महाराष्ट्रासाठी मोठी गुडन्यूज, दुष्काळ पाहणी दौऱ्यासाठी केंद्रीय पथक राज्यात दाखल, बैठकीला सुरुवात

मोठी बातमी समोर येत आहे. अखेर केंद्राचे दुष्काळ पाहणी दौऱ्यासाठीचे पथक मुंबईमध्ये दाखल झालं आहे. राज्याचे मुख्यसचिव राजेश अग्रवाल यांच्या उपस्थितीमध्ये केंद्रीय पथकातील अधिकाऱ्यांची सह्याद्री अतिथीगृह येथे बैठक सुरू झाली आहे. या बैठकीमध्ये राज्यातील दुष्काळ परिस्थितीची माहिती मुख्यसचिवांकडून अधिकाऱ्यांना देण्यात येणार आहे. या पथकामध्ये एकून 33 जणांचा समावेश आहे. 11 सदस्यांचे 3 पथकं करण्यात आले असून, एक पथक दुष्काळी परिस्थितीचा आढावा घेण्यासाठी पश्चिम महाराष्ट्रातील अहिल्यानगर, सोलापूर आणि पुणे जिल्ह्यात जाणार आहे. दुसरे पथक मराठवाड्यातील छत्रपती संभाजीनगर, जालना आणि बीड जिल्ह्याची पाहणी करणार आहे. तर तिसरे पथक विदर्भातील नागपूर, यवतमाळ आणि लगतच्या टंचाईग्रस्त भागांची पाहणी करणार आहे.

राज्यात यंदा एलनिनोमुळे पाऊसच झाला नाही, सुरुवातीला दीड महिना जूनचा अर्धा महिना आणि जुलैचा संपूर्ण एक महिला राज्यात चांगला पाऊस पडला, मात्र त्यानंतर पावसात जो खंड पडला त्यानंतर पाऊसच झाला नाही. संपूर्ण ऑगस्ट आणि सप्टेंबर महिना कोरडा गेल्यामुळे शेतकरी मोठ्या संकटात सापडले आहेत. खरीप हंगाम हातचा गेला, पाऊस नसल्यामुळे आता रब्बी हंगाम देखील संकटात सापडला आहे. त्यामुळे शेतकऱ्यांची चिंता वाढली आहे. राज्यात पाण्याचा प्रश्न गंभीर बनला आहे. अनेक गावांना टँकरद्वारे पाणीपुरवठा सुरू आहे. जनावरांच्या चाऱ्याचा प्रश्न देखील निर्माण झाला आहे.

या सर्व पार्श्वभूमीवर काही दिवसांपूर्वीच राज्यातील 265  जिल्ह्यांमध्ये राज्य सरकारने दुष्काळ जाहीर केला आहे. राज्यात दुष्काळ जाहीर झाल्यानंतर आता शेतकऱ्यांचे डोळे हे सरकारच्या मदतीकडे लागले आहेत. सरकारकडून दुष्काळी भागात विविध उपाय योजना राबवण्यात येणार आहेत, ज्यामध्ये अन्न-धान्याची व्यवस्था, नुकसान भरपाई, जनावरांना चाऱ्याची सोय यातोबतच पाण्याची व्यवस्था अशा उपाय योजना राबवल्या जाणार आहेत. दरम्यान त्यानंतर आता केंद्रीय पथक देखील दुष्काळाचा आढावा घेण्यासाठी राज्यात दाखल झालं आहे. केंद्राकडून देखील दुष्काळाच्या पार्श्वभूमीवर राज्याला भरीव मदत केली जाईल अशी अपेक्षा व्यक्त केली जात आहे.