बोटाला शाई दाखवा, मोफत कटींग करा, मतदानाचा टक्का वाढवण्यासाठी केशकर्तनालयचा पुढाकार

लोकसभा निवडणुकीचा पहिला टप्पा पार पडला. महाराष्ट्रात पहिल्या टप्प्यात मतदानाचा टक्का कमी राहिला. आता २६ एप्रिल रोजी दुसऱ्या टप्प्याचे मतदान सुरु आहे. मतदारांनी मतदानाचा हक्क बजवावा, मतदानाची टक्केवारी वाढवावी, यासाठी निवडणूक आयोगाकडून जनजागृती सुरु असते. सामाजिक संस्थाही आपली जबाबदारी पार पाडत असतात. त्यानंतरही अनेक जण मतदान करण्याऐवजी सरकारी सुट्टीचा उपभोग घेत घरीच थांबतात. यामुळे मतदानाचा टक्का वाढत नाही. आता मतदानाचा टक्का वाढवण्यासाठी सर्वसामान्य लोकांनी आपला खारीचा वाटा उचलला आहे. बोटाला शाई दाखवा, मोफत कटींग करा, असा फंडा अकोल्यातील केशकर्तनालयच्या एका संचालकाने सुरु केला आहे.

सलून दुकानात गर्दी

अकोला शहराच्या रामदास पेठ येथे अनंत कौलकार यांचे हेअर सलूनचे दुकान आहे. त्यांच्या हेअर सलूनमध्ये मतदार जनजागृती अभियान राबवले गेले आहे. “मतदार राजा जागा हो, लोकशाहीचा धागा हो…” हे स्लोगन लावले गेले आहे. तसेच बोटाला शाई दाखवा आणि मोफत कटींग करा… अशी मोहीम त्यांनी हाती घेतली आहे. यामुळे सकाळपासून अनंत कौलकार यांच्या सलूनमध्ये गर्दी झाली आहे. अनेक जण मतदानाचे कर्तव्य बजावून कटींग करण्याठी त्यांच्या दुकानात येत आहे.

मतदानसाठी जागृती.

काय म्हणतात अनंत कौलकार

“टीव्ही ९ मराठी”शी बोलताना अनंत कौलकार म्हणाले, जगातील सर्वात मोठ्या लोकशाही राष्ट्राचा सर्वात मोठा उत्सव सुरु झाला आहे. या उत्सवात सर्वच जणांनी सहभागी व्हावे, अशी अपेक्षा आहे. शासन-प्रशासन आपल्या पद्धतीने प्रयत्न करत असतात. परंतु त्यांचे हे प्रयत्न अपूर्ण पडतात. यामुळे सर्वसामान्यांनी आपला खारीचा वाटा उचलावा, असे मला वाटले. यामुळे “मतदार राजा जागा हो, लोकशाहीचा धागा हो…” हे घोषवाक्य करुन मतदान करुन येणाऱ्यांची मोफत कटींग सुरु केली आहे. त्याला जनतेकडून चांगला प्रतिसाद मिळाल्याचे अनंत कौलकार यांनी सांगितले.

मतदानसाठी जागृती.

अनंत कौलकार यांनी सुरु केलेल्या या उपक्रमाची परिसरात चांगली चर्चा होत आहे. लोकशाहीसंदर्भात त्यांनी वाटणारी तळमळ सर्वांना झाली म्हणजे मतदानाची टक्केवारी ९० टक्क्यांवर सहज जाईल, अशी अपेक्षा तज्ज्ञांकडून व्यक्त होत आहे.