टायगर इज बॅक… लवकरच मैदानात, महेश गायकवाड यांच्या बॅनर्सची कल्याण-डोंबिवलीत चर्चा

सुनील जाधव, टीव्ही9 मराठी प्रतिनिधी, कल्याण | 16 फेब्रुवारी 2024 : भाजपचे आमदार गणपत गायकवाड यांनी उल्हासनगर पोलिस स्टेशनमध्ये केलेल्या गोळीबारामुळे संपूर्ण ठाणे जिल्हा हादरला. या गोळीबारात शिवसेनेचे कल्याण विभाग शहर प्रमुख आणि माजी नगरसेवक महेश गायकवाड आणि त्यांचे सहकारी राहुल पाटील हे दोघेही गंभीर जखमी झाले. २ फेब्रुवारीला झालेल्या या हल्लानंतर तब्बल १४ दिवसांपासून महेश गायकवाड यांच्यावर ज्युपिटर रुग्णालयात उपचार सुरू आहेत. आता त्यांच्या प्रकृतीत सुधारणा होत असून आज त्यांना डिस्चार्ज देण्यात येणार असल्याची माहिती समोर आली आहे. यामुळे त्यांच्या कार्यकर्ते व समर्थकांमध्ये आनंदाचं वातावरण असून कल्याण पूर्वेत मोठ्या प्रमाणात बॅनरबाजी करण्यात येत आहे.

गायकवाड यांच्या स्वागतासाठी बॅनरबाजी

मृत्यूच्या दाढेतून परत आलेले महेश गायकवाड यांच्या स्वागतासाठी कल्याणमध्ये मोठ्या प्रमाणात बॅनर्स लावण्यात आले आहेत. ‘ गोर गरीबाचा कैवारी’… ‘टायगर इज बॅक’, हेच प्रेम हेच आशीर्वाद, जनतेचा रथ पुन्हा लवकरच मैदानात येणार, महेश गायकवाड कल्याणकर तुमचे स्वागत करीत आहोत अशा आशयाचे बॅनर सगळीकडे झळकत आहेत. तर दुसरीकडे महेश गायकवाड शहर प्रमुख, माजी नगरसेवक, भावी आमदार अशा आशयाचे बॅनरही काही ठिकाणी झळकत असल्याने राजकीय वर्तुळात चर्चा सुरू झाली आहे.

14 दिवसांपासून उपचार सुरू

उल्हासनगर हिल लाईन पोलीस ठाण्यात, वरिष्ठ पोलीस निरीक्षक यांच्या कार्यालयात गणपत गायकवाड यांनी शुक्रवार 2 फेब्रुवारीला महेश गायकवाड आणि त्यांचे सहकारी राहुल पाटील यांच्यावर जमिनीच्या वादावरून गोळ्या झाडल्या होत्या. या गोळीबारात महेश गायकवाड आणि त्यांचे सहकारी राहुल पाटील गंभीर जखमी झाले होते. त्यामुळे दोघांना तातडीने उपचारासाठी ठाण्यातील ज्युपिटर रुग्णालयात हलविण्यात आले होते. गेल्या 14 दिवसांपासून त्या दोघांवरही उपचार सुरू होते. आता त्यांच्या प्रकृतीत सुधारणा झाली असल्याने दुपारी त्यांना रुग्णालयातून डिस्चार्ज देण्यात येणार आहे. तब्बल 14 दिवसानंतर घरी परतत असल्याने महेश गायकवाड व राहुल पाटील यांचे, कार्यकर्ते व समर्थकांकडून दुपारी जंगी स्वागत करत. ठाण्यात व कल्याण मध्ये शक्ती प्रदर्शन देखील करण्यात येणार आहे.