Ganpat Gaikwad Firing | आमदार गणपत गायकवाड अडचणीत, आणखी एक गुन्हा दाखल

सुनील जाधव, ठाणे, दि.4 फेब्रुवारी 2024 | भाजप आमदार गणपत गायकवाड आणि शिवसेना शिंदे गटातील शहर प्रमुख महेश गायकवाड यांच्यातील वादाने शनिवारी सर्वात गंभीर रुप घेतले. अंबरनाथ तालुक्यातील द्वारली गावातील जागेवरून आमदार गायकवाड यांनी महेश गायकवाड यांच्यावर गोळीबार केला होता. या प्रकरणात गणपत गायकवाड यांना अटक करण्यात आली आहे. आता त्यांच्यावर आणखी एक गुन्हा दाखल झाला आहे. हा गुन्हा शेतकऱ्यांनी दाखल केला आहे. आमदार गणपत गायकवाड यांच्यासह आठ जणांविरोधात ॲट्रॉसिटीचा गुन्हा दाखल झाला आहे.

का दाखल झाला ॲट्रॉसिटीचा गुन्हा

आमदार गणपत गायकवाड यांनी 31 जानेवारी रोजी दुपारी 1.00 वाजेता जातीवाचक शिविगाळ केली, असा आरोपी शेतकऱ्यांनी केला. त्यामुळे त्यांच्यासह जितेंद्र पारीक, विठ्ठल चिकणकर, शिवाजी फुलोरे, सौरभ सिंग, छोटू खान, चंद्रकांत ओल, नगेश वारघेट यांच्यावर गुन्हा दाखल केला आहे.

काय आहे तक्रारीत

नीता एकनाथ जाधव यांनी दिलेल्या तक्रारीत म्हटले आहे की, 31 जानेवारी रोजी गणपत गायकवाड आणि इतरांनी आमच्या जागेवर कंपाउंड करण्याचे काम सुरु केले. आम्ही त्यांना जाब विचारला तेव्हा आमदार गणपत गायकवाड यांनी आम्हास मारण्यासाठी फावड्याचा दांडका उचलला. त्यानंतर जातीवाचक शिविगाळ केली. तुम्ही तुमच्या जमिनीकरीता कोणत्याही कोर्टामध्ये जा, आम्ही ते घेऊ.

गायकवाड यांना अकरा दिवसांची पोलीस कोठडी

उल्हासनगरमधील हिल लाईन पोलीस ठाण्यातमध्ये झालेल्या गोळीबार प्रकरणी भाजपचे आमदार गणपत गायकवाड यांना शनिवारी न्यायालयात हजर केले होते. त्यावेळी त्यांना अकरा दिवसांची पोलीस कोठडी सुनावली आहे. पोलिसांनी 14 दिवसांच्या पोलीस कोठडीची मागणी केली होती.

सुरक्षेच्या कारणास्तव गणपत गायकवाड यांना व्हिडिओ कॉन्फरन्सिंगद्वारे न्यायालयात हजर करण्यात येणार होते. मात्र पोलिसांची ही मागणी न्यायालयाने फेटाळली. त्यामुळे अखेर गणपत गायकवाड यांना प्रत्यक्ष न्यायालयात हजर करण्यात आले. गणपत गायकवाड यांना कोर्टात आणण्यात येणार असल्याने चोख पोलीस बंदोबस्त ठेवण्यात आला होता.

हे ही वाचा

Ganpat Gaikwad Firing | भाजप आमदार गोळीबार प्रकरणात देवेंद्र फडणवीस यांची मोठी घोषणा