दिल्लीत सीजेपी मुंबईच्या प्रमुखांना पोलिसांकडून मारहाण; रुग्णालयात दाखल, आंदोलकांवरही गुन्हे दाखल

दिल्लीतील निवडणूक आयोगाविरोधातील आंदोलनाचे पडसाद आता मुंबईतही उमटले आहेत. दिल्लीतील जंतर-मंतर येथे कॉकरोच जनता पार्टीच्या आंदोलनाच्या समर्थनार्थ महात्मा गांधी यांचे पणतू तुषार गांधी यांनी आंदोलनाची हाक दिली होती. त्यानंतर मुंबईतील ऑगस्ट क्रांती मैदान आणि नाना चौक परिसरात आंदोलन करणाऱ्यांवर पोलिसांनी कारवाई केली आहे. त्यांच्याविरोधात गुन्हे दाखल करण्यात आले आहेत. दुसरीकडे दिल्लीतील आंदोलनादरम्यान पोलिसांनी केलेल्या कथित मारहाणीत सीजेपीचे मुंबई प्रमुख प्रणय अहिरे जखमी झाल्याचा दावा पक्षाने केला आहे. त्यांना रुग्णालयात दाखल करण्यात आल्याची माहिती सीजेपीने सोशल मीडियावरील पोस्टद्वारे दिली आहे.

दिल्लीमध्ये निवडणूक आयोगाविरोधात सुरू असलेल्या आंदोलनादरम्यान सीजेपीचे मुंबई प्रमुख प्रणय अहिरे यांना पोलिसांनी अमानुष मारहाण केल्याचा आरोप पक्षाने केला आहे. या मारहाणीनंतर अहिरे यांना रुग्णालयात दाखल करण्यात आल्याचे सीजेपीने आपल्या पोस्टमध्ये म्हटले आहे. लोकशाही मार्गाने आंदोलन करण्यासाठी गेलेल्या व्यक्तीवर अशा प्रकारे हात उचलण्याचा अधिकार पोलिसांना कोणी दिला, असा सवालही पक्षाने उपस्थित केला आहे.

सीजेपीने या घटनेवर तीव्र शब्दांत नाराजी व्यक्त केली आहे. गणवेश म्हणजे नागरिकांना मारहाण करण्याचा परवाना नसून, कायद्याचे रक्षण करणे ही पोलिसांची जबाबदारी आहे, असे पक्षाने म्हटले आहे. तसेच, या घटनेमुळे आंदोलनकर्त्यांचा आवाज दाबला जाणार नाही आणि हे प्रकरण सोडून दिले जाणार नाही, असा इशाराही पक्षाने दिला आहे. दिल्लीतील आंदोलनाला पाठिंबा देण्यासाठी मुंबईतही निदर्शने करण्याचे नियोजन करण्यात आले होते.

महात्मा गांधी यांचे पणतू तुषार गांधी यांनी मुंबईतील ऑगस्ट क्रांती मैदानात आंदोलनासाठी नागरिकांना एकत्र येण्याचे आवाहन केले होते. मात्र, या आंदोलनाला पोलिसांची परवानगी मिळाली नव्हती. त्यानंतर पोलिसांनी ऑगस्ट क्रांती मैदान आणि ग्रँट रोड परिसरात कडेकोट बंदोबस्त ठेवला. तुषार गांधी यांना आंदोलनस्थळी जात असताना ताब्यात घेण्यात आले. नाना चौक परिसरातही आंदोलकांना रोखण्यात आले आणि अनेकांना पोलिसांनी ताब्यात घेतले.

या कारवाईदरम्यान आंदोलनकर्त्यांविरोधात गुन्हा दाखल करण्यात आल्याची माहिती देण्यात आली आहे. भारतीय न्याय संहितेच्या (BNS) कलम २२३, १२६(२), १८९(२), १८९(३) आणि १८९(५) अंतर्गत गुन्हा दाखल झाल्याचे नमूद करण्यात आले आहे. या कलमांचा संबंध सार्वजनिक आदेशाचे उल्लंघन, बेकायदेशीररीत्या जमाव जमवणे आणि संबंधित परिस्थितीत जमावाच्या सदस्यांच्या जबाबदारीशी असू शकतो.