आधी ढकललं… मग काठीने बेदम मारहाण; वर्दीतल्या पोलिसासोबत भयंकर घडलं, Video आला समोर
Kalyan Police Attack : कल्याण पश्चिम परिसरातील गौरीपाडा भागात एका मद्यधुंद तरुणाने पोलिस कर्मचाऱ्यावर काठीने हल्ला केल्याचे समोर आले आहे.
ठाणे जिल्ह्यातील कल्याणमधून मोठी बातमी समोर आली आहे. कल्याण पश्चिम परिसरातील गौरीपाडा भागात एका मद्यधुंद तरुणाने पोलिस कर्मचाऱ्यावर काठीने हल्ला केल्याचे समोर आले आहे. हा संपूर्ण प्रकार सीसीटीव्ही कॅमेऱ्यात कैद झाला आहे. गणेश चव्हाण असे मारहाण झालेल्या पोलिस कर्मचाऱ्याचे नाव आहे. तर राहुल तायडे असं मारहाण करणाऱ्या मद्यधुंद तरूणाचे नाव आहे. हे संपूर्ण प्रकरण नेमकं काय आहे याबाबत सविस्तर माहिती जाणून घेऊयात.
पोलिस कर्मचाऱ्यावर हल्ला
समोर आलेल्या माहितीनुसार, पोलिसावर हल्ला करणारा हा आरोपी परिसरातील नागरिकांच्या घराबाहेर उभा राहून गोंधळ घालत होता. त्यामुळे स्थानिक नागरिकांनी पोलीस नियंत्रण कक्षाला याची माहिती दिली होती. तक्रार मिळाल्यानंतर खडकपाडा पोलीस ठाण्यात कार्यरत असलेले पोलीस कर्मचारी गणेश चव्हाण घटनास्थळी पोहोचले. त्यावेळी राहुल तायडे नावाच्या तरुणाने प्रथम त्यांच्याशी वाद घातला आणि त्यानंतर काठीने मारहाण केली. या घटनेचा व्हिडिओ समोर आला आहे.
कानशि‍लातही लगावली
आरोपी राहुल तायडे गोधळ घालत असल्याने नागरिकांनी 112 वर कॉल करून तक्रार केली होती. या तक्रारीची पडताळणी करण्यासाठी पोलिस कर्मचारी गणेश चव्हाण हे गेले होते. यावेळी आरोपी राहुल तायडे याने पोलिस कर्मचारी गणेश चव्हाण यांची कॉलर पकडून कानशिलात मारत ठोसे-बुक्क्यांनी बेदम मारहाण केली. पोलिसाचे डोके भिंतीवर आपटून लाकडी दांडक्याने डोक्यावर वार करण्याचा प्रयत्न केला. मात्र यावेळी चव्हाण यांनी हात आडवा केल्याने मोठी दुखापत टळली आहे.
आरोपीला अटक
या दोघांच्या झटापटीदरम्यान गणेश चव्हाण यांचा मोबाईल, नेमप्लेट आणि लॅनयार्डचे नुकसान झाले आहे. आरोपीने चाकू काढून पोलिसाच्या पोटावर वार करण्याचाही प्रयत्न केला, मात्र पोलिस कर्मचाऱ्याने प्रसंगावधान राखत वार चुकवला. आरोपी हा निवृत्त पोलीस कर्मचाऱ्यांचा मुलगा असल्याची प्राथमिक माहिती समोर आली आहे. आता आरोपीवर सरकारी कामात अडथळा आणल्याचा आरोप केला जात आहे. या आरोपीविरोधात खडकपाडा पोलिस ठाण्यात गंभीर कलमांखाली गुन्हा दाखल करण्यात आला असून त्याला अटक करण्यात आली आहे. तसेच पोलीस तपास सुरू करण्यात आला आहे.
आधी ढकललं… मग काठीने बेदम मारहाण; वर्दीतल्या पोलिसासोबत भयंकर घडलं, Video आला समोर #kalyan #crime #police pic.twitter.com/fjeYd5UDgV
— TV9 Marathi (@TV9Marathi) July 27, 2026
