मंचुरियनमध्ये आढळली पाल, तरुणीची तब्येत बिघडली..

उल्हासनगरात एक भयंकर घटना घडली आहे. एका चायनीज दुकानातून आणलेले चायनीज मंच्युरियन खात असताना एका तरुणीला त्यात चक्क पालीचे मेलेले पिल्लु आढळल्याची विचित्र प्रकार घडला आहे. यामुळे या तरुणीला उलट्या आणि मळमळ झाल्याची तिची तब्येत बिघडल्याने तिला रुग्णालयात दाखल करण्यात आले आहे. या दुकानादारावर कारवाई करण्याची मागणी होत आहे.

उल्हासनगरच्या सुभाष टेकडी परिसरात मोना पठारे ही तरुणी तिच्या कुटुंबासह रहाते. सायंकाळच्या सुमारास तिने सुभाष टेकडी मच्छी मार्केट परिसरातील मोरे चायनीज भेळ वाल्याकडून मंच्युरियन घरी आणले होते. हे मंचुरियन खात असतानाच तिने चटणी घेतली तर त्यात पालीचं मेलेलं पिल्लू असल्याचं तिला आढळले. त्यामुळे तिने मंच्युरियन वाल्याला जाऊन सांगितले. त्यावेळी या मंच्युरियन वाल्याने ही चटणी टेस्टिंगसाठी पाठवतो, पण तू ही गोष्ट कोणाला सांगू नको असे तिला समजावले. यानंतर रात्री या तरुणीची तब्येत बिघडल्याने तिला रुग्णालयात दाखल करण्यात आले. सध्या या तरुणीवर रुग्णालयात उपचार सुरू असून अशाप्रकारे निष्काळजीपणा करून ग्राहकांच्या जीवाशी खेळणाऱ्या चायनीज भेळ आणि मंचुरियन विक्रेत्यांवर कारवाई करण्याची मागणी होत आहे.

खाद्यपदार्थातील अस्वच्छता

मुंबईत मागे ऑनलाईन मागवलेल्या आईस्क्रीममध्ये मानवी बोटाचा तुकडा आढळला होता. तर काही महिन्यापूर्वी अन्नपदार्था मेलेला उंदीर सापडल्याची घटना घडली होती. रेल्वे प्रवासात देत असलेल्या अन्नपदार्थात अनेकदा अळ्या सापडल्याच्या घटना घडल्या आहे. त्यामुळे खाद्यपदार्थांच्या भेसळीचा मुद्दा आणि त्यावरील कारवाई एकीकडे गाजत असताना आता रस्त्याच्या कडेला असलेल्या फेरीवाल्यांकडून नियमांची कशी मोडतोड करीत नागरिकांच्या आयुष्याशी कसे खेळले जात आहे याची उदाहरणे दर काही दिवसांनी उघड होत आहेत.