त केली. या कारावाईत निष्पाप नागरिकांचा बळी गेला आणि समाजाच्या भावना दुखावल्याचे महाजन म्हणाले.
अहमदशाह अब्दालींच्या आक्रमणाशी तुलना
महाजन यांनी ऑपरेशन ब्लू स्टारची तुलना 18 व्या शतकातील अहमदशाह अब्दालीच्या आक्रमणाशी केली. 1984 मध्ये इंदिरा गांधी यांच्या हत्येनंतर देशात शीखविरोधी दंगल उसळली. त्यावरून महाजनांनी या कार्यक्रमात काँग्रेसवर टीकास्त्र सोडले. त्या काळात शीख समाजाला अन्याय आणि हिंसाचाराचा सामना करावा लागला असे वक्तव्य महाजनांनी केले. विशेष म्हणजे या कार्यक्रमात विभाजनवादी नेते जर्नेलसिंग भिंद्रनवाले यांचे उदात्तीकरण करण्यात आले. महाजन यांच्या उपस्थितीमुळे वाद निर्माण झाला.
गिरीश महाजन यांच्या वक्तव्यावर पक्षश्रेष्ठी नाराज
दरम्यान या कार्यक्रमाची आणि मंत्री गिरीश महाजन यांच्या वक्तव्याची भाजपच्या पक्षश्रेष्ठींनी दखल घेतल्याची माहिती समोर येत आहे. भाजपच्या वरिष्ठांनी त्यांच्या या वक्तव्यावर नाराजी व्यक्त केली आहे, अशी माहिती सूत्रांनी दिली. गिरीश महाजन यांनी ऑपरेशन ब्लू स्टारविषयी केलेले वक्तव्य हे त्यांचे वैयक्तिक मत आहे, ती पक्षाची भूमिका नाही असे स्पष्ट करण्यात आले आहे. गिरीश महाजनांची भूमिका ही पक्षाची नसल्याचेही भाजपने स्पष्ट केले आहे. भाजपच्या वर्तुळातून महाजन यांच्या वक्तव्यावर नाराजी व्यक्त करण्यात आल्याची माहिती सूत्रांनी दिली आहे.
