मुंबईत पावसाचा कहर! विद्यापीठाच्या परीक्षा रद्द; मोठा निर्णय

राज्याच्या मुंबई, पुणे, आजूबाजूच्या महानगर क्षेत्रात जोरदार पाऊस सुरू आहे. या मुसळधार पावसामुळे जीनजीवन विस्कळीत झालं आहे. मुंबईतील विविध भागात भीषण दुर्घटना घडल्या आहेत. तर आज सोमवारी मुंबई, ठाणे आणि इतर काही जिल्ह्यात रेड अलर्ट जाहीर करण्यात आल आहे. या पावसाच्या पार्श्वभूमीवर मुंबई विद्यापीठाकडून 6 जुलै रोजी घेण्यात येणाऱ्या परीक्षा रद्द करण्यात आल्या आहेत. परीक्षेच्या नवीन तारखेची लवकरच घोषणा केली जाईल.

मुंबई शाळा, कॉलेज बंद 

मुंबई विद्यापीठात आज सोमवारी एलएलएम, एमएससी, एम. कॉमच्या परीक्षा होणार होत्या. परंतु मुंबईतील मुसळधार पावसामुळे विद्यापीठ प्रशासनाने आज होणाऱ्या परीक्षा रद्द करण्याचा निर्णय घेतला. मागील 6 दिवसांपासून मुसळधार पाऊस सुरू आहे. मुंबई, ठाण्यात मुसळधार पावसामुळे प्रशासनाने शाळांना सुट्टी दिली आहे.

परीक्षा पुढे ढकलल्या 

मुंबई विद्यापीठाने (Mumbai University) प्रसिद्ध केलेल्या पत्रकात म्हटलं की, भारतीय हवामान विभागाने वर्तविलेल्या मुसळधार पाऊस आणि अतिवृष्टीच्या इशाऱ्याच्या पार्श्वभूमीवर विद्यार्थ्यांच्या सुरक्षिततेचा विचार करून मुंबई विद्यापीठाच्या 6 जुलै 2026 रोजी आयोजित करण्यात आलेल्या सर्व परीक्षा रद्द करण्यात आल्या आहेत. मुसळधार पावसाच्या पार्श्वभूमीवर या परीक्षा पुढे ढकलण्यात येत आहेत. मुंबई विद्यापीठांच्या परीक्षांचे सुधारित वेळापत्रक लवकरच अधिकृत वेबसाईटवर प्रसिद्ध करण्यात येईल. विद्यार्थ्यांनी वेळोवेळी संकेतस्थळावरील सूचना पाहाव्यात. विद्यार्थी, महाविद्यालये आणि संबंधित सर्वांनी याची नोंद घ्यावी.

मुंबईत डबेवाल्यांची सेवा आज बंद

मुसळधार पावसाच्या (Mumbai Rain) पार्श्वभूमीवर 6 जुलै रोजी मुंबईत डबेवाल्यांची सेवा बंद राहील. डबेवाले संघटनेचे अध्यक्ष उल्हास मुके यांनी सांगितलं की, विरार-वसई क्षेत्रात मुसळधार पाऊस सुरू आहे. या व्यतिरिक्त अनेक रेल्वे स्टेशनजवळ ट्रॅकवर पाणी साचलं आहे. कर्मचाऱ्यांच्या सुरक्षेच्या कारणात्सव आज सेवा बंद ठेवण्याचा निर्णय घेण्यात आलाय. 125 वर्षांच्या सेवेत पहिल्यांदा कर्मचाऱ्यांच्या सुरक्षेला प्राधान्य देण्यात आलं आहे. पावसाच्या पार्श्वभूमीवर खबरदारीचा उपाय म्हणून सेवा स्थगित करण्याचा निर्णय घेण्यात आलाय. आज ग्राहकांना होणाऱ्या गैरसोयीविषयी दिलगिरी व्यक्त करतो’.