Maharashtra Election Vote Percentage : महाराष्ट्रात मतदानाचा टक्का वाढला, आतापर्यंत कुठे किती टक्के मतदान?

महाराष्ट्रातील स्थानिक स्वराज्य संस्थांच्या निवडणुकीसाठी आज मतदान पार पडत आहे. या निमित्ताने मतदारांमध्ये मोठा उत्साह दिसून येत आहे. आज सकाळी ७ वाजल्यापासूनच अनेक ठिकाणी मतदानाला सुरुवात झाली आहे. काही ठिकाणी ईव्हीएममध्ये झालेले तांत्रिक बिघाड, मतदारांच्या यादीतील गोंधळ वगळता सर्वत्र सुरळीत मतदान सुरु आहे. आता या मतदानाची सकाळी ११.३० वाजेपर्यंत आकडेवारी समोर आली आहे. यानुसार राज्यातील अनेक जिल्ह्यांमध्ये मतदानाचा टक्का चांगलाच वाढल्याचे दिसत आहे. आता विविध जिल्ह्यांत मतदानाच्या टक्केवारीची माहिती समोर आली आहे.

नाशिक जिल्ह्यात सकाळी 11.30 पर्यंत 17.57 टक्के मतदान झाले आहे. यात त्र्यंबकेश्वरमध्ये 31.55 टक्के इतक्या सर्वाधिक मतदानाची नोंद करण्यात आली आहे. तर येवल्यात 10.46 टक्के सर्वात कमी मतदान झाले आहे. यापाठोपाठ इगतपुरीमध्ये 11.30 पर्यंत एकूण 4801 मतदारांनी मतदानाचा हक्क बजावला असून यात 2629 पुरुष, 2171 स्त्रियांचा समावेश आहे. यामुळे मतदानाचा टक्का 19.14 टक्के आहे. बुलढाणा जिल्ह्यात सरासरी 19.79 टक्के मतदानाची नोंद करण्यात आली आहे.

बुलढाणा जिल्ह्यातील मतदानाची टक्केवारी

हिंगोलीत सकाळी 11.30 वाजेपर्यंत मतदानाची टक्केवारी 22.41 टक्के नोंदवली गेली आहे. तर गडचिरोली दुपारी १२ वाजेपर्यंतची मतदानाची आकडेवारी समोर आली आहे. गडचिरोली नगर परिषदेत 23.82 टक्के, देसाईगंज या ठिकाणी 22.18 टक्के, आरमोरीत 21.98 टक्के मतदानाची नोंद करण्यात आली आहे.

नंदुरबार जिल्ह्यातील चार नगरपालिकेसाठी दोन तासात 27.29 टक्के मतदान झाले आहे. यात तळोदा नगरपालिकेसाठी सर्वाधिक 8.58 टक्के मतदान झाले, तर नंदुरबारमध्ये 5.21 टक्के, शहादामध्ये 8.09 टक्के, नवापूरमध्ये 6.41 टक्के इतक्या मतदानाची नोंद करण्यात आली. तसेच नांदेड जिल्ह्यातील 11 नगरपालिका आणि एका नगरपंचायतीसाठी सकाळी 11.30 वाजेपर्यंत सरासरी 19.95 टक्के मतदान झाले आहे.

सातारा जिल्ह्यात मतदारांनी चांगला प्रतिसाद दिला असून मेढा नगरपंचायतीत सर्वाधिक 39.39 टक्के मतदान झाले आहे.

पुणे जिल्ह्यात 11.30 पर्यंत सरासरी 20.22 टक्के मतदान नोंदवले गेले असून मंचर नगरपंचायतीत सर्वाधिक मतदानाची नोंद करण्यात आली आहे.

यवतमाळ जिल्ह्यातील नगरपरिषदांमध्ये मतदारांचा उत्साह मध्यम स्वरूपात आहे. ढाणकी नगरपंचायतीत सर्वाधिक मतदान झाले.

अहिल्यानगर जिल्ह्यात 8 नगरपरिषदेसाठी सरासरी 19.55 टक्के मतदान झाले.

सोलापूर जिल्ह्यात ११.३० पर्यंत सरासरी 19.46 टक्के मतदान झाले. दूधनी नगरपालिकेत सर्वाधिक 31.37 टक्के मतदान झाले आहे. करमाळा नगरपरिषदेत 23.17 टक्के मतदानाची नोंद झाली.

पालघर जिल्ह्यात मतदानाला मध्यम प्रतिसाद पाहायला मिळत आहे.