MLC Election | विधान परिषदेच्या आखाड्यात हायप्रोफाइल ड्रामा, पवईच्या हॉटेलमध्ये आमदार आजपासून लॉक, अनोळखी व्यक्तीला परवानगी नाही!
निवडणुकीच्या पार्श्वभूमीवर मविआ आणि भाजपकडून अंतर्गत बातम्या फुटू नये, यासाठी जेवढी जास्त खबरदारी घेतली जात आहे, तेवढंच अफवा आणि चर्चांचं पिक वाढलंय.
मुंबईः विधान परिषद निवडणुकीच्या (MLC Election) पार्श्वभूमीवर मुंबईत उच्च स्तरावर नाट्यमय घडामोडी घडत आहेत. शिवसैनिक आमदारांना तसेच महाविकास आघाडीतील (Mahavikas Aghadi) सेना समर्थित आमदारांना पवई येथील हॉटेलमध्ये बोलावण्यात आलं आहे. कालपासूनच यासंबंधीच्या सूचना आमदारांना देण्यात आल्या आहेत. आज दुपारी 1 वाजेनंतर पवईच्या रेन्सॉ हॉटेलमध्ये राज्यभरातून आमदार दाखल होण्यास सुरुवात होईल. विधान परिषद निवडणुकीसाठी एकेका आमदाराचं मत कोट्यवधी रुपयांच्या मोलांचं आहे. त्यामुळे एकही आमदार फुटू नये, यासाठी ठाकरे (Uddhav Thackeray) सरकारकडून काळजी घेतली जात आहे. ऐनवेळी दगाफटका होऊ नये, यासाठी आमदारांना दोन दिवस आधीपासूनच पवईच्या हॉटेलमध्ये मुक्कामी बोलावण्यात आलं आहे. राज्यसभेच्या निवडणुकीवेळीही मविआतर्फे आमदारांना एका हॉटेलमध्ये मुक्कामी ठेवण्यात आलं होतं. मतदान कसं करायचं, याच्या तंतोतंत सूचना दिल्या होत्या. तरीही ऐनवेळी शिवसेनेच्या उमेदवाराला हार पत्करावी लागली. आता विधान परिषदेच्या निवडणुकीसाठी मविआतर्फे अधिक खबरदारी घेतली जात आहे.
अनोळखी व्यक्तीला प्रवेश नाही
पवई येथील ज्या रेन्सॉ हॉटेलमध्ये शिवसेनेचे आमदार तसेच सेना समर्थित अपक्ष आमदारांना दुपारनंतर दाखल होण्याचे आदेश दिले आहेत. या हॉटेल परिसरातील सुरक्षा व्यवस्था वाढवण्यात आली आहे. हॉटेल रेन्सॉ परिसराला आता जणू छावणीचंच रुप आलं आहे. हॉटेलमधली कोणतीही बातमी फुटू नये, यासाठी हॉटेल प्रशासनालाही सतर्क राहण्याचे आदेश देण्यात आले आहेत. तसेच कोणत्याही अनोळखी व्यक्तीला हॉटेलमध्ये प्रवेश न देण्याच्या सूचनाही देण्यात आल्या आहेत.
मविआमध्ये राष्ट्रवादीकडून फोडाफोडी?
निवडणुकीच्या पार्श्वभूमीवर मविआ आणि भाजपकडून अंतर्गत बातम्या फुटू नये, यासाठी जेवढी जास्त खबरदारी घेतली जात आहे, तेवढंच अफवा आणि चर्चांचं पिक वाढलंय. यातच एक बातमी पुढे आली आहे. राष्ट्रवादी काँग्रेसकडून शिवसेना समर्थित अपक्ष आमदाराला फोन आल्याची माहिती आहे. एका मतासाठी राष्ट्रवादीच्या वरिष्ठ नेत्याकडून हा फोन आल्याचं बोललं जात आहे. यंदा विधानपरिषदेतील निवडणुकीसाठी काँग्रेस आणि राष्ट्रवादीला अतिरिक्त मतांची गरज आहे. त्यामुळे शिवसेना समर्थित अपक्ष आमदारांवर राष्ट्रवादी आणि काँग्रेसचा डोळा आहे. राष्ट्रवादीकडून असा फोन गेल्यामुळे मुख्यमंत्री उद्धव ठाकरे यांनी गंभीर दखल घेतली आहे. त्यामुळे महाविकास आघाडीत खळबळ असल्याची माहिती सूत्रांनी दिली आहे.
