VIDEO: पहिली ऑक्सिजन एक्सप्रेस महाराष्ट्रात दाखल, 7 टँकरपैकी कोणत्या जिल्ह्याला किती?

पहिली ऑक्सिजन एक्स्प्रेस 7 टँकर्ससह महाराष्ट्रात दाखल झालीय.

VIDEO: पहिली ऑक्सिजन एक्सप्रेस महाराष्ट्रात दाखल, 7 टँकरपैकी कोणत्या जिल्ह्याला किती?


नागपूर : महाराष्ट्रात वाढत्या कोरोना रुग्णांच्या पार्श्वभूमीवर ऑक्सिजनची मोठ्या प्रमाणात कमतरता भासत आहे. त्यामुळेच आता इतर राज्यांमधून ऑक्सिजन आणण्यासाठी रेल्वे विभागाने खास ऑक्सिजन एक्स्प्रेस सुरु केली. त्यातील पहिली ऑक्सिजन एक्स्प्रेस महाराष्ट्रात दाखल झालीय. विशाखापट्टणम स्टील प्लॅट सायडींगमधून लिक्विड मेडिकल ऑक्सिजनचे 7 (एलएमओ) टँकर्स घेऊन ही रेल्वे रो-रो सेवेद्वारे आज सायंकाळी 8.10 वाजता नागपूर स्थानकात दाखल झाली (First Oxygen express train reach to Maharashtra with 7 Oxygen tankers).

ऑक्सिजन एक्स्प्रेसने आणलेल्या 7 टँकर्सपैकी 3 ऑक्सिजन टँकर्स नागपूर स्थानकावर उतरवले जाणार आहेत. उर्वरित टँकर महाराष्ट्रातील नाशिक रोड स्थानकात उतरवण्यात येणार आहेत. ऑक्सिजन एक्सप्रेस शनिवारी (24 एप्रिल) सकाळी नाशिकरोड स्थानकात पोहोचेल. त्यामुळे नागपूर आणि नाशिकला मोठा दिलासा मिळाला आहे. ऑक्सिजनच्या तुटवड्याचा सामना करावा लागत असताना हे टँकर्स उपलब्ध झाल्याने कोरोना रुग्णांवर उपचार करणं शक्य होणार आहे.

कोरोनाच्या सामन्यात रेल्वेची महत्त्वाची भूमिका

भारतीय रेल्वे विभागाने कोरोनाविरुद्धच्या लढाईत मोठी भूमिका पार पाडलीय. गेल्या वर्षीही लॉकडाऊनमध्ये रेल्वेने जीवनावश्यक वस्तूंची वाहतूक करण्यात आली होती. त्यामुळे वाहतूक व्यवस्था ठप्प झालेली असतानाही पुरवठा साखळी कायम ठेवता आली. तसेच आपत्कालीन परिस्थितीत राष्ट्राची सेवा सुरू राहिली.

राष्ट्रीय स्टील निगम लिमिटेड विशाखापट्टणम स्टील प्लांटमधून ऑक्सिजन

राष्ट्रीय स्टील निगम लिमिटेड विशाखापट्टणम स्टील प्लांटमध्ये ही एक्सप्रेस गुरुवारी सकाळी दाखल झाली. त्यानंतर या एक्सप्रेसवरील 7 रिकाम्या टँकरमध्ये लिक्विड ऑक्सिजन भरण्यात आला. त्यानंतर रात्री 10 च्या सुमारास ही एक्सप्रेस विझागवरुन रवाना झाली. आज ही स्पेशल रेल्वे नागपुरात दाखल झाली. प्रत्येक टँकरमध्ये 15 ते 20 टन लिक्विड ऑक्सिजन भरण्याची क्षमता आहे. त्यामुळे एकाच वेळी महाराष्ट्राला जवळपास 100 टन लिक्विड ऑक्सिजन प्राप्त होणार आहे. सकाळी ही ट्रेन विशाखापट्टणम इथं दाखल झाल्यानंतर सर्व टँकरमध्ये लिक्विड ऑक्सिजन भरणे, वजन करणे आणि सुरक्षेची खात्री करण्यासाठी 20 तासांचा अवधी लागू शकतो असं सांगण्यात आलं होतं.

मुख्यमंत्री, आरोग्यमंत्र्यांची केंद्राकडे मागणी

राज्यात ऑक्सिजनचा मोठा तुटवडा निर्माण झाल्यानंतर मुख्यमंत्री उद्धव ठाकरे आणि आरोग्यमंत्री राजेश टोपे यांनी केंद्र सरकारकडे ऑक्सिजनची मागणी केली. त्यानंतर रेल्वेकडून खास ऑक्सिजन एक्सप्रेस देण्यात आली आहे. महाराष्ट्राला विशाखापट्टणम, जमशेदपूर, राऊरकेला आणि बोकारो इथून ऑक्सिजनचा पुरवठा केला जाणार आहे.

हेही वाचा :

मोठी बातमी ! राज्यातील सर्व रुग्णालयांचे ‘फायर’ आणि ‘ऑक्सिजन ऑडिट’ करा, जिल्हा प्रशासनाला मुख्य सचिवांचे निर्देश

आमदार असावा तर असा! रेमडेसिव्हीरसाठी 20 लाखाचा निधी जिल्हाधिकार्‍यांकडे सुपूर्द!

एका मिनिटात 1000 लिटर ऑक्सिजन, ‘तेजस’च्या तंत्रज्ञानाने होणार ऑक्सिजनची निर्मिती; वाचा सविस्तर

व्हिडीओ पाहा :

First Oxygen express train reach to Maharashtra with 7 Oxygen tankers

Read Full Article

Click on your DTH Provider to Add TV9 MARATHI