आवडते मुख्यमंत्री कोण, एकनाथ शिंदे की देवेंद्र फडणवीस? मंगलप्रभात लोढा हसले, नंतर म्हणाले….

मुंबई : महाराष्ट्राचे पर्यटन मंत्री मंगलप्रभात लोढा (Mangal Prabhat Lodha) यांनी ‘टीव्ही 9 मराठी’च्या ‘महाराष्ट्राचा महासंकल्प‘ या विशेष कार्यक्रमात मुलाखत दिली. या मुलाखतीत त्यांनी वेगवेगळ्या मुद्द्यांवर आपली भूमिका मांडली. यावेळी मंगलप्रभात लोढा यांना पंढरपूरच्या कॉरिडोरला होणाऱ्या विरोधाबद्दल विचारण्यात आला. त्यावर त्यांनी “विरोध होतोय ते बरोबर आहे. पण त्यामागे सरकारची भावना काय आहे? तेही लक्षात घेतलं पाहिजे. वाराणसीमध्ये काय झालं? उज्जैनमध्ये काय झालं? पण तिथे आता काय स्थिती आहे. लोकांसाठी ते प्रयत्न होते. लोकं हळूहळू समजतील. लोक बरोबर येतील. तिथे देवेंद्र फडणवीस यांनी केलेले प्रयत्न यशस्वी होतील”, अशी भूमिका मांडली.

यावेळी मंगलप्रभात लोढा यांना रॅपिड प्रश्न विचारण्यात आले. त्यामध्ये त्यांना एकनाथ शिंदे की देवेंद्र फडणवीस यापैकी आवडते मुख्यमंत्री कोण? असा प्रश्न विचारण्यात आला. या प्रश्नावर लोढा आधी हसले. या प्रश्नावर त्यांनी उत्तर देणं टाळलं. त्यांनी दुसरा प्रश्न विचारा असं सांगितलं.

थेट विकास की पुनर्विकास असा प्रश्न विचारला असता त्यांनी थेट विकास असं उत्तर दिलं.

केंद्रातलं आवडीचं नेतृत्व कोणतं, अमित शाह की नरेंद्र मोदी? असा प्रश्न त्यांना विचारला असता त्यांनी तीनवेळा नरेंद्र मोदी यांचं नाव घेतलं.

कोणते मुख्यमंत्री भावले? असा प्रश्न विचारला असता उद्धव ठाकरे मुख्यमंत्री होते. पण ते मुख्यमंत्री असताना त्यांना कधी भेटलो नाही.

देवेंद्र फडणवीस यांचे गौप्यस्फोट

दरम्यान, या कार्यक्रमात उपमुख्यमंत्री देवेंद्र फडणवीस यांनी मोठे गौप्यस्फोट केले.

देवेंद्र फडणवीस काय-काय म्हणाले?

माझ्यासोबत विश्वासघात दोनवेळा झाला. पहिला उद्धव ठाकरेंनी केला. त्यांनी आमच्यासोबत निवडणुका लढल्या. आमच्यासोबत निवडून आले. निवडणुकीच्या कार्यक्रमात मोदीजी देवेंद्र फडणवीस मुख्यमंत्री होतील असे म्हणत होते तेव्हा ते टाळ्या वाजवत होते. पण ज्यावेळी नंबर लक्षात आला की आपल्याला मुख्यमंत्री होता येईल. त्यावेळी त्यांनी माझा फोनही घेतला नाही. माझ्याशी चर्चाही केली नाही. मुख्यमंत्रीपदाची खूर्ची त्यांना इतकी प्रिय झाली की ते राष्ट्रवादी आणि काँग्रेससोबत निघून गेले. त्यामुळे एकप्रकारे विश्वासघात त्यांनी केला.

दुसरा विश्वासघात आमच्यासोबत केला त्यांना मी कमी दोष देईन. कारण त्यांनी आमच्यासोबत निवडणूक लढवली नव्हती. ज्यावेळी उद्धव ठाकरे राष्ट्रवादी आणि काँग्रेससोबत चर्चा करत आहेत. त्यांची चर्चा पुढे गेलीय हे जेव्हा लक्षात आलं त्यावेळी आम्हाला राष्ट्रवादी काँग्रेसकडून ऑफर आली की आम्हाला स्थिर सरकार हवंय. म्हणून आपण सरकार तयार करुया.

राजकारणात एखादी व्यक्ती तुम्हाला धोका देते त्यावेळी तुम्हाला चेहरा पाहत बसता येत नाही. त्यामुळे आम्ही निश्चय केला की चला ठिक आहे. म्हणून आम्ही त्यांच्याशी चर्चा केली. त्यावेळी शरद पवार यांच्यासोबतच चर्चा झाली होती. ती काही खाली चर्चा झाली नव्हती. शरद पवारांशी चर्चा झाल्यानंतर गोष्टी ठरल्या. त्या ठरल्यानंतर कशा बदलल्या आपण सगळ्यांनी बघितलं आहे. त्यामुळे त्याही ठिकाणी एकप्रकारचा विश्वासघात झाला. पहिला विश्वासघात जास्त मोठा होता. कारण आपल्याच व्यक्तीने केला होता. तर दुसरा छोटा होता.

तुम्ही पहाटेच्या शपथविधीवर सकाळ, पहाटे किंवा अर्ध्या रात्रीचं म्हणा. काय फरक पडतो? भूतकाळ हा भूतकाळ आहे. पण त्यानंतर या दोघांनी आमच्यासोबत जी वागणूक केली होती, त्यामुळे आम्हाला संधी मिळाली, त्यांच्या पक्षात कुरबुरी झाल्या. त्यांचे लोकं बाहेर पडले. त्यांना माहिती हे मान्य नव्हतं की कशाप्रकारे हे सरकार चालतंय.

बाळासाहेब ठाकरे यांच्या विचारांवर हे सरकार चालत नाही. आम्हाला गुदमरतंय, असं त्यांना वाटत होतं. त्याचा आम्ही मौका घेतला. आम्ही त्यांना सोबत घेतलं. आम्ही त्यांच्यासोबत सरकार स्थापन केलं. मी तर असं म्हणतो एकदम नैसर्गिक सरकार आहे. कारण या सरकारमधील जे लोक आहेत त्यांनी एकमेकांसाठी मतं मागितली होती. त्यामुळे मी बदला हा शब्द वापरला होता. तुम्ही मला जे दिलं ते व्याजासहीत परत केलं.

पहाटेच्या शपथविधीच्यावेळी अजित पवार यांचं बंड होतं का? इथूनच सुरुवात होईल. मला असं वाटतं की, तुमच्याकडे अजित दादा येवून गेले आहेत. त्यांनी बऱ्याच प्रश्नांवर नो कमेंट्स केलंय. त्यामुळे काही करता का होईना त्यांनी माझ्यासोबत शपथविधी घेतली होती. त्यामुळे काही पथ्य मीसुद्धा पाळली पाहिजेत. त्यामुळे काही कमेंट त्यांना करुद्या. त्यानंतर उर्वरित कमेंट मी करतो.

अजित दादा आमच्याकडे आले होते किंवा त्यांनी माझ्याबद्दल शपथ घेतली होती ती फसवणुकीच्या भावनेतून घेतली नव्हती ही गोष्ट सांगावी लागेल. त्यामुळे त्यांच्याकडे ठरल्यानंतर काय स्ट्रॅटेजी बदलल्या, ते कसे तोंडघशी पडले हे ते सांगतील. त्यांनी नाही सांगितलं तर पुढच्या मुलाखतीत मी सांगेन, असं देवेंद्र फडणवीस यांनी सांगितलं.