समरजित घाटगे आज राष्ट्रवादीत प्रवेश करणार; पक्षप्रवेशासाठी शरद पवारांनी गैबी चौकच का निवडला?

विधानसभा निवडणुकीआधी राजकीय वर्तुळात बदल व्हायला सुरुवात झाली आहे. विधानसभा लढवण्यासाठी उमेदवारीसाठी इच्छूक असणाऱ्या नेत्यांच्या पक्षांतराला आता सुरुवात झालीय आणि या सगळ्याची सुरुवात झालीय छत्रपती शाहू महाराज यांचं जन्मस्थळ असणाऱ्या कागलमधून… शाहू महाराजांच्या जनक घराण्याचे वंशज, भाजपचे नेते समरजित घाटगे आज राष्ट्रवादी शरद पवार गटात प्रवेश करणार आहेत. आज संध्याकाळी 6 वाजता हा पक्षप्रवेश होणार आहे. शरद पवार सध्या चार दिवसांच्या कोल्हापूर दौऱ्या दरम्यान आज समरजित सिंह घाटगे यांचा पक्षप्रवेश होत आहे.

समरजित घाटगे यांच्या पक्षप्रवेशाआधी कागलमध्ये जोरदार बॅनरबाजी करण्यात आली आहे. वस्ताद येत आहेत… असे बॅनर लावण्यात आले आहेत. त्यामुळे कागलमध्ये चर्चांना उधाण आलं आहे.

पवारांनी गैबी चौकच का निवडला?

कागलमधील गैबी चौक या ठिकाणी राष्ट्रवादी शरद पवार पक्षाची जाहीरसभा होणार आहे. या सभेत समरजित घाटगेंचा पक्ष प्रवेश होईल. पण पवारांनी या पक्षप्रवेशाचं जे ठिकाण निवडलं आहे. त्यात बऱ्याच गोष्टी दडलेल्या आहेत. कागलमधल्या गैबी चौकात मंत्री हसन मुश्रीफ यांचं घर आहे. मुश्रीफांच्या अनेक सभा या गैबी चौकातील मैदानावरच होत असतात. तिथं पक्षप्रवेशाचा कार्यक्रम ठेवत शरद पवारांनी मोठा राजकीय संदेश दिल्याचं बोललं जात आहे. मात्र या जागेवर शरद पवार आधीपासून सभा घेत आहेत. ती शरद पवारांची सभा घेण्याची जागा आहे, असं समरजित घाटगे यांनी एका मुलाखतीत सांगितलं.

समरजित घाटगे पक्षांतर का करत आहेत?

2016 समरजित घाटगे यांनी भाजपत प्रवेश केला. पण 2019 च्या निवडणुकीत ही जागा शिवसेनेकडे गेली. त्यामुळे समरजित घाटगे यांनी अपक्ष निवडणूक लढवली. हसन मुश्रीफ यांच्याकडून घाटगेंचा पराभव झाला. यंदा ते भाजपकडून निवडणुकीच्या रिंगणात उतरण्यासाठी इच्छूक होते. मात्र राष्ट्रवादी अजित पवार गट महायुतीत आहे. काहीच दिवसांआधी अजित पवार कागलमध्ये आलेले असताना त्यांनी मुश्रीफांची उमेदवारी जाहीर केली. त्यामुळे समरजित घाटगेंच्या निर्णयाकडे सर्वांचं लक्ष होतं. कार्यकर्त्यांशी बोलून घाटगेंनी राष्ट्रवादी शरद पवार गटात प्रवेश करण्याचा निर्णय घेतला. आज त्यांचा पक्षप्रवेश होणार आहे.