“ठाकरे डिमांड रुपया, TDR त्यांना मिळाला की ‘यु टर्न’ घेण्यास मोकळे”, आशिष शेलारांची खोचक टीका
"एकदा 'ठाकरे डिमांड रुपया' (TDR) त्यांना मिळाला की 'यु टर्न' घेण्याचा मार्ग मोकळा. आज म्हणाले त्यांनी घेतलेला बिल्डर धार्जिणा एक निर्णय दाखवा. बघा घेतला का यु टर्न? कोविडमध्ये बिल्डरांना 12 हजार कोटींचा प्रिमियम कुणी माफ केला?" असा सवाल आशिष शेलार यांनी केला.
मुंबई | 16 डिसेंबर 2023 : धारावी पुनर्विकास प्रकल्पात त्रुटी असल्याचा आरोप करत ठाकरे गटाचे प्रमुख उद्धव ठाकरे यांनी आज धारावी ते बीकेसी असा मोर्चा काढला. धारावी पुनर्विकास प्रकल्पाचं काम राज्य सरकारकडून उद्योगपती गौतम अदानी यांच्या अदानी उद्योग समूहाला देण्यात आलं आहे. पण त्यावरुन उद्धव ठाकरेंनी टीका केलीय. तसेच धारावीकरांना 500 चौरस फुटाची घरे मिळावी, अशी मागणी उद्धव ठाकरेंनी केलीय. उद्धव ठाकरेंनी याबाबतची मागणी करत आज धारावी ते अदानी उद्योग समूहाचं कार्यालय असलेल्या बीकेसीपर्यंत मोर्चा काढला. त्यानंतर त्यांनी धडाकेबाज भाषण केलं. यावेळी त्यांनी भाजप, आणि अदानींवर जोरदार निशाणा साधला. त्यांच्या टीकेला आता भाजप आमदार आणि मुंबई भाजप अध्यक्ष आशिष शेलार यांनी प्रत्युत्तर दिलंय. “उद्धव ठाकरे यांना अदानींकडून पैसा मिळाला की ते थेट यु टर्न घेतील”, असा धक्कादायक आरोप शेलारांनी केलाय.
“एकदा ‘ठाकरे डिमांड रुपया’ (TDR) त्यांना मिळाला की “यु टर्न” घेण्याचा मार्ग मोकळा”, अशा शब्दांत मुंबई भाजप अध्यक्ष आमदार आशिष शेलार यांनी ठाकरे गटाच्या मोर्चावर टीका केली आहे. “ठाकरे गट नेहमीच विकासाच्या विरोधात काम करते. प्रकल्प अडवून कटकमिशन वसूली करणारे मुंबईकरांसाठी नाही तर कटकमिशनसाठी संघर्ष करीत आहेत. यांच्या सरकारच्या काळातच धारावीच्या पुनर्विकासाचा टेंडर निघाले”, अशी टीका आशिष शेलारांनी केली.
‘उद्धव ठाकरे (UT) म्हणजे यु टर्न’, शेलारांची टीका
“उद्धव ठाकरे (UT) म्हणजे यु टर्न… आजपर्यंत त्यांनी ज्या भूमिका घेतल्या त्यातून प्रत्येकवेळी यु टर्न घेतले आहेत. आता त्यांनी धारावी पुनर्विकासाला विरोध करणारी भूमिका घेतली आहे. “यु टर्न फेम” श्रीमान उद्धव ठाकरे यांनी आज मोर्चा काढला तोही “टि जंक्शन” वरूनच. म्हणजे कुठल्याही बाजूला वळायची सोय आहेच”, असा टोला आशिष शेलार यांनी लगावला.
उद्धव ठाकरेंच्या खोक्यांच्या टीकेला उद्धव ठाकरेंचं उत्तर
“एकदा ‘ठाकरे डिमांड रुपया’ (TDR) त्यांना मिळाला की ‘यु टर्न’ घेण्याचा मार्ग मोकळा. आज म्हणाले त्यांनी घेतलेला बिल्डर धार्जिणा एक निर्णय दाखवा. बघा घेतला का यु टर्न? कोविडमध्ये बिल्डरांना 12 हजार कोटींचा प्रिमियम कुणी माफ केला?” असा सवाल आशिष शेलार यांनी केला. यावेळी आशिष शेलार यांनी उद्धव ठाकरेंच्या खोक्यांच्या आरोपांवरुन निशाणा साधला. “धारावीकरांचा यांना पुळका जोरात, खोके घेऊन अदानी कधी जाणार आता मातोश्रीच्या दारात?”, असा खोचक टोला आशिष शेलार यांनी लगावला.
