सत्तांतरानंतर पहिली मोठी निवडणूक जाहीर? कुणाचा उडणार धुव्वा?

मुंबई : ९ ऑगस्ट २०२३ : राज्यात सत्तातंर होऊन एक वर्ष पूर्ण झाले. या एक वर्षांत अनेक घडामोडी घडल्या. आधी एकनाथ शिंदे यांनी भाजपसोबत जात राज्यात सत्ता स्थापन केली. एका वर्षानंतर राज्याचे विधानसभेचे विरोधी पक्षनेते अजित पवार त्यांना येऊन मिळाले. अजित दादांनी उपमुख्यमंत्रिपदाची शपथ घेतली. तर, इकडे महाविकास आघाडातील उद्धव ठाकरे, शरद पवार आणि काँग्रेसचे नेते राज्यात निवडणूक घेण्याची सातत्याने मागणी करत आहेत. रुजतात निवडणूक घेण्यास शिंदे सरकार आणि भाजप घाबरत असल्याचा आरोप सातत्याने उद्धव ठाकरे गटाकडून करण्यात येत आहे. मात्र, उद्धव ठाकरे गटाची प्रतिष्ठा पणाला लावणारी एक महत्वाची निवडणूक जाहीर झाली आहे.

उद्धव ठाकरे गटाला शह देण्यासाठी या निवडणुकीत शिंदे गट पूर्ण ताकदीनिशी उतरणार आहे. या निवडणुकीत शिंदे गटाला भाजपची मिळणारी रसद महत्वाची ठरणार आहे. मात्र, त्या तुलनेत शिंदे गट आणि भाजपाला अजित पवार गटाची ताकद कमी प्रमाणात मिळण्याची शक्यता आहे. तर, ‘एकला चलो रे’ची भूमिका घेणाऱ्या महाराष्ट्र नवनिर्माण सेनेची कामगिरीही या निवडणुकीत दिसून येणार आहे.

12 जानेवारीला मतदार नोंदणीची मुदत संपली. असे असतानाही निवडणुकांचा कार्यक्रम जाहीर न केल्याने युवासेनेने प्रशासनाला धारेवर धरत निवडणुका कधी होणार, असा थेट सवाल केला होता. अखेर, या निवडणूका जाहीर करण्यात आल्या आहेत.

मुंबई महाविद्यालयाच्या सिनेट पदांसाठी या निवडणूका होणार आहेत. 10 सिनेट पदांसाठी या निवडणूक होणार आहेत. 10 सप्टेंबर रोजी निवडणूक होणार असून या निवडणुकीत 95 हजार पदवीधर मतदानाचा हक्क बजावणार आहेत.

सध्या मुंबई महाविद्यालयाच्या सिनेट पदांमध्ये उद्धव ठाकरे गटाचे वर्चस्व आहे. या निवडणूक जाहीर झाल्याने आता शिवसेनेचे दोन्ही गट ( ठाकरे गट, शिंदे गट ) आणि मनसे असे तीन पक्ष ताकदीनिशी उतरण्याची शक्यता आहे.

गेल्या निवडणुकीत युवासेना प्रमुख आदित्य ठाकरे यांच्या नेतृत्वाखाली युवासेनेला 100 टक्के यश मिळाले होते. युवासेनेने दहाच्या दहा जागा जिंकून सिनेटवर एकहाती वर्चस्व निर्माण केले होते. मात्र, यंदाच्या निवडणुकीत आदित्य ठाकरे विरुद्ध अमित ठाकरे असा सामना रंगणार आहे.