पेपरफुटी प्रकरणात तुरुंगात असलेल्या मोटेगावरच्या क्लासची कमाल, नीट परीक्षेत लातूरमध्ये विद्यार्थी पहिला

नीट पेपरफुटी प्रकरणात ‘आरसीसी’ (RCC) कोचिंग क्लासेसचा संचालक शिवराज मोटेगावकर याला सीबीआयने अटक केली आहे. मोटेगावकर याने पेपर फोडले असून त्यासाठी लाखो रुपयांची माया उकळल्याचा त्याच्यावर आरोप आहे. त्यामुळे मोटेगावरच्या क्लासच्या यशाचं बिंगही फुटलं. पेपर फोडून विद्यार्थ्यांना देत असल्यामुळेच मोटेगावकरची मुलं नीटमध्ये टॉपला येतात असं बोललं जात होतं. मात्र, काल लागलेल्या नीट परीक्षेत मोटेगावकरच्या क्लासच्या विद्यार्थ्यांनी घसघशीत मार्क्स मिळवले आहेत. मोटेगावकरच्या क्लासचा एक विद्यार्थी तर नीट परीक्षेत लातूरमध्ये टॉप ठरला आहे.

नीट परीक्षेचा काल निकाल जाहीर झालाय या निकालावर लातूर पॅटर्नची पुन्हा छाप पहायला मिळाली आहे. लातूर जिल्ह्यातून 1500 पेक्षा जास्त विद्यार्थी यावर्षी शासकीय वैद्यकीय महाविद्यालयात प्रवेश घेण्यास पात्र ठरतील असा हा निकाल आहे. या निकालातून लातूरच्या विद्यार्थ्यांनी नीट पेपर फुटीमुळे झालेला बदनामीचा डाग पुसून काढला आहे. लातूरच्या राजर्षी शाहू महाविद्यालयाचे 400 पेक्षा जास्त विद्यार्थी नीट परीक्षेत विशेष प्राविण्याने उत्तीर्ण झाले आहेत. तर मोटेगावकरच्या क्लासेसमध्ये शिकणाऱ्या विद्यार्थ्यांनीही चांगले यश संपादन केले आहे. RCC क्लासेसचे 500 पेक्षा जास्त विद्यार्थी शासकीय वैद्यकीय महाविद्यालयात प्रवेश घेण्यास पात्र ठरतील, असा दावा करण्यात येतो आहे. विशेष म्हणजे 686 गुण घेऊन ऑल इंडिया 172 रँक गुण घेणारा विद्यार्थी हा मोटेगावकरच्या RCC क्लासेसचा आहे.

विद्यार्थी अव्वल

लातूर मधून 1500 पेक्षा जास्त विद्यार्थी शासकीय वैद्यकीय महाविद्यालयात प्रवेशासाठी पात्र ठरले आहेत. वेगवेगळ्या कोचिंग क्लासेस बरोबरच लातूरच्या तीन प्रमुख महाविद्यालयांमधून हे विद्यार्थी विशेष प्राविण्याने री-नीट परीक्षा उत्तीर्ण झाले आहेत. मोटेगावकर तुरूंगात असतानाही त्याच्या क्लासेसच्या विद्यार्थ्यांनी देखील मोठ्या संख्येने नीट परीक्षेत घवघवीत यश मिळवले आहेत. लातूर मध्ये सर्वात जास्त 720 पैकी 686 गुण मिळवणारा विद्यार्थी हा मोटेगावकऱ्याच्या RCC क्लासेसचा आहे.

काय आहे प्रकरण?

नीट पेपर फुटल्यानंतर सीबीआयने या प्रकरणाचा कसून तपास करण्यास सुरुवात केली होती. या पेपरफुटीचे धागेदोरे लातूरमध्ये असल्याचं आढळून आलं होतं. त्यामुळे सीबीआयने कारवाई करण्यास सुरुवात केली. 15 मे रोजी सीबीआयने मोटेगावकरच्या घरी छापे मारून त्याची 9 तास चौकशी केली. या धाडीत सीबीआयने मोटेगावकरच्या आरसीसी क्लासमधून सराव प्रश्नपत्रिका, मोबाईल आणि महत्त्वाचे डीजिटल पुरावे जप्त केले होते. त्यानंतर 17 मे रोजी सीबीआयने मोटेगावकरची पुण्यात 11 तास मॅरेथॉन चौकशी करण्यात आली. त्यानंतर त्याला अटक करण्यात आली होती. त्यामुळे एकच खळबळ उडाली होती. तसेच मोटेगावकराच्या यशाच्या मंत्राच्या पॅटर्नवरही प्रश्नचिन्ह निर्माण केले जात होते.