Abhijeet Dipke : अभिजीत दीपकेंच्या लग्नासाठी असंख्य फोन; आईने सांगितलं, कशी हवी सूनबाई?

महिनाभराहून अधिकचा ठिय्या, उपोषण, संसदेवरील धडक मोर्चा, पोलिसांचा लाठीजार्ज.. इतका तीव्र संघर्ष करूनही जंतर-मंतरवरून न हटणाऱ्या युवाशक्तीसमोर अखेर पंतप्रधान नरेंद्र मोदींच्या सरकारला नमतं घ्यावं लागलं. यात ‘कॉकरोच जनता पार्टी’चा (CJP) अध्यक्ष अभिजीत दीपके यांचं मोठं यश मानलं जात आहे. सीजेपीच्या नेतृत्वाखालीच जंतर-मंतर याठिकाणी असंख तरुण आणि विद्यार्थी जमले होते. या मोठ्या यशानंतर आता अभिजीत यांच्या आईवडिलांनी त्यांच्या भावना व्यक्त केल्या आहेत. यावेळी ‘टीव्ही 9 मराठी’शी बोलताना त्यांनी मुलाच्या लग्नावरही प्रतिक्रिया दिली आहे. सीजेपीचं आंदोलन यशस्वी झाल्यापासून अभिजीत दीपके यांच्या लग्नासाठी असंख्य फोन येत असल्याची माहिती त्यांनी दिली आहे.

लग्नासाठी येत आहेत असंख्य फोन

“त्याच्या लग्नासाठी भरपूर फोन येत आहेत. आधीही येतच होते, पण आता आणखी जास्त येत आहेत. पण त्याच्या लग्नाचा योग जेव्हा येईल तेव्हा बघू. आधी त्याला यातून बाहेर पडू द्या”, अशी प्रतिक्रिया अभिजीत दीपके यांच्या आईने दिली आहे. तर सूनबाई कशी पाहिजे, असा प्रश्न विचारला असता त्या म्हणाल्या, “आता हे त्याच्या मनावर आहे. सून सर्वसामान्य, साधारण असावी, अशी मला अपेक्षा होती. पण आता तो एवढ्या लेव्हलला गेला आहे की त्यामुळे आता पत्नी निवडण्याचा निर्णय त्याच्यावर आहे. आयुष्याची जोडीदार निवडण्याचं स्वातंत्र्य त्याला आहे. आम्ही त्याला पाठिंबा देण्याचं काम करणार आहोत. आता आधीसारखं राहिलेलं नाही. पूर्वी आई-वडील म्हणायचे, या मुलीशी लग्न कर, तर लग्न व्हायचं. आता तसं नाही. आता मुलांचे विचार वेगळे आहेत.”

यावेळी अभिजीत यांच्या आईवडिलांनी त्यांच्या पुढील भूमिकेविषयीही प्रतिक्रिया दिली आहे. “त्याच्या भूमिकेविषयी मला काही सांगता येणार नाही. कारण पुढे तो काय करतो हे मलासुद्धा माहीत नाही. आता अभिजीत जी कोणती भूमिका घेईल, त्याला माझा पाठिंबा असेल,” असं आईने स्पष्ट केलं आहे.

केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी अभिजीत दीपके यांची कॉकरोच जनता पार्टी अडून बसली होती. अखेर जेव्हा त्यांनी राजीनामा दिला तेव्हा ‘आज लोकशाही विजयी झाली’ असं म्हणत त्यांनी सर्व आंदोलकांचं अभिनंदन केलं.