Eknath Shinde : मोठी बातमी, महायुतीत काय घडलं? दोन घटनांमधून एकनाथ शिंदे यांची नाराजी दिसली
Eknath Shinde : शिवसेना मुख्य नेते आणि उपमुख्यमंत्री एकनाथ शिंदे हे नाराज असल्याची माहिती आहे. दोन दिवसांपूर्वी मुख्यमंत्री देवेंद्र फडणवीस यांच्या वर्षा निवसास्थानी दुष्काळ आढावा बैठक बोलवण्यात आलेली.
गिरीश गायकवाड, प्रतिनिधी : शिवसेना मुख्य नेते आणि उपमुख्यमंत्री एकनाथ शिंदे हे नाराज असल्याची माहिती आहे. दोन दिवसांपूर्वी मुख्यमंत्री देवेंद्र फडणवीस यांच्या वर्षा निवसास्थानी दुष्काळ आढावा बैठक बोलवण्यात आलेली. त्यात दोन्ही उपमुख्यमंत्री एकनाथ शिंदे आणि सुनेत्रा पवार यांना बोलवण्यात आलेलं. पण ते गैरहजर राहिले. आज कचरा आढावा बैठक ठेवण्यात आलेली. त्या बैठकीला सुद्धा एकनाथ शिंदे गैरहजर होते. पण त्यासाठी कारण देण्यात आलं की, त्याचवेळी नंदनवन निवासस्थानी पत्रकार परिषद होती. एकनाथ शिंदे यांच्याकडे भाजपकडून दुर्लक्ष केलं जातय का? त्यांना जाणीवपूर्वक डावललं जातय का? एकनाथ शिंदे यांची नाराजी भाजपंकडून दूर केली जाणार का? असे अनेक प्रश्न या निमित्ताने उपस्थित होत आहेत.
“एकूणच महायुतीत धुसफूस सुरु आहे. पण सुनेत्रा पवार यांच्या बाबतीत नाराजीपेक्षा त्या सोमेश्वर सहकारी साखर कारखान्याच्या निवडणुकीत जास्त व्यस्त होत्या. पण एकनाथ शिंदे यांच्या अनुषंगाने दोन-तीन गोष्टीतून त्यांची नाराजी ठळकपणे दिसून आलीय. एकनाथ शिंदे यांना मुख्यमंत्री केल्यापासून सातत्याने त्यांनी देवेंद्र फडणवीस यांना आव्हान देण्याचा प्रयत्न केला. त्यातून त्यांची नाराजी दिसून आलेली” असं राजकीय विश्लेषक संजय आवटे म्हणाले.
देशात वातावरण तापलेलं आहे
“एकतर महायुतीमध्ये सुनेत्रा पवार आणि एकनाथ शिंदे यांच्या पक्षांना विधान परिषदेत पुरेशा जागा मिळाल्या नाहीत हे एक कारण आहेच. पण भाजपच्या अंतर्गत असलेला एक गट बोलू लागला आहे. देशात वातावरण तापलेलं आहे. सरकारला आवाहन दिलं जाऊ शकतं असं वातावरण तयार झालय. अशावेळी भाजप अंतर्गत गट बोलू लागला आहे” याकडे संजय आवटे यांनी लक्ष वेधलं.
त्यांनी दबाव तंत्राचा वापर केलेला
“दुसरीकडे शिवसेना खटल्याची सर्वोच्च न्यायालयात सुनावणी सुरु आहे. ही शिंदे यांच्यासाठी निश्चित आनंदाची बाब नाही. यापूर्वी एकनाथ शिंदे नाराज झाल्यानंतर दरेगावला निघून गेले होते. त्यांनी दबाव तंत्राचा वापर केलेला. मी आहे असं सांगून त्यांनी लक्ष वेधून घेण्याचा प्रयत्न केलेला. एकनाथ शिंदे आताही असा प्रयत्न करत असावेत पण ते महायुतीपासून दूर जातील असं वाटत नाही” असं राजकीय विश्लेषक संजय आवटे म्हणाले.
