वंदेभारत स्लीपरच्या मास प्रोडक्शनला होणार आणखी उशीर, डेडलाईन पुढे ढकल्याने चिंता

वंदेभारत स्लीपरचे तयार करण्याचे काम मराठवाड्यातील लातूरच्या रेल कोच फॅक्टरीत प्रगती पथावर आहे. मात्र, वंदेभारत स्लीपर ट्रेनचे पुढील प्रोडक्शन मात्र अडचणीत सापडले आहे. या वंदेभारत स्लीपर ट्रेनची पुढील आवृत्तीची डेडलाईन पुढे ढकलण्यात आली आहे. आता वंदेभारत स्लीपरची नवीन ट्रेन ३१ मार्च २०२७ रोजी येणार असल्याचे म्हटले जात आहे. याआधीच्या नियोजनानुसार वंदेभारत स्लीपरचे प्रोडक्शन सुरु होऊन जून २०२६ मध्ये वंदेभारत स्लीपर मिळणार होती. त्यानंतर ती डिसेंबर २०२६ मध्ये येईल असे म्हटले जात होते. आता मात्र, थेट पुढच्या वर्षी मार्चमध्ये वंदेभारत स्लीपरचा प्रोटोटाईप रुळांवर येईल असे म्हटले जात आहे.

रेल्वे विकास निगम लिमिटेडचे (RVNL)चेअरमन आणि मॅनेजिंग डायरेक्टर सलीम अहमद यांनी २३ व्या वार्षिक सर्वसाधारण बैठकीत ही माहिती दिली आहे.  वंदेभारत स्लीपरचा प्रोटोटाईपचा विकास रेल्वे विकास निगम लिमिटेडचे (RVNL) आणि रशियन रोलिंग स्टॉक मॅन्युफॅक्चरर ट्रान्समॅश होल्डिंग (TMH) यांच्या इंडो-रशियन जॉईंट व्हेन्चर असलेल्या Kinet Railway Solutions Ltd कडून केला जात आहे.

Kinet Railway Solutions Ltd ला प्रत्येकी १६ डब्यांच्या १२० वंदेभारत स्लीपर ट्रेन सेट्सची बांधणी करण्याचे कंत्राट दिले आहे. एकूण १,९२० कोचेसची बांधणी यात केली जाणार आहे. या प्रकल्पाचा खर्च ३५ वर्षांच्या देखभालीसह एकूण १४,४०० कोटींचा आहे. पहिला प्रोटोटाईप यंदा जुन महिन्यात येईल असे आधी जाहीर करण्यात आले होते. मात्र, आता प्रोजेक्टला उशीर झाल्याने यात पहिला वंदेभारत स्लीपर ट्रेनचा सेट थेट पुढच्या वर्षी मार्च २०२७ रोजी प्राप्त होणार आहे.

दुसरी वंदेभारत स्लीपर मुंबई – पुणे – बंगळुरु मार्गावर

पहिली वंदेभारत स्लीपर ट्रेन ही कोलकाता येथील हावडा जंक्शन ते कामाख्या ( गुवाहाटी- आसाम ) अशी धावत आहे. या ट्रेनचे उद्घाटन पंतप्रधान नरेंद्र मोदी यांनी १७ जानेवारी २०२६ रोजी केले होते. १६ डब्यांच्या या वंदेभारत स्लीपरमध्ये एकूण ८२३ प्रवासी बसू शकतात. दुसरी वंदेभारत स्लीपर मुंबई – पुणे – बंगळुरु मार्गावर धावणार असे म्हटले जात आहे. या ट्रेनच्या ट्रायलचा एक विहंगम व्हिडीओ नुकताच सोशल मीडियावर प्रचंड व्हायरल झाला आहे.