Kalyan Sadakpada: अल्पवयीन मुलांकडून करायचा महागड्या सायकलची चोरी, सोसायटीच्या सुरक्षा रक्षकाला अटक

मुंबई, कल्याण शहरात मागील काही दिवसांपासून वाढलेल्या सायकल चोरीच्या (Cycle thief in kalyan) गुन्ह्याचा छडा लावण्यात पोलिसांना यश आले आहे. या प्रकरणी लाखडकपाडा परिसरातील उच्चभ्रू सोसायटीच्या सुरक्षारक्षकासह (Security guard arrested) सोसायटीतीलच दोन अल्पवयीन मुलांना ताब्यात घेतले आहे. चौकशी दरम्यान या त्रिकूटाने चोरलेल्या एक लाख 27 हजार रुपये किमतीच्या 14 सायकली पोलिसांनी जप्त केल्या. सुरक्षा रक्षक  मुलांना पैशाचे आमिष दाखवत सायकल चोरी करायला लावायचा. त्यानंतर चोरी केलेल्या सायकल तो कमी दारात बाहेर विकायचा. सॅड्रीक एबीनिझर असे आरोपीचे नाव आहे.

सायकल चोरी संदर्भात तक्रार खडकपाडा पोलीस ठाण्यात दाखल होताच कल्याणचे सहायक पोलिस आयुक्त उमेश माने पाटील आणि खडकपाडा पोलीस स्टेशनचे वरिष्ठ पोलीस निरीक्षक सर्जेराव पाटील यांच्या मार्गदर्शनाखाली पोलीस निरीक्षक शरद झिने यांनी तपास सुरु केला.  सीसीटीव्हीच्या आधारे शोध सुरू करत एका उच्चभ्रू सोसायटीच्या सुरक्षा रक्षकाला खडकपाडा पोलिसांनी कल्याण पश्चिम येथील गुरुदेव हॉटेल येथून ताब्यात घेतले. पोलिसी खाक्या दाखविताच सुरक्षा रक्षकाने सर्व प्रकरण इतंभूत सांगितले.

दोन अल्पवयीन मुलांकडून परिसरातील महागड्या सायकली चोरून विकत असल्याची कबुली सॅड्रीक एबीनिझर याने दिली. पोलिसांनी त्याच्याकडून  1 लाख 27 हजार किंमतीच्या 14 सायकली हस्तगत केल्या आहे. सध्या या आरोपीचा अजून कोणत्या गुन्ह्यात सहभाग आहे का याचा तपास पोलिस करत असून या प्रकारे त्यांनी किती गुन्हे केलेत याचाही तपास खडकपाडा पोलीस करत आहे.