कोल्हापुरात विद्यार्थ्यांच्या सहलीच्या बसवर अज्ञातांकडून दगडफेक, पोलीस घटनास्थळी दाखल

भूषण पाटील, Tv9 प्रतिनिधी, कोल्हापूर | 31 जानेवारी 2024 : कोल्हापुरातून एक मोठी बातमी समोर आली आहे. कोल्हापुरातील ऐतिहासिक दसरा चौक इथे शालेय विद्यार्थ्यांच्या सहलीच्या बसवर दगडफेक करण्यात आली आहे. त्यामुळे एकच खळबळ उडाली आहे. सहलीच्या बससह इतर आजूबाजूच्या चारचाकी वाहनांवरही दगडफेक करण्यात आली आहे. काही अज्ञातांकडूनी ही दगडफेक करण्यात आली आहे. घटनेची माहिती मिळताच पोलीस घटानस्थळी दाखल झाले आहे. पोलिसांकडून आता घटानस्थळ गाठून तपासाला सुरुवात झाली आहे.

कोल्हापूरमध्ये सध्या अंबाबाईच्या दर्शनासाठी मोठी गर्दी येत आहे. तसेच शाळेच्या सहलीदेखील कोल्हापुरात येत आहे. या सर्व भाविक आणि पर्यटकांच्या गाड्यांची पार्किंगची व्यवस्था दसरा चौकच्या पार्किंगमध्ये करण्यात आलेली आहे. याच ठिकाणी उभ्या असलेल्या शाळेच्या एका बसवर अज्ञातांनी दगडफेक केली आहे. त्याचबरोबर आणखी दोन चारचाकी वाहनांची तोडफोड अज्ञातांनी केली आहे. या तोडफोडीमागचं कारण अद्याप समजू शकलेलं नाही.

कोल्हापुरात आज सकाळपासून अतिक्रमणच्या मुद्द्यावरुन गोंधळ सुरु असताना आज संध्याकाळी वाहनांवर दगडफेक करण्याची आल्याचा प्रकार समोर आला आहे. पोलिसांनी या घटनेची गंभीर दखल घेतली आहे. नेमकी घटना काय झाली आहे, दगडफेक का झाली, कोणी केली? याचा शोध पोलिसांकडून घेतला जात आहे. पण सकाळपासूनची परिस्थिती काहीशी निवळत असताना संध्याकाळी अज्ञातांनी दगडफेक केल्याचा प्रकार समोर आला आहे.