फाईलमध्ये पैसे ठेवले, भाजप आमदार मेघना बोर्डिकर यांचा व्हिडीओ व्हायरल, नेमका खुलासा काय?
सोशल मीडियावर कधी काय व्हायरल होईल, याचा भरोसा नाही. विधी मंडळाच्या पावसाळी अधिवेशनाचा आज शेवटचा दिवस आहे. असं असताना भाजप आमदार मेघना बोर्डिकर यांचा विधानसभेच्या सभागृहातला आजचा एक व्हिडीओ व्हायरल होत आहे.
महाराष्ट्राच्या राजकारणात सध्या प्रचंड घडामोडी घडत आहेत. विधान परिषदेच्या 11 जागांसाठी 12 उमेदवार रिंगणार असल्याने या निवडणुकीत चुरस वाढली आहे. या निवडणुकीसाठी गेल्या दोन दिवसांपासून हॉटेल पॉलिटिक्स बघायला मिळालं आहे. राज्यातील 4 मोठ्या पक्षांनी विधान परिषद निवडणुकीत कोणताही दगाफटका होऊ नये यासाठी आपापल्या पक्षाच्या आमदारांना मुंबईतील 4 वेगवेगळ्या फाईव्ह स्टार हॉटेलमध्ये ठेवलं होतं. त्यामुळे ही निवडणूक किती प्रतिष्ठेची बनली आहे, याचा प्रत्यय येताना दिसतोय. या निवडणुकीत कोणत्यातरी एका पक्षाच्या उमेदवाराचा पराभव होणार हे निश्चित आहे. पण कुणालाही तो पराभव नकोय. त्यामुळे प्रत्येक पक्षाकडून मतांसाठी जोरदार राजकीय फिल्डिंग लावण्यात आली आहे. विशेष म्हणजे या निवडणुकीत मतदान करण्यासाठी भाजपचे जेलमधील आमदार गणपत गायकवाड हे सुद्धा आज विधान भवनात आले. त्यांनीदेखील मतदानाचा हक्क बजावला. त्यामुळे ही निवडणूक प्रत्येक पक्षासाठी किती महत्त्वाची आहे ते स्पष्ट होत आहे. एकीकडे विधान परिषद निवडणुकीसाठी या हाय व्होल्टेज घडामोडी सुरु आहेत तर दुसरीकडे विधानसभेच्या सभागृहातला भाजपच्या एका महिला आमदाराचा व्हिडीओ सोशल मीडियावर तुफान व्हायरल होतोय.
व्हायरल व्हिडीओत नेमकं काय आहे?
सोशल मीडियावर कधी काय व्हायरल होईल, याचा भरोसा नाही. विधी मंडळाच्या पावसाळी अधिवेशनाचा आज शेवटचा दिवस आहे. असं असताना भाजप आमदार मेघना बोर्डिकर यांचा विधानसभेच्या सभागृहातला आजचा एक व्हिडीओ व्हायरल होत आहे. या व्हिडीओत भाजप आमदार राजेश पवार हे सभागृहात आपली भूमिका मांडताना दिसत आहेत. त्यांच्या पाठीमागे मेघना बोर्डिकर या बसल्या आहेत. राजेश पवार बोलताना पाठीमागे असलेल्या मेघना या एका फाईलमध्ये पैसे ठेवत असल्याचं व्हिडीओत दिसत आहे. पण त्यांनी फाईलमध्ये पैसे नेमके का ठेवले? असा प्रश्न या निमित्ताने उपस्थित केला जातोय. संबंधित व्हिडीओ सोशल मीडियावर चांगलाच व्हायरल झाला आहे.
मेघना बोर्डिकर यांचा खुलासा काय?
दरम्यान, संबंधित व्हिडीओवर मेघना बोर्डिकर यांचा खुलासा समोर आला आहे. “सकाळपासून सर्दी आणि कणकण वाटत असल्याने एका फोल्डरमध्ये औषधी आणण्यासाठी 1000 रुपये माझ्या PA कडे देण्यासाठी ठेवले होते. ते फोल्डर विधानसभेतील शिपायामार्फत माझ्या PA कडे सभागृहाबाहेर पाठविण्यासाठी दिले गेले. मात्र नेमका त्याचा व्हिडिओ काढून तो व्हायरल करण्याचा आणि त्यातून गैरसमज निर्माण करण्याचा प्रयत्न काही लोकं करीत आहेत. हा प्रकार अनुचित आहे आणि सभागृहाचे पावित्र्य जपणारा नाही. माझी माध्यमांनाही विनंती आहे की, बातम्या देताना किमान संबंधितांचे म्हणणे ऐकून घ्यायला हवे”, अशी प्रतिक्रिया मेघना बोर्डिकर यांनी व्हायरल व्हिडीओवर दिली आहे.
मेघना बोर्डिकर यांची पोस्ट
