Nashik, Ahilyanagar, Jalgaon, Dhule, Malegaon Election Results 2026 LIVE: मामा, तुम्ही मोठंच काम करून टाकलं… मुख्यमंत्री देवेंद्र फडणवीस यांचा थेट या खास व्यक्तीला फोन

जळगाव महापालिकेत भाजपच्या तसेच महायुतीच्या विजयाबद्दल मुख्यमंत्री देवेंद्र फडणवीस यांनी भाजपचे आमदार सुरेश भोळे यांना फोनवरून शुभेच्छा दिल्या आहेत. मामा तुम्ही मोठचं काम करून टाकलं, या शब्दात मुख्यमंत्री देवेंद्र फडणवीस यांनी आमदार सुरेश भोळे यांचे अभिनंदन केले. जळगाव महापालिका निवडणुकीत भाजपला 46 पैकी 46 जागा मिळाल्या आहेत. याच विजयावरून मामा तुम्ही अॅटम करून टाकला, असे फोनवरून मुख्यमंत्री देवेंद्र फडणवीस आमदार सुरेश भोळे यांना म्हणाले. जळगाव महापालिका निवडणुकीत भाजपच्या वतीने निवडणूक प्रमुख म्हणून आमदार सुरेश भोळे यांच्यावर जबाबदारी देण्यात आली होते.

मला धुळेकर नागरिकांनी माझ्या 50व्या वाढदिवसानिमित्त 50 जागा जिंकून गिफ्ट दिलं आहे. उत्तरेपासून दक्षिणेपर्यंत सर्वकडे भाजप आहे. उत्तर दिशेला धुळे जिल्हा तर दक्षिण दिशेला मुंबई आहे. त्यामुळे 35 वर्षात मुंबई जिंकली आहे. आता मुंबईकर खुला श्वास घेतील. मुख्यमंत्री देवेंद्र फडणवीस यांच्या विकासाला आणि पंतप्रधान नरेंद्र मोदी यांच्या विकासाला नागरिकांनी साथ दिली त्यांचे आभार. संपूर्ण महाराष्ट्र भाजपामय झाला आहे आणि यापुढे पुन्हा एकदा विकास करता येणार आहे, असंही जयकुमार रावल म्हणाले.

जळगावच्या प्रभाग 11 मधील शिवसेना शिंदे गटाच्या उमेदवार सिंधुताई कोल्हे विजयी झाल्या आहेत. जळगावच्या कोल्हे कुटुंबातील माजी महापौर ललित कोल्हे स्वतः, तसेच आई सिंधू ताई कोल्हे, मुलगा पीयूष कोल्हे हे तिघेही विजयी झाले आहेत. ललित कोल्हे यांनी कारागृहातून शिवसेना शिंदे गटाकडून निवडणूक लढवली होती आणि ते विजय झाले आहेत. आरोप कितीही झाले तरी कर्तृत्वाच्या भिंती तोडणे हे अवघड असतं, अशा शब्दात ललित कोल्हे यांच्या पत्नी सरिता माळी कोल्हे यांनी प्रतिक्रिया दिली आहे.

मतमोजणी केंद्राबाहेर संतप्त तसेच आक्रमक झालेल्या जमावाकडून पोलिसांवर दगडफेक करत रस्त्यावरील दुचाकींची नासधूस करण्याचा प्रयत्न झाला. प्रभाग 10 मध्ये फेर मतमोजणीच्या मागणीसाठी कुलभूषण पाटील यांच्या समर्थनार्थ मतमोजणी केंद्रा बाहेर मोठा जमाव जमला होता. या जमावावर पोलिसांकडून सौम्य लाठीचार्ज करत जमावावर नियंत्रण करण्याचा प्रयत्न करण्यात आला. यावेळी प्रशासनाकडून फेर मतमोजणी घेण्यात आलीच नाही. त्यामुळे कुलभूषण पाटलांचे समर्थक कार्यकर्ते आक्रमक झाले होते. कुलभूषण पाटील मतमोजणी केंद्राच्या बाहेर आल्यानंतर जमाव आक्रमक झाला होता.

धुळे महापालिकेवर भाजपची एकहाती सत्ता आली आहे. भाजपने गेल्या निवडणुकीप्रमाणे जिंकले यंदाही 51 जागा जिंकल्या आहेत. त्या खालोखाल एमआयएमने 10 जिंकून दुसरं स्थान मिळवलं आहे. तर ठाकरे सेना आणि काँग्रेसचा या निवडणुकीत सुपडा साफ झाला आहे.

अहिल्यानगरच्या इतिहासात पहिल्यांदाच महानगरपालिकेत भाजप आणि राष्ट्रवादीला स्पष्ट बहूमत मिळालं आहे. आता नगरसेवकांचा घोडेबाजार थांबणार आहे. हा विजय नगरमधील मतदार, पंतप्रधान, मुख्यमंत्री आणि उपमुख्यमंत्री अजित पवार यांच्या नेतृत्वाचा आहे. कोणालाही आता पळून जाता येणार नाही. आम्ही पळून जाण्यासाठी जागाच ठेवली नाही, असं भाजपचे माजी खासदार डॉ. सुजय विखे पाटील यांनी म्हटलंय. तर अहिल्यानगरच्या मतदारांचे अंत:करणापासुन आभार. आम्ही जी आश्वासने दिली ती पूर्ण करणार आहोत, अशी प्रतिक्रिया आमदार संग्राम जगताप यांनी दिलीय.

जळगाव महापालिकेत भाजप 46, शिवसेना 22 आणि राष्ट्रवादी अजित पवार गटाचा 1 जागेवर विजय झाला आहे. प्रभाग क्रमांक 17 मधील ठाकरे गटाचे चारही उमेदवार तर प्रभाग सहामधील 1 असे शिवसेना ठाकरे गटाचे पाच उमेदवार विजयी झाले आहेत. एका जागेवर अपक्ष उमेदवाराचा विजय झाला आहे. जळगाव महापालिकेवर 69 जागांसह महायुतीचा झेंडा फडकला आहे.

नाशिक महानगरपालिकेत भाजपची एकहाती सत्ता आली आहे. भाजपने 62 चा जादुई आकडा गाठला आहे. आगामी कुंभमेळ्याच्या पार्श्वभूमीवर भाजपने नाशिक महापालिका निवडणूक प्रतिष्ठेची केली होती. शिंदेंचा शिवसेना पक्ष दोन नंबरचा ठरला आहे.

“जळगाव महापालिकेत विरोधकांना सपशेल नाकारलं आहे. जळगाव महापालिकेत 75 जागांपैकी 70 जागेवर महायुतीने यश संपादन केलं. विरोधक काम करत नाहीत, जातीयवादी राजकारण करतात. यामुळे विरोधकांना सर्वात मोठा फटका बसला आहे. तर मुंबईकरांनी ठाकरे बंधूंना नाकारलं आहे. ठाकरे मिया जोडीला मुंबईकरांनी घरी बसवलं आहे,” अशा शब्दांत भाजप आमदार मंगेश चव्हाण यांनी ठाकरे बंधूंवर जोरदार टीका केली आहे.

मालेगाव महानगरपालिकेत शिवसेना शिंदे गटाचे 18 उमेदवार विजयी झाले आहेत. विजय उमेदवारांचं श्रेय जनता जनार्दनाला जातं. धनुष्यबाणाला विजय केल्याबद्दल मी जनता आणि शिवसैनिकांचे आभार मानतो. मालेगावच्या विकासावर जनतेनं मतदान केलं आहे. दोन उमेदवार पराभूत झाल्याने गड आला पण सिंह गेला अशी परिस्थिती निर्माण झाली आहे. पाठिंब्याबाबत अद्याप विचार केला नाही. पदाधिकारी आणि वरिष्ठांशी चर्चा करून आम्ही पाठिंबासंदर्भात निर्णय घेऊ, अशी प्रतिक्रिया मंत्री दादा भुसे यांनी दिली.

नाशिक महानगरपालिकेच्या प्रभाग क्रमांक 23 चा निकाल समोर आला असून भाजपचे चारही उमेदवार विजयी ठरले आहेत. प्रभाग 23 अ मधून भाजपच्या रुपाली निकुळे, ब मधून भाजपच्या मंगला प्रकाश नन्नावरे, क मधून भाजपच्या संध्या अभिजीत कुलकर्णी आणि ड मधून भाजपचे चंद्रकांत कारभारी खोडे विजयी ठरले आहेत.

नाशिक महापालिकेच्या प्रभाग क्रमांक 14 मध्ये काँग्रेसचे 3 तर अजित पवार यांच्या राष्ट्रवादीच्या एका उमेदवाराचा विजय झाला. प्रभाग क्रमांक 14 मध्ये भाजपकडून उमेदवार न दिल्यामुळे काँग्रेस, राष्ट्रवादी अजित पवार पक्षाला फायदा झाला आहे. काँग्रेसचे नाझीया अत्तार ,सामीया खान, सुफी जीन आणि अजित पवार राष्ट्रवादीचे जागृती गांगुर्डे विजयी झाले आहेत.

एकूण जागा-74
भाजप-40
शिवसेना-3
राष्ट्रवादी-
ठाकरे-
काँग्रेस-0
मनसे-00
शरद पवार गट-00
एम आय एम -8
इतर-0

जळगाव महानगरपालिकेतील महायुतीच्या विजयानंतर मंत्री गुलाबराव पाटलांनी कार्यकर्त्यांसोबत जल्लोष केला. विजयी उमेदवारांसोबत मंत्री गुलाबराव पाटील यांनी डान्स केला. जळगाव महापालिकेवर महायुतीने दणदणीत विजय मिळवला आहे. गुलाबराव पाटलांनी विजयी उमेदवारांसोबत जल्लोष साजरा केला. त्याचबरोबर कार्यकर्त्यांसह ढोल ताशांच्या गजरावर ठेका धरला.

जळगाव महापालिकेत 75 पैकी 69 जागांवर महायुतीचे उमेदवार विजयी झाले आहेत. भाजप 46, शिवसेना 22 आणि राष्ट्रवादी अजित पवार गटाचा 1 जागेवर विजयी झाला आहे. प्रभाग क्रमांक 17 मधील ठाकरे गटाचे चारही उमेदवार तर प्रभाग सहा मधील 1 असे शिवसेना ठाकरे गटाचे पाच उमेदवार विजयी झाले आहेत. तर एका जागेवर अपक्ष उमेदवाराचा विजय आहे. जळगाव महापालिकेवर 69 जागांसह महायुतीचा झेंडा फडकला आहे.

“मुंबईसह संपूर्ण महाराष्ट्रात महायुतीचा बोलबाला आहे. काम आणि जनतेशी असलेला सक्रियपणा याला लोक स्वीकारतात. त्या पद्धतीचा कौल लोकांनी मुंबईत दिला. मराठी सर्वच आहेत, पण आमच्याकडे निवडून येणारा महापौर मराठी आणि हिंदूच होणार. मुंबईकरांनी ठाकरे बंधूंना नाकारल्याची बरीच कारणं आहेत. ती एका वाक्यात सांगता येणार नाहीत. विकास आणि सुविधा जे कोणी देत असतील त्याला लोक स्वीकारतात हे मुंबईने सिद्ध केलं. ठाकरे बंधूंच्या पराभवाचं कारण त्यांचा निष्क्रियपणा आहे. मतदान आलं की सक्रिय होऊन चालत नाही. 24 तास लोकांमध्ये राहावं लागतं. राजकारणात निष्क्रियपणा सोडावा लागतो. जो सक्रिय राहील तोच जीवनात चालत राहील. महाराष्ट्रात सर्वात जास्त महायुतीला स्ट्राईक देणारा जिल्हा जळगाव जिल्हा आहे. मी ठाकरे बंधूंना एवढाच सल्ला देईन की त्यांनी जमिनीवर राहून काम करावं,” अशी प्रतिक्रिया मंत्री गुलाबराव पाटील यांनी दिली.

भाजप- 25
राष्ट्रवादी (शरद पवार गट)-0
राष्ट्रवादी (अजित पवार गट)- 27
शिवसेना (शिंदे गट)- 10
शिवसेना(ठाकरे गट)-1
काँग्रेस-2
मनसे-0
इतर- 3 (बसपा 1 , MIM 2)

जळगावात मतमोजणीच्या ठिकाणी मोठा गोंधळ निर्माण झाला आहे. शिवसेना ठाकरे गटाचे उमेदवार कुलभूषण पाटील यांना पोलिसांकडून धक्काबुक्की झाल्याने कार्यकर्ते आक्रमक झाले आहेत. प्रभाग 10 ड मध्ये फेर मतमोजणीसाठी कुलभूषण पाटील यांच्याकडून आंदोलन सुरू होतं. पोलिसांनी बळाचा वापर करून कुलभूषण पाटील यांना मतमोजणीच्या ठिकाणाहून बाहेर काढलं. मतमोजणी सुरू असलेल्या खोलीच्या बाहेर आता कुलभूषण पाटील यांच्याकडून ठिय्या आंदोलन सुरू आहे. कुलभूषण पाटील यांना पोलीस उपाधीक्षक नितीन गनापुरे यांच्याकडून धक्काबुक्की करण्यात आली.

धुळे महानगरपालिकेत भाजपने सत्तेची मॅजिकल फिगर गाठली आहे. भाजपचे 36 उमेदवार विजयी झाले आहेत. बहुमताला लागणारा आकडा भाजपने पार केला आहे. शिवसेना, राष्ट्रवादी काँग्रेस पक्षाची युती या महापालिकेत फेल ठरली आहे. मुस्लिम भागामध्ये राष्ट्रवादी काँग्रेसऐवजी मतदारांची एमआयएमला पसंती मिळाली आहे.

नाशिक महानगरपालिरकेत भाजप नेते सुधाकर बडगुजर यांना मतदारांनी दुसरा दणका दिला आहे. पुत्र दीपक बडगुजर प्रभाग २९ मधून पराभूत झाले आहेत. भाजप बंडखोर उमेदवार मुकेश शहाणे मोठ्या फरकानं विजयी ठरले आहेत. दोन एबी फॉर्म दिल्यानं मुकेश शहाणे यांचा अर्ज बाद झाला होता. बडगुजर पिता पुत्रांनी ही निवडणूक प्रतिष्ठेची केली होती.

मंत्री गिरीश महाजन यांचे स्विह सहाय्यक अरविंद देशमुख विजय होताच जळगावात ट्रकभर गुलाल आणून जल्लोष साजरा करण्यात आला आहे. जळगाव महापालिकेवर महायुतीचं वर्चस्व सिद्ध होत असल्याने जळगावात जल्लोषाचं वातावरण आहे.

जळगावच्या प्रभाग क्रमांक १० ड मध्ये शिवसेना ठाकरे गटाचे उमेदवार कुलभूषण पाटील यांच्याकडून फेर मतमोजणीची मागणी करण्यात आली आहे. फेर मतमोजणीसाठी प्रशासन तयार नसल्यामुळे कुलभूषण पाटील यांच्यासह कार्यकर्त्यांनी गोंधळ घातला आहे. पोलीस अधिकारी आणि कुलभूषण पाटील यांच्यामध्ये बाचाबाची सुरू आहे. फेर मतमोजणीच्या मागणीसाठी ठाकरे गटाचे उमेदवार कुलभूषण पाटील यांनी मतमोजणीच्या ठिकाणी ठिय्या आंदोलन केलं आहे.

प्रभाग १० ड मध्ये भाजपच्या उमेदवार जाहीर पठाण यांचा विजय झाला आहे. २०० मतांचा फरक असल्याने ठाकरे गटाचे उमेदवार कुलभूषण पाटील यांनी फेर मतमोजणीची मागणी केली आहे. मतमोजणीच्या ठिकाणी गोंधळ होऊ नये म्हणून पोलिसांचा मोठा बंदोबस्त दाखल झाला आहे.

“अहिल्यानगर जिल्ह्याने हॅट्रीक पूर्ण केली आहे. विधानसभा नगरपालिका आणि आता महापालिकेत भाजप महायुतीला मोठं यश मिळालं आहे. पुन्हा एकदा भाजप एक नंबरचा पक्ष आहे हे अहिल्यानगरच्या मतदारांनी दाखवून दिलं आहे. दोन भाऊ एकत्र आल्याने निवडणुका जिंकता येत नाही. फडणवीसांच्या कामावर मतदारांनी विश्वास दाखवला आहे. आगामी जिल्हा परिषद, पंचायत समिती निवडणुकीत देखील भाजप एक नंबरचा पक्ष राहील,” अशी प्रतिक्रिया पालकमंत्री राधाकृष्ण विखे पाटील यांनी दिली.

अहिल्यानगर महापालिकेत भाजप-राष्ट्रवादी अजित पवार युतीला स्पष्ट बहुमत मिळत आहे. डॉ. सुजय विखे आणि आमदार संग्राम जगताप जोडीने बाजी मारली आहे. राधाकृष्ण विखे पाटलांच्या बंगल्यावर कार्यकर्त्यांची गर्दी जमली आहे. राधाकृष्ण विखे पाटीलही कार्यकर्त्यांसमवेत जल्लोषात सहभागी झाले आहेत.

भाजप – 02
शिवसेना – 18
इस्लाम – 19
सपा – 05
काँग्रेस – 01
एमआयएम – 04
इतर – 01

धुळ्यातील प्रभाग क्रमांक 17 मध्ये शिवसेना जायंट किलर ठरला आहे. भाजपाचा बालेकिल्ला असलेल्या प्रभागामध्ये शिवसेना शिंदे गटाचे दोन्ही उमेदवार विजयी ठरले आहेत. या प्रभागामध्ये भाजपाचे दोन उमेदवार आधीच बिनविरोध निवडून आले होते. मात्र मतदानामध्ये शिवसेनेनं बाजी मारली आहे. दिग्गज समजल्या जाणाऱ्या भाजपाच्या शीतल नवले यांचा नवख्या धीरज कलंत्री या शिवसेनेच्या उमेदवाराने पराभव केला.

जळगावच्या प्रभाग क्रमांक 1 मध्ये अपक्ष उमेदवार भारती सोनवणे विजयी झाल्या आहेत. जळगावच्या महापालिका निवडणुकीमध्ये अपक्ष उमेदवाराने अखेर खातं उघडलं आहे. अपक्ष उमेदवाराचा विजय झाला असून शिवसेना शिंदे गटाचा पराभव झाला आहे. शिवसेना शिंदे गटाचे उमेदवार फरदीन खान यांचा पराभव झाला आहे. जळगावात राष्ट्रवादी शरद पवार गट आणि शिवसेना ठाकरे गट यांच्या उमेदवारांनी अद्यापही खातं उघडलेलं नाही.

जळगाव महानगपालिकेत प्रभाग क्रमांक 15 मधील भाजपचे तीन आणि शिवसेनेचा एक उमेदवार विजयी झाला आहे. भाजपचे उमेदवार अरविंद देशमुख, कलाबाई शिरसाळे, प्रकाश बालानी तर शिवसेनेच्या रेश्मा काळे विजयी ठरल्या आहेत. भाजपचे गिरीश महाजन यांचे स्वीय सहाय्यक अरविंद देशमुख यांचा पहिलाच निवडणुकीमध्ये विजय झाला आहे.

नाशिक महानगरपालिकेत भाजपच्या सुधाकर बडगुजर यांना मोठा धक्का बसला आहे. स्वतःच्या घरात भाजपचे चार तिकीटं घेणाऱ्या बडगुजर यांना मोठा धक्का बसला आहे. प्रभाग २५ चा निकाल समोर असून ४ पैकी २ जागांवर भाजप तर एका जागेवर शिंदेंची शिवसेना आणि एका जागेवर ठाकरेंच्या शिवसेनेचा उमेदवार विजयी ठरला आहे.

प्रभाग क्रमांक २५ मध्ये भाजपचे सुधाकर बडगुजर आणि भाजपच्या साधना मटाले विजयी ठरल्या आहेत. तर इतर २ जागांवर शिंदेंच्या सेनेच्या कविता नाईक विजयी आणि ठाकरेंच्या शिवसेनेचे मुरलीधर भांबरे विजयी झाले आहेत. भाजपने पुरस्कृत केलेले भाग्यश्री ढोमसे आणि प्रकाश अमृतकर पराभूत झाले आहेत.

एकूण जागा-75

भाजप- 27
शिवसेना- 15
राष्ट्रवादी-2
ठाकरे-00
काँग्रेस-00
मनसे-00
शरद पवार गट-00
एमआयएम – 00
इतर-

अहिल्यानगर महापालिकेत एकूण 68 जागा असून त्यात 15 जागांवर भाजप आघाडीवर आहे.

एकूण जागा-68
भाजप-15
शिवसेना-08
राष्ट्रवादी-20
ठाकरे-01
काँग्रेस-01
मनसे-00
शरद पवार गट-00
एमआयएम – 03
इतर-00

नाशिक महानगरपालिकेचा पहिला निकाल समोर आला आहे. नाशिक महानगरपालिकेच्या प्रभाग क्रमांक 16 चा निकाल लागला आहे. शिवसेनेचे (शिंदे गट) चारही उमेदवार विजयी झाले आहेत. शिवसेना (शिंदे) पक्षाचे राहुल अशोक दिवे, आशा रफिक तडवी, पूजा प्रवीण नवले, ज्योती अनिल जोंधळे अशी विजयी उमेदवारांची नावं आहेत.

जळगाव महानगरपालिकेत कारागृहातून निवडणूक लढवणारे शिवसेना शिंदे गटाचे उमेदवार ललित कोल्हे विजयी ठरले आहेत. शिवसेना शिंदे गटाचे माजी महापौर असलेले ललित कोल्हे यांनी कारागृहातून निवडणूक लढवली होती. बोगस कॉल सेंटर प्रकरणांमध्ये ललित कोल्हे यांना अटक झाली असून ते नाशिक कारागृहात आहेत. महापालिका निवडणुकीमध्ये ललित कोल्हे यांच्याबरोबरच त्यांचे चिरंजीव पियुष कोल्हे हे देखील विजय झाले आहेत. महापालिका निवडणुकीमध्ये कोल्हे कुटुंबातील पिता पुत्राचा विजय झाला आहे.

जळगाव महापालिकेत आतापर्यंतच्या फेऱ्यांमध्ये निकालानंतर महायुतीचाच बोलबाला पहायला मिळतोय. महायुतीमध्ये भाजपचा 21, शिवसेना शिंदे गट 12 जागांवर तर राष्ट्रवादी अजित पवार गटाचा एका जागेवर विजय झाला आहे. महाविकास आघाडीने अद्यापही खातं उघडलं नाही. बंडखोरी करणाऱ्या अपक्ष उमेदवारांना देखील धक्का बसला आहे.

अहिल्यानगर महानगरपालिकेत 16 जागांवर राष्ट्रवादी काँग्रेसचे उमेदवार विजयी ठरले आहेत.
एकूण जागा-68
भाजप-12
शिवसेना-06
राष्ट्रवादी-16
ठाकरे-01
काँग्रेस-00
मनसे-00
शरद पवार गट-00
एमआयएम – 00
इतर-00

जळगाव प्रभाग क्रमांक 4 मधून शिवसेना शिंदे गटाचे पियुष कोल्हे विजयी झाले आहेत. मुलगा पियुष कोल्हे यांच्या विजयानंतर आई शिवसेना शिंदे गटाच्या महिला जिल्हा आघाडीच्या अध्यक्षा सरिता माळी यांच्या डोळ्यात आनंदाश्रू तरळले.  कारागृहातून निवडणूक लढवणारे माजी महापौर ललित कोल्हे यांचे चिरंजीव पियुष कोल्हे विजयी झाले आहेत.

नाशिक महानगरपालिकेतील प्रभाग क्रमांक 13 च्या तिसऱ्या फेरीत शिवसेनेचे गणेश मोरे आघाडीवर असून भाजपचे शाहू खैरे पिछाडीवर आहेत. मनसेच्या मयुरी पवार 900 मतांनी आघाडीवर आहेत. तर शिंदेंच्या सेनेच्या सुवर्णा मोरे, भाजपचे हितेश वाघ पिछाडीवर आहेत. भाजपच्या आदिती पांडे पिछाडीवर असून काँग्रेसच्या वत्सला खैरे आघाडीवर आहेत.

जळगाव महानगरपालिका निवडणुकीत महायुती 18 जागांनी आघाडीवर आहे. भाजपचे 10, शिवसेनेचे 8, राष्ट्रवादी अजित पवार गटाचा 1 असे महायुतीचे एकूण 18 उमेदवार विजयी झाले आहेत. जळगाव महापालिकेत एकूण 19 प्रभाग असून त्यासाठी 63 जागांवर 321 उमेदवार निवडणुकीच्या रिंगणात होते.

धुळे महानगरपालिकेतील प्रभाग क्रमांक 5 मध्ये भाजपचे सर्व उमेदवार विजयी झाले आहेत. नागसेन बोरसे, प्रतिभा चौधरी, संध्या कदम आणि कृपेश नांद्रे विजयी ठरले आहेत. धुळे महानगरपालिकेमध्ये एकूण 74 प्रभाग असून प्रत्येक प्रभागातून एक नगरसेवक निवडून दिला जातो.

जळगाव महानगरपालिकेत राष्ट्रवादी अजित पवार गटाचे माजी मंत्री गुलाबराव देवकर यांचे चिरंजीव प्रफुल्ल देवकर यांनी पहिल्याच निवडणुकीत बाजी मारली आहे. भाजपचे बंडखोर अपक्ष उमेदवार जितेंद्र मराठे यांचा त्यांनी पराभव केला आहे.

मालेगाव महापालिकेतील प्रभाग क्रमांक 18 मध्ये एमआयएमच्या उमेदवार अल्कमा अब्दुल करीम आघाडीवर आहेत. तर प्रभाग क्रमांक 20 मध्ये इस्लाम पार्टीच्या मेहमूदा बानो आघाडीवर आहेत.

नाशिक महानगरपालिकेतील प्रभाग क्रमांक 13 मध्ये शिंदेंच्या शिवसेनेचे गणेश मोरे दुसऱ्या फेरीनंतरही आघाडीवर असून भाजपचे शाहू खैरे 374 मतांनी पिछाडीवर आहेत. भाजपच्या अदिती पांडे दुसऱ्या फेरीनंतर आघाडीवर असून रश्मी भोसले पिछाडीवर आहेत. मनसेच्या मयुरी पवार 500 मतांनी दुसऱ्या फेरीत आघाडीवर आहेत. तर भाजपचे हितेश वाघ 300 मतांनी आघाडीवर असून शिवसेनेच्या सुवर्णा मोरे पिछाडीवर आहेत.

मालेगाव महापालिकेत प्रभाग क्रमांक 18 अ मध्ये पहिल्या फेरीत काँग्रेसचे एजाज बेग, प्रभाग क्रमांक 18 ब मधून एमआयएमच्या नसरीन बानो, प्रभाग क्रमांक 18 क मधून MIM च्या अलकमा कौसर आणि प्रभाग क्रमांक 18 ड मधून एमआयएमचेच शेख सिकंदर आघाडीवर आहेत. तर प्रभाग क्रमांक 10 मध्ये भाजपचे सुनील गायकवाड तिसऱ्या फेरी अखेर 461 मतांनी पुढे आहेत. प्रभाग क्रमांक 21 मध्ये एमआयएमचे उत्तर महाराष्ट्र अध्यक्ष खालिद परवेज यांना धक्का बसला आहे. ते 500 मतांनी पिछाडीवर आहेत. तर इस्लाम पार्टीचे मुशर्रफ रांगडी यांनी आघाडी घेतली आहे.

जळगाव महानगरपालिकेमध्ये शिवसेना शिंदे गटानेदेखील खातं उघडलं आहे. प्रभाग क्रमांक 18 मधील शिवसेनेचे दोन्ही उमेदवार विजयी ठरले आहेत. प्रभाग क्रमांत 18 मधील नलबाई सोनवणे आणि अनिता बापसे हे शिवसेनेचे दोन्ही उमेदवार विजयी झाले आहेत. तर प्रभाग क्रमांक 19 मध्ये भाजपचे राजेंद्र घुगे विजय ठरले आहेत.

नाशिक महानगरपालिकेतील प्रभाग क्रमांक 15 ची मतमोजणी थांबवण्यात आली आहे. मशीनमध्ये मतदानाची वेळ साडेपाच वाजतानाची असताना पाच वाजून 21 मिनिटांनी मशीन बंद झाल्याचं आढळून आलं. त्यामुळे मतमोजणी थांबवून निवडणूक निर्णय अधिकारी यावर माहिती घेत आहे.

मालेगाव महानगरपालिकेतील प्रभाग क्रमांक 11 मधील भाजपाचे उमेदवार पमुदादा पाटील आघाडीवर आहेत. शिवसेनेच्या आशाबाई अहिरे, शिवसेनेच्या प्राची पवार, भाजपचे दीपक गायकवाड हेसुद्धा आघाडीवर आहेत. शिवसेना आणि भाजपमध्ये कांटे की टक्कर सुरू आहे. तर प्रभाग क्रमांक 7 मध्ये पहिल्या फेरीत इस्लाम पक्ष आणि MIM यांच्यात चुरस रंगली आहे. प्रभाग क्रमांक 7 मध्ये पहिल्या फेरीत MIM पक्ष आघाडीवर असून प्रभाग 6 मध्ये इस्लाम पक्षाने आघाडी घेतली आहे.

जळगावमध्ये भाजपने खातं उघडलं असून प्रभाग क्रमांक 19 मध्ये राजेंद्र घुगे विजय ठरले आहेत. जळगावातील एकूण 75 जागांपैकी 12 जागा बिनविरोध आल्या आहेत. त्यामुळे 19 प्रभागांमधील एकूण 63 जागांसाठी 321 उमेदवार निवडणूक रिंगणात आहेत.

धुळे महानगरपालिका निवडणुकीमध्ये बिनविरोध झालेल्या चार उमेदवारांची निवडणूक आयोगाच्या वतीने अधिकृतरित्या घोषणा करण्यात आली आहे. प्रभाक क्रमांक 1 अ मधून उज्वला रणजित भोसले, प्रभाग क्रमांक 6 ब मधून ज्योत्सना प्रफुल्ल पाटील, प्रभाग क्रमांक 17 अ मधून अमोल मासुळे आणि प्रभाग क्रमांक 17 ब मधून सुरेखा रावसाहेब उगले बिनविरोध निवडून आले आहेत.

नाशिक महानगरपालिकेतील प्रभाग क्रमांक 7 मध्ये भाजपच्या हिमगौरी आडके आघाडीवर आहेत. तर प्रभाग क्रमांक 23 मधून भाजपच्या संध्या कुलकर्णी आघाडीवर आहेत. नाशिकच्या प्रभाग 1 मध्ये भाजपाच्या दीपाली गीते टपाली मतदानात आघाडीवर आहेत. प्रभाग क्रमांक 13 मध्ये शिंदेंच्या शिवसेनेच्या रश्मी भोसले आघाडीवर आहेत.

जळगावात जेलमधून निवडणूक लढवणारे एकनाथ शिंदेंचे उमेदवार आघाडीवर आहेत. माजी महापौर ललित कोल्हे 228 मतांनी पुढे आहेत.

नाशिक महानगरपालिकेतील प्रभाग क्रमांक 3 मधून राष्ट्रवादी काँग्रेसचे अंबादास खैरे आघाडीवर आहेत.

धुळे महानगरपालिका निवडणुकीसाठी पहिल्या टप्प्यातील मतमोजणीला सुरुवात झाली आहे. धुळे महापालिका निवडणुकीत भाजप चार जागांवर आघाडीवर आहे.

नाशिक महानगरपालिकेत भाजपचे दोन बंडखोर आघाडीवर आहेत. मुकेश शहाणे आणि शशिकांत जाधव आघाडीवर आहेत.

जळगाव महानगरपालिकेत भाजपचे सुनिल महाजन आणि जयश्री महाजन आघाडीवर आहेत.

अहिल्यानगर महापालिका निवडणुकीत प्रभाग क्रमांक 17 मध्ये पोस्टल मतांच्या मोजणीला सुरुवात झाली आहे. यामध्ये भाजप आणि राष्ट्रवादी अजित पवार गटाचे उमेदवार आघाडीवर आहेत.

नाशिक महानगरपालिकेतील प्रभाग क्रमांक 11 मधून दिशा लोंढे आघाडीवर आहेत. तर प्रभाग क्रमांक 16 मध्ये शिवसेनेचे राहुल दिवे आघाडीवर आहेत.

नाशिक महानगरपालिकेच्या प्रभाग क्रमांक 8 मधून शिंदेंच्या शिवसेनेचे विलास शिंदे टपाली मतदानात आघाडीवर आहेत. तर प्रभाग क्रमांक 9 मधून टपाली मतदानात दिनकर पाटील – अमोल पाटील हे पिता पुत्र आघाडीवर आहेत.

नाशिक महानगरपालिकेच्या प्रभाग क्रमांर 25 मध्ये टपाली मतदानात भाजपचे सुधाकर बडगुजर आघाडीवर आहेत.

नाशिक महानगरपालिकेत प्रभाग क्रमांक 29 मधून टपाली मतदानात अपक्ष उमेदवार मुकेश शहाणे आघाडीवर आहेत.

धुळे महापालिकेच्या एकूण 74 जागा असून त्यापैकी चार जागा आधीच बिनविरोध निवडून आल्या आहेत. तर 70 जागांसाठी 316 उमेदवार निवडणुकीच्या रिंगणात होते. वखार महामंडळाच्या गोदामातील सहा कक्षात एकाच वेळी मतमोजणी प्रक्रिया सुरू होणार आहे.

सर्वप्रथम टपाली मतांची मोजणी होणार असून एकूण 10 ते 14 मतगणनेच्या फेऱ्या होणार आहेत. पहिल्या टप्प्यात प्रभाग क्रमांक 1, 5, 8, 3, 14, 17 आणि त्यानंतर प्रभाग क्रमांक 2, 6, 12, 9, 15, 18 आणि अखेरच्या टप्प्यात 4, 7, 13, 10, 11, 16, 19 ची मतमोजणी होणार आहे. तीन टप्प्यात होणार मतमोजणीची प्रक्रिया पूर्ण होणार आहे.

नाशिकच्या प्रबोधनकार ठाकरे सभागृहातील मतमोजणी केंद्रात टपाली मतमोजणीला सुरुवात झाली आहे. प्रभाग क्रमांत 25, 26 आणि 28 या तीन प्रभागांची मतमोजणी केली जात आहे. प्रभाग क्रमांक 25 चे भाजप उमेदवार सुधाकर बडगुजरदेखील मतमोजणी केंद्रात उपस्थित आहेत.

धुळे महानगरपालिका निवडणुकीसाठी मतदान झालेलं स्ट्रॉंग रूप उघडण्यात आलं आहे. ईव्हीएम मजमोजणीला सुरुवात झाली आहे. एकाच वेळी सहा ठिकाणी प्रभाग निहाय मतमोजणी होणार आहे. तीन टप्प्यांत ही मतमोजणी होणार आहे.

नाशिकच्या प्रभाग क्रमांक 13 मध्ये कम्युनिस्ट पक्षाचे उमेदवार आणि पोलिसांमध्ये बाचाबाची झाली. तल्लाह शेख हे प्रभाग क्रमांक 13 मधून उमेदवार आहेत.

नाशिकमध्ये थोड्याच वेळात मतमोजणीला सुरुवात होणार आहे. टपाली मतांच्या मोजणीनंतर ईव्हीएममधील मतमोजणी होणार आहे. नाशकात 31 प्रभागांतील 122 जागांचा निकाल लागणार आहे. नाशिकमधील तासाभरात पहिला मतमोजणीचा कल हाती येणार आहे.

धुळे महानगरपालिका निवडणुकीच्या पार्श्वभूमीवर आज मतमोजणी सुरुवात होईल. धुळे महानगरपालिकेसाठी 74 जागांसाठी निवडणूक पार पडली. धुळे कृषी उत्पन्न बाजार समितीमध्ये मतमोजणी होणार आहे. मतमोजणीसाठी उमेदवारांच्या प्रतिनिधींना सोडण्यास सुरुवात झाली आहे.

नाशिकमधल्या प्रबोधनकार ठाकरे इथल्या मतमोजणी केंद्रावर उमेदवार प्रतिनिधी आणि पोलिसांमध्ये बाचाबाची झाली. महापालिकेकडून ओळखपत्र दिलेलं असतानाही आधार कार्ड आणि ओरिजनल ओळखपत्राची मागणी केल्यामुळे ही बाचाबाची झाली. मतमोजणी केंद्रात उमेदवार प्रतिनिधींना आत प्रवेश देताना तपासणी करण्यात आली. तपासणीदरम्यान पोलिस आणि उमेदवार प्रतिनिधींमध्ये बाचाबाची झाली.

काही वेळातच मालेगाव महापालिका निवडणुकीच्या मतमोजणीला सुरुवात होणार आहे. मतमोजणी केंद्रावर उमेदवारांसह प्रतिनिधींची गर्दी होऊ लागली आहे. निवडणूक यंत्रणा मतमोजणीसाठी सज्ज झाली आहे. मालेगावात 84 जागांसाठी मतमोजणी होणार आहे. यासाठी मतमोजणी केंद्रावर येणाऱ्यांची तपासणी करूनच केंद्रात प्रवेश दिला जात आहे.

नाशिकच्या वंदे मातरम सभागृहात प्रभाग क्रमांक 13, 14 आणि 15 ची मतमोजणी पार पडणार आहे. एकूण बारा फेऱ्या होणार असून 12 टेबलवर मतमोजणी होणार आहे. प्रशासकीय यंत्रणा मतमोजणीसाठी सज्ज असून अनुचित प्रकार घडू नये यासाठी देखील विशेष खबरदारी घेतली जात आहे. टपाली मतमोजणी झाल्यानंतर मतदान यंत्राच्या मोजणीला सुरुवात होणार आहे.

नाशिक महानगरपालिकेसाठी आज मतमोजणी होणार आहे. नाशिकच्या डीजीपी नगर इथल्या वंदे मातरम सभागृह या ठिकाणी प्रभाग क्रमांक 13, 14 आणि 15 यासाठी थोड्याच वेळात मतमोजणी होणार आहे. नाशिकमधल्या सर्वाधिक चर्चेत आणि प्रतिष्ठेच्या लढतींपैकी प्रभाग क्रमांक 13 ची महत्वाची लढत मानली जात आहे.

भाजपमध्ये ऐनवेळी प्रवेश केलेले शाहू खैरे, विनायक पांडे यांच्या सून आणि बबलू शेलार असे मातब्बर उमेदवार निवडणुकीच्या रिंगणात आहेत. तर ज्यांना भाजपकडून उमेदवारी नाकारलेली होती हे सर्व शिवसेना शिंदे पक्षाकडून निवडणूक लढवत आहे. मतमोजणीच्यादरम्यान कोणताही अनुचित प्रकार घडू नये यासाठी नाशिक पोलिसांचा मोठा बंदोबस्त मतमोजणी केंद्राच्या बाहेर आहे.

जळगाव महापालिकेतील 75 पैकी बारा जागा बिनविरोध झाल्यामुळे 63 जागांसाठी मतदानाची प्रक्रिया पार पडली. एमआयडीसीमधील वखार महामंडळाच्या गोदामामध्ये सकाळी दहा वाजता मतमोजणीला सुरुवात होणार असून मतमोजणीची संपूर्ण तयारी पूर्ण झालेली आहे. दुपारी दोन वाजेपर्यंत संपूर्ण निकाल हातात येतील असा अंदाज प्रशासनाने व्यक्त केला आहे.

भाजपच्या सहा आणि शिवसेनेच्या सहा अशा एकूण 12 जागा बिनविरोध झाल्यामुळे 63 जागांसाठी निवडणूक पार पडली. 63 जागांसाठी 321 उमेदवार रिंगणात होते. यात अपक्ष उमेदवारांची संख्या देखील मोठी असल्याचं पाहायला मिळालं. आधीच महायुतीच्या 12 जागा बिनविरोध झाल्यामुळे निकालामध्ये भाजप आणि शिवसेनेने आधीच आघाडी घेतली आहे.

मंत्री गिरीश महाजन, मंत्री गुलाबराव पाटील यांबरोबरच माजी मंत्री गुलाबराव देवकर यांच्यासह महायुतीच्या आमदारांची प्रतिष्ठा पणाला लागली आहे. निकालामध्ये महायुतीचा गुलाल उडतो की महाविकास आघाडी बाजी मारते याकडे राजकीय पक्षांसह जळगावकरांचं लक्ष लागून आहे.

जळगाव महापालिका मतमोजणीनिमित्त पोलिसांचा तगडा बंदोबस्त तैनात करण्यात आला आहे. उमेदवारांची पोलिसांकडून कसून चौकशी होत आहे. उत्तर महाराष्ट्रातील महत्त्वाची मानल्या जाणारी ही महानगपालिका आहे. दिग्गजांची प्रतिष्ठा या ठिकाणी पणाला लागली आहे.

धुळे महानगरपालिकेच्या एकूण 74 जागा असून त्यापैकी चार जागा आधीच भाजपने बिनविरोध जिंकल्या आहेत. तर 70 जागांसाठी 316 उमेदवार निवडणुकीच्या रिंगणात होते. धुळे कृषी उत्पन्न बाजार समितीत मतमोजणी होणार आहे. वखार महामंडळाच्या गोदामात सकाळी दहा वाजल्यापासून मतमोजणीला सुरुवात होणार आहे.

सहा कक्षात एकाच वेळी मतमोजणी प्रक्रिया सुरु होणार असून सर्वप्रथम टपाली मतांची मतमोजणी केली जाणार आहे. एकूण दहा ते चौदा मतगणनेच्या फेऱ्या होतील. तीन टप्प्यात मतमोजणीची प्रक्रिया पूर्ण होणार आहे.

धुळे महानगपालिका निवडणुकीत भाजपचे चार उमेदवार बिनविरोध निवडून आले आहेत. प्रभाक क्रमांक 1 अ मधून उज्वला रणजित भोसले, प्रभाग क्रमांक 6 ब मधून ज्योत्सना प्रफुल्ल पाटील, प्रभाग क्रमांक 17 अ मधून अमोल मासुळे आणि प्रभाग क्रमांक 17 ब मधून सुरेखा रावसाहेब उगले बिनविरोध निवडून आले आहेत.

शरद पवारांच्या राष्ट्रवादीचे नाशिक शहराध्यक्ष गजानन शेलार यांनी राजीनामा दिला आहे. गजानन शेलारांची पक्षातून हकालपट्टी होणार असल्याची चर्चा होती. निवडणूक काळात पक्षाच्या बड्या नेत्यांनी नाशकात सभा न घेतल्याचा शेलारांचा आरोप होता. तर शेलारांच्या निवडणूक काळातील कामगिरीवर पक्षाचे वरीष्ठ नेतेही नाराज होते.

“मालेगावातील 24 पैकी 24 उमेदवार शिवसेनेच्या धनुष्यबाणाने निवडून येतील. महायुतीचा भगवा नाशिक महापालिकेत डौलाने फडकेल. एकनाथ शिंदे यांच्याविषयी संपूर्ण महाराष्ट्रात आत्मियता आहे. मालेगावात राजकीय आणि सामाजिक परिस्थिती वेगळी आहे,” अशी प्रतिक्रिया मंत्री दादा भुसे यांनी दिली आहे.

धुळे महानगपालिका निवडणुकीच्या निकालात मतदारांचा कौल कोणाच्या बाजूने जातो, हे पाहणं महत्त्वाचं ठरणार आहे. या निवडणुकीत एकूण 74 पैकी चार जागांवर भाजपचे उमेदवार बिनविरोध निवडून आले आहेत. त्यामुळे 70 जागांवर मतमोजणी होणार आहे.

जळगाव महापालिकेसाठी 53.60% मतदान झालं आहे. या महापालिकेतील 75 जागांसाठीच्या निवडणुकीत महायुतीच्या 12 उमेदवारांची बिनविरोध निवड निश्चित झाली होती. त्यामुळे आता उर्वरित 63 जागांसाठी उमेदवारांचं भवितव्य ठरणार आहे.

शिरीष चौधरी आणि त्यांच्या कार्यकर्त्यांच्या नंदुरबार इथल्या हाणामारी तसंच दाखल गुन्ह्यावरून आमदार अनिल पाटील यांनी निशाणा साधत तीव्र शब्दात टीका केली आहे. नंदुरबार इथं शिरीष चौधरी यांच्याविरुद्ध दाखल गुन्हेसंदर्भात मुख्यमंत्री, उपमुख्यमंत्री, पोलीस महानिरीक्षक यांची भेट घेणार असल्याचं अनिल पाटील म्हणाले. इतकंच नव्हे तर गुंडगिरीची सखोल चौकशी करण्याची मागणी करणार असून विधानसभेत आवाज उठवणार असल्याचंही ते म्हणाले.

जळगावच्या अमळनेर इथल्या शिवसेना शिंदे गटाचे माजी आमदार शिरीष चौधरी यांच्यावर अजित पवारांच्या राष्ट्रवादीचे आमदार अनिल पाटील यांनी खोचक टीका केली आहे. शिरीष चौधरी हे दहशतीचं राजकारण करत असून नंदुरबार आणि अमळनेरमधल्या जनतेसाठी घातक असल्याची टीका आमदार अनिल पाटील यांनी केली आहे. गुंड प्रवृत्तीला नेतृत्व देऊन अमळनेरचं नुकसान करू नका, असं आवाहन जनतेला करत जनता तुम्हाला माफ करणार नाही असा सूचक इशारा अनिल पाटील यांनी शिरीष चौधरींना दिला आहे.

नाशिक महापालिकेसाठी गुरुवारी मतदान झाल्यानंतर आज मतमोजणी होणार आहे. एकूण 122 जगासाठी 155 टेबलवर मतमोजणीची प्रक्रिया होणार आहे. एका प्रभागासाठी तीन टेबलवर मतमोजणी होणार आहे. संपूर्ण मतमोजणीसाठी 465 कर्मचारी नियुक्त असतील. साधारणपणे दुपारपर्यंत चित्र स्पष्ट होण्याची शक्यता आहे. तर 2398 पोलीस कर्मचारी वेगवेगळ्या मतमोजणी केंद्रावर बंदोबस्तासाठी तैनात असतील.

गेल्या वेळेच्या तुलनेत नाशिकमध्ये यंदा पाच टक्क्यांनी मतदानाची टक्केवारी कमी झाली. नाशिक महापालिका निवडणुकीत यंदा 56.67 टक्के मतदान झालं. 2017 मध्ये 61.60 टक्के मतदान झालं होतं. घटलेल्या मतदानाचा फटका कोणाला बसणार हे पाहणं महत्त्वाचं ठरणार आहे.

जळगाव महापालिकेत अत्यंत सुरळीतपणे मतदान प्रक्रिया पार पडली असून कुठलाही अनुचित प्रकार घडलेला नाही. जळगावमध्ये जी गोळीबाराची घटना घडलेली आहे, या घटनेशी कुठलाही मतदान निवडणूक प्रक्रियेशी संबंध नाही. ही घटना वैयक्तिक वादातून घडली आहे. या घटनेत कोणीही जखमी झालं नसून सध्या चौकशी सुरू असल्याचं अप्पर पोलीस अधीक्षक अशोक नखाते यांनी सांगितलं.

जळगाव शहरातील प्रभाग 1 मधील गेंदालाल मिल परिसरातील मतदान केंद्रावर दोन महिलांवर मतदानापासून वंचित राहण्याची वेळ आली. महिलांची नावं असूनही, मतदानाच्या वेळेत मतदान केंद्रावर प्रवेश करूनही, तसंच अडीच तास रांगेत उभं राहूनही दोन्ही महिला मतदानापासून वंचित राहिल्या आहेत.

महिलांना 18 व्या क्रमांकाच्या बूथचं टोकन दिलं, मात्र मतदान 15 क्रमांकाच्या बूथमध्ये होतं. तिथे गेल्यावर मतदान प्रक्रिया संपली होती. टोकन देण्यात घोळ झाल्याने मतदानाचा हक्क न बजावता आल्याचं सांगत दोन्ही महिलांनी नाराजी व्यक्त केली आहे.

2017 मध्ये नाशिक महानगरपालिकेच्या 31 वॉर्डमधील 122 जागांसाठी निवडणूक पार पडली होती. त्या निवडणुकीत भाजपाने 64 जागांसह विजयी बहुमत प्राप्त केलं होतं. तर 32 जागांसह दुसऱ्या क्रमांकावर शिवसेना पक्ष राहिला होता.

नाशिक महानगरपालिकेच्या निकालाकडे सर्वांचं लक्ष लागून आहे. त्याआधी गुरुवारी संध्याकाळी एक्झिट पोलचे अंदाज समोर आले. नाशिकमध्ये एकनाथ शिंदेंची शिवसेना सर्वात मोठा पक्ष ठरणार असल्याचा अंदाज आहे.

धुळे महापालिका निवडणुकीदरम्यान प्रभाग क्रमांक 18 मधील मिरच्या मारुती प्राथमिक विद्यामंदिरातील मतदान केंद्रातील खोली क्रमांक एकमध्ये असलेल्या मतदान यंत्राची मोडतोड करण्यात आली. या घटनेनंतर संबंधित मतदान केंद्रावरील मतदान काही काळासाठी थांबवण्यात आलं होतं.

राज्यातील २९ महापालिकांसाठी गुरुवारी सरासरी ६०% मतदान झालं. जवळपास आठ ते दहा वर्षानंतर होणाऱ्या महापालिकांच्या निवडणुकांमुळे अनेक ठिकाणी मतदानात उत्साह दिसून आला.