Maharashtra News LIVE : ओमराजे निंबाळकर अजूनही उद्धव ठाकरे यांच्या फॉलोअर्समध्ये..

मुंबई महानगरपालिकेने (BMC) नागरिक, गृहनिर्माण संस्था आणि व्यावसायिकांना दादर येथील १२३ वर्षे जुन्या ‘म्युनिसिपल अ‍ॅनालिस्ट लॅब’मध्ये अन्न आणि पाणी तपासण्याचे आवाहन केले आहे. या सरकारी प्रयोगशाळेत अत्यंत माफक दरात दर्जेदार आणि खात्रीशीर चाचण्या केल्या जातात. पाणी तपासणीचा अहवाल अवघ्या २४ तासांत थेट व्हॉट्सॲप (WhatsApp) आणि ईमेलवर उपलब्ध करून दिला जाईल.
​

१,६०० मेगावॉट वीज खरेदीला महाराष्ट्र वीज नियामक आयोगाची हिरवी झेंडी दाखवली असल्याची माहिती. अदानी पॉवरकडून ५.३० रुपये प्रतियुनिट दराने वीज खरेदी होणार. महानिर्मितीच्या वीजदरापेक्षा अदानीची वीज स्वस्त असल्याने मंजुरी महानिर्मितीच्या प्रकल्पांचा वीजदर ६.१४ ते ६.७७ रुपये प्रतियुनिट असल्याची माहिती. पीपीए संपुष्टात आले म्हणजे प्रकल्प बंद होणार नाहीत, आयोगाचे स्पष्टीकरण

ठाणे पालघर जिल्हा बँकेच्या निवडणुकीचे मतमोजणी आज पार पडत आहे. 21 संचालकापैकी 10 जागा बिनविरोध उर्वरित अकरा संचालकासाठी काल मतदान झाले. सहकार पॅनल आणि परिवर्तन पॅनल यांच्या थेट लढत आहे. एकूण 4027 मतदार आहेत. 97 टक्के मतदान झाले 127 मतदार गैरहजर राहिले. निवडणुकीत सहकार पॅनल आणि परिवर्तन पॅनल आमने-सामने उभे ठाकले आहेत ..

धावत्या लोकलमध्ये अवघ्या २१ वर्षीय मयंक लोहार या प्रवाशाची चाकू भोसकून झालेल्या हत्येनंतर, रेल्वे पोलीस (GRP) आता लोकल प्रवाशांच्या बॅगांची मॅन्युअल (प्रत्यक्ष) तपासणी तीव्र करणार आहेत. उपनगरीय स्थानकांवर गर्दीमुळे बॅगेज स्कॅनर वापरणे कठीण असल्याने, सीसीटीव्हीच्या देखरेखीखाली आणि अधिकाऱ्याच्या उपस्थितीत प्रवाशांच्या लहान पाठीवरील बॅगा (Backpacks) तपासल्या जातील. किरकोळ वादातून हत्या हत्याराचा वापर रोखण्यासाठी, कामगारांनी आणि कारागिरांनी त्यांच्या कामाची हत्यारे/साधने (उदा. चाकू, धारदार वस्तू) ट्रेन प्रवासात सोबत न बाळगता कामाच्या ठिकाणीच ठेवावीत, असे आवाहन पोलिसांनी केले आहे.

ओमराजे निंबाळकर अजूनही उद्धव ठाकरे आणि आदित्य ठाकरे यांच्या फॉलोअर्समध्ये. शिवसेना (उद्धव बाळासाहेब ठाकरे) सोडून शिंदे गटात प्रवेश केल्यानंतर राज्यभर राजकीय आरोप-प्रत्यारोप सुरू असताना, खासदार ओमराजे निंबाळकर यांच्या सोशल मीडिया हालचालींचीही चर्चा रंगली आहे. उद्धव ठाकरे यांच्या शिवसेनेतील अनेक पदाधिकारी आणि कार्यकर्त्यांनी ओमराजे निंबाळकर यांना सोशल मीडियावर अनफॉलो केल्याची चर्चा असताना, ओमराजे निंबाळकर मात्र अजूनही उद्धव ठाकरे आणि आदित्य ठाकरे यांच्या अधिकृत सोशल मीडिया खात्यांना फॉलो करत असल्याचे दिसून येत आहे.

मनसे अध्यक्ष राज ठाकरे आज विक्रोळी दौऱ्यावरती आहेत. विक्रोळी पार्क साईट या ठिकाणी महाराष्ट्र नवनिर्माण सेनेचा शाखा उद्घाटनाचा कार्यक्रम आज आयोजित करण्यात आलेला आहे. आज सकाळी 11 वाजता मनसे अध्यक्ष राज ठाकरे यांच्या हस्ते या शाखेचे उद्घाटन होणार आहे. राज ठाकरे यांच्या स्वागतासाठी विक्रोळी परिसरात मोठी बॅनरबाजी पाहायला मिळत आहे

उन्नत नाशिक अभियान आणि हरित मान्सून अभियानाच्या माध्यमातून स्वच्छता मोहीम राबवण्यात आली आहे. नाशिक महानगरपालिकेचे महापौर, उपमहापौर यांच्यासह मनपा आयुक्त आणि नगरसेवकही सहभागी झाले. कुंभमेळ्याच्या पार्श्वभूमीवर ही मोहिम राबवली जात आहे.

वरळी, नायगाव आणि एन.एम. जोशी मार्गावरील बीडीडी चाळींच्या पुनर्विकासाचे काम वेगाने प्रगतिपथावर असताना केंद्राच्या अखत्यारीत येणाऱ्या मुंबई पोर्ट ट्रस्टकडून मंजुरी न मिळाल्याने शिवडी बीडीडी चाळ पुनर्विकास प्रकल्प प्रदीर्घ काळापासून रखडला आहे.

वाढत्या प्रवासी संख्येचा विचार करता मध्य रेल्वेने मुख्य मार्गावरील (Main Line) सध्याच्या 12 नॉन-एसी लोकल फेऱ्यांचे एसी (AC) लोकलमध्ये रूपांतर करण्याचा निर्णय घेतला आहे. या 12 नवीन फेऱ्यांमुळे मध्य रेल्वेच्या नेटवर्कवरील एकूण एसी लोकल फेऱ्यांची संख्या आता 120 वर पोहोचणार आहे.

लातूर जिल्ह्यातल्या घरणी जवळ दोन कार अडवून लुटल्याची घटना घडली होती. या घटनेत प्रवासी महिला मुलांच्या अंगावरील दागिने चोरट्यांनी शस्त्रांचा धाक दाखवत लुटले होते. या घटनेतील आरोपी आता पोलिसांच्या हाती लागले आहेत. या टोळीतील तिघे जण पळून गेले आहेत तर एक जण पोलिसांच्या हाती लागला आहे.

अमळनेर येथे कचऱ्याच्या घंटागाडीतून मृतदेह नेण्यात आल्याच्या प्रकाराबाबत राष्ट्रवादी युवक काँग्रेस अजित पवार गटाचे जिल्हाध्यक्ष भूषण भदाने यांनी मानवाधिकार आयोगाकडे तक्रार केली आहे. प्रकरणाची उच्चस्तरीय चौकशी करून अधिकाऱ्यांबरोबरच कर्मचाऱ्यांचे निलंबनाची मागणी भूषण भदाने यांनी केली आहे.

जळगावच्या भुसावळ येथील उद्योजकाची तब्बल 97 लाख 50 हजारांत ऑनलाइन फसवणूक झाली आहे. याप्रकरणी जळगाव सायबर पोलीस ठाण्यात गुन्हा दाखल झाला आहे. विलास पाटील अँड असोसिएट कंपनीचे मालक विलास जयराम पाटील यांची फसवणूक झाली आहे.

पाकिस्तानच्या कराची शहरात शनिवारी रात्री मोठा आत्मघाती हल्ला झाला. समोर आलेल्या माहितीनुसार कराचीच्या गुलिस्तान-ए-जौहर परिसरातील युनिव्हर्सिटी रोडजवळ अचानक जोरदार आवाजासह स्फोट झाले. स्थानिक लोकांमध्ये भीतीचे वातावरण पसरले. या हल्ल्यात चार पाकिस्तानी रेंजर्सचा मृत्यू झाला आहे. तर प्रत्युत्तर कारवाईत पाच दहशतवाद्यांना ठार करण्यात आले.