पोलीस दलासाठी गुडन्यूज, फडणवीस सरकारचा मोठा निर्णय, ट्वीट करत म्हणाले…
गृहमंत्री देवेंद्र फडणवीस यांनी ५४५९ पोलिसांच्या घरांसाठी १७६८.०८ कोटी रुपयांचा निधी मंजूर केला असून, महाविकास आघाडीने बंद केलेली ही योजना पुन्हा सुरू झाल्याचे त्यांनी सांगितले.
राज्यातील कायदा आणि सुव्यवस्था राखण्यासाठी अहोरात्र झटणाऱ्या पोलीस दलासाठी राज्य सरकारने मोठा निर्णय घेतला आहे. पोलीस कर्मचाऱ्यांच्या प्रलंबित घरांच्या प्रस्तावांना गती देण्यासाठी मुख्यमंत्री आणि गृहमंत्री देवेंद्र फडणवीस यांनी ५,४५९ पोलिसांच्या घरांसाठी १,७६८.०८ कोटी रुपयांच्या निधीला अधिकृत मंजुरी दिली आहे. महाराष्ट्र राज्य पोलीस गृहनिर्माण व कल्याण महामंडळाकडे हे प्रस्ताव प्रलंबित होते. यामुळे पोलिसांना मोठा दिलासा मिळाला आहे.
मुख्यमंत्री देवेंद्र फडणवीस यांनी नुकतंच एक ट्वीट केले आहे. या ट्वीटद्वारे त्यांनी मागील सरकारवर टीका केली आहे. २०१४ ते २०१९ या काळात आम्ही पोलिसांना घरांसाठी व्याजसवलत अनुदान योजना मोठ्या प्रमाणावर राबवली होती. मात्र, महाविकास आघाडीच्या काळात ही योजना बंद करण्यात आली. आम्ही पुन्हा सत्तेत आल्यावर ही योजना प्राधान्याने सुरू केली, असे देवेंद्र फडणवीस म्हणाले.
देवेंद्र फडणवीस काय म्हणाले?
जनतेच्या सुरक्षेसाठी सातत्याने कार्यरत आपल्या पोलिसांना घरे मिळाली पाहिजे, यासाठी प्रारंभीपासून मी आग्रही राहिलो आहे. त्यामुळेच 2014 ते 2019 या काळात मोठ्या संख्येने पोलिसांना घरांसाठी व्याजसवलत अनुदान योजना राबविण्यात आली. महाविकास आघाडीच्या काळात ती योजना बंद केली गेली होती. नंतर पुन्हा आम्ही ती योजना सुरु केली. आज मला सांगताना आनंद होतो की, आमच्या 5459 पोलिसांना घरांसाठी घरबांधणी अग्रीम म्हणून 1768.08 कोटी रुपयांना मंजुरी प्रदान करण्यात आली आहे. महाराष्ट्र राज्य पोलिस गृहनिर्माण व कल्याण महामंडळाकडे आलेल्या या प्रस्तावांसाठी ही रक्कम मंजूर करण्यात आली आहे, असे ट्वीट देवेंद्र फडणवीस यांनी केले.
पोलिसांना घरांसाठी ₹1768.08 कोटी मंजूर!
जनतेच्या सुरक्षेसाठी सातत्याने कार्यरत आपल्या पोलिसांना घरे मिळाली पाहिजे, यासाठी प्रारंभीपासून मी आग्रही राहिलो आहे. त्यामुळेच 2014 ते 2019 या काळात मोठ्या संख्येने पोलिसांना घरांसाठी व्याजसवलत अनुदान योजना राबविण्यात आली. महाविकास…
— Devendra Fadnavis (@Dev_Fadnavis) May 12, 2026
या निर्णयामुळे केवळ पोलीस कर्मचाऱ्यालाच नाही, तर त्यांच्या संपूर्ण कुटुंबाला आधार मिळणार आहे. तब्बल ५,४५९ पोलीस कर्मचाऱ्यांनी स्वतःच्या घरासाठी ‘घरबांधणी अग्रीम’ (HBA) मिळावा म्हणून अर्ज केले होते. महामंडळाकडे आलेल्या या प्रस्तावांची पडताळणी करून आता १७६८.०८ कोटींचा निधी थेट वितरीत करण्यात आला आहे. यामुळे घर खरेदी किंवा बांधकामासाठी लागणाऱ्या मोठ्या रकमेची अडचण आता दूर होणार आहे.
पोलीस दलाला मोठा दिलासा
गेल्या काही दिवसांपासून मुंबई, पुणे, नागपूर यांसारख्या शहरांमध्ये वाढत्या किमतींमुळे पोलिसांना स्वतःचे घर घेणे कठीण झाले होते. तिथे ही शासकीय मदत महत्त्वाची ठरणार आहे. तसेच निधीअभावी रखडलेल्या कर्ज प्रस्तावांचा मार्ग आता मोकळा झाला आहे. त्यासोबतच पोलिसांच्या मूलभूत गरजांपैकी एक असलेल्या घराचा प्रश्न सुटल्याने पोलीस दलाला मोठा दिलासा मिळणार आहे.
