पाचव्या टप्प्यातल्या मतदानाच्या दिवशी मुंबई ते नाशिकपर्यंत हंगामा

पाचव्या टप्प्यातल्या मतदानाच्या दिवशी मुंबई ते नाशिकपर्यंत हंगामा झाला. संजय राऊतांचे भाऊ आमदार सुनिल राऊत आणि पोलिसांमध्ये भांडुपच्या पोलिंग बुथच्या बाहेर चांगलीच बाचाबाची झाली. पोलिसांनी ठाकरेंच्या शिवसेनेच्या 2 कार्यकर्त्यांना ताब्यात घेतल्यानं सुनिल राऊत मतदान केंद्राबाहेर आले.

मतदान केंद्राच्या बाहेर काही अंतरावर ठाकरे गटाचे कार्यकर्ते डमी EVM मशीनद्वारे प्रात्यक्षिकं दाखवत होते..त्याचवेळी पोलिसांनी त्यांना ताब्यात घेतलं. मात्र लोकांमध्ये जनजागृती करणं चूक आहे का ? असा सवाल करत सुनिल राऊत पोलिसांवर भडकले.

ठाकरे गटाचे ते कार्यकर्ते 100 मीटरच्या बाहेर, डमी मशिनद्वारे जनजागृती करत होते..त्यामुळं काही वेळात या दोघांनाही सोडून देण्यात आलं. इकडे नाशिकमध्ये अपक्ष उमेदवार शांतिगिरी महाराजांच्या सहकाऱ्याला पोलिसांनी ताब्यात घेतलं. मतदान केंद्रावर शांतिगिरी महाराजांच्या नावानं चिठ्ठ्या वाटत असल्याच्या आरोपात, म्हसरुळ पोलिसांनी जनेश्वर महाराजांना ताब्यात घेतलं. तर शांतीगिरी महाराजांच्या समर्थकांनी जय बाबाजी नावाचे स्टिकरही लावले होते. ज्यावर पोलिसांनी आक्षेप घेतला.

तर शांतिगिरी महाराज आपल्या कृतीनंही अडचणीत आलेत. मतदानावेळी अपक्ष उमेदवार शांतिगिरी महाराजांनी मतदान कक्षावरच हार घालता. त्यानंतर आचारसंहितेचं उल्लंघन केल्याप्रकरणी शांतिगिरी महाराजांवर गुन्हा दाखल करण्यात आला. नाशिकमध्येच, माऊली लॉन्स परिसरात मतदान केंद्रावर जेवण घेवून जाणाऱ्या शिवसेनेच्या 2 कार्यकर्त्यांना पोलिसांनी बेदम मारहाण केल्याचा आरोप केला. त्यानंतर खासदार हेमंत गोडसे आणि भाजपच्या आमदार सीमा हिरेही त्या मतदान केंद्रावर आल्या आणि त्या अधिकाऱ्याला जाब विचारला.

उद्धव ठाकरेंनी निवडणूक आयोग आणि भाजपवर थेट आरोप केला. मुंबईत दिवसभर संथ गतीनं मतदान होत असल्याच्या तक्रारी आल्या. त्यावरुन पत्रकार परिषद घेत उद्धव ठाकरेंनी, ज्या ठिकाणी शिवसेनेला मतदान होतंय, त्याच ठिकाणी विलंब होत असल्याचा आरोप केला.