Navnath Ban: MPSC आंदोलनाआडून त्या मतदारसंघासाठी रोहित पवारांची मोर्चेबांधणी? नवनाथ बन यांचा मोठा आरोप

नवनाथ बन यांची रोहित पवार यांच्यावर टीका

Navnath Ban on Rohit Pawar : गेल्या काही दिवसांपासून MPSC विद्यार्थ्यांनी पुण्यात ठिय्या दिला आहे. एमपीएससी आंदोलन संपणार असे वाटत असतानाच ते पुन्हा पेटले. विद्यार्थी अजूनही एस एम. जोशी पुलावर ठाण मांडून आहेत. पोलिसांच्या आवाहनालाही त्यांनी प्रतिसाद दिला नाही. दरम्यान आज भाजप प्रवक्ते नवनाथ बन यांनी पत्रकार परिषदेतून राष्ट्रवादीचे आमदार रोहित पवार यांच्यावर मोठा आरोप केला. एमपीएससी विद्यार्थ्यांच्या आडून रोहित पवार त्यांची राजकीय पोळी भाजण्याच्या प्रयत्नात असल्याचा आरोप त्यांनी केली.

भिमनवार तो बहाणा है…

नवनाथ बन यांनी आजच्या पत्रकार परिषदेतून रोहित पवार आणि आंदोलकांवर निशाणा साधला. हे आंदोलन भीमनवार यांच्या राजीनाम्यासाठी आहे की त्यातून इतर इपसित साध्य करायचं आहे, असा सवाल त्यांनी केला. मी पुन्हा सांगतो, “भीमनवार तो बहाणा है, देवाभाऊ निशाणा है” असे बन म्हणाले. एमपीएससी विद्यार्थी आंदोलनातून सरकारला शिव्या घालण्यात येत असल्याचा आरोपही त्यांनी केला. या आंदोलनाच्या नेमक्या उद्दिष्टांवर त्यांनी निशाणा साधला.

रोहित पवार यांना मुख्यमंत्री व्हायचंय

आमदार रोहित पवार यांना या राज्याचे मुख्यमंत्री व्हायचं आहे. त्यांनी यावेळी काही व्हिडिओ दाखवले. त्यात रोहित पवार यांना खांद्यावर घेऊन त्यांचे कार्यकर्ते नाचत आहेत. जर का हे एमपीएससीच्या विद्यार्थ्यांचे आंदोलन असेल तर तिथल्या एका विद्यार्थ्याला खांद्यावर घेऊन त्यांनी नाचायला पाहिजे होते. रोहित पवार यांना नेता बनवण्यासाठीचा हा खटाटोप सुरू असल्याचा आरोप नवनाथ बन यांनी केला.

हडपसर विधानसभा मतदारसंघावर रोहित पवारांचा डोळा?

यावेळी भाजप प्रवक्ते नवनाथ बन यांनी एक मोठा आरोप केला. त्यानुसार, आमदार रोहित पवार यांचा कर्जत-जामखेड मतदारसंघातील जनाधार कमी झाला आहे. केवळ 1200 मतांनी ते निवडून आलेत. पुढच्या वेळी कदाचित ते निवडून येणार नाहीत. कर्जत-जामखेडमध्ये मध्यंतरी दुष्काळाची बैठक झाली, रोहित पवार तिकडे फिरकले नाहीत. कर्जत-जामखेड मतदारसंघ सोडून रोहित पवार हे पुण्यातील हडपसर मतदारसंघाची पुढील निवडणुकीसाठी चाचपणी करत आहेत. त्यांच्या लॉचिंगसाठीच एमपीएससी विद्यार्थ्यांचे आंदोलन करण्यात येत आहे. त्यासाठीच त्यांचा उदोउदो करण्यात येत आहे असा आरोप नवनाथ बन यांनी केला आहे.

रोहित पवार यांना असे पेड कॅम्पेन करायचे असतील तर त्यांनी जरूर करावेत पण महाराष्ट्रातील, मराठवाड्यातील, विदर्भातील गोरगरिब विद्यार्थ्यांच्या खांद्यावर बंदुक ठेवून राजकारण करू नका, असा टोला बन यांनी हाणला. मध्यंतरी रोहित पवारांनी 12 दिवस पंढरपूरमध्ये आंदोलन केले त्यावर आम्ही काही प्रतिक्रिया दिली नाही, असे बन म्हणाले.

एमपीएसी अध्यक्षांचा राजीनाम्याशिवाय माघार नाही

गेल्या दहा दिवसांपासून एस एम जोशी पुलावर महाराष्ट्र लोकसेवा आयोगाच्या अध्यक्षांच्या राजीनाम्यासाठी आंदोलन सुरू आहे. या आंदोलनात जालना आणि नांदेड वरून सहभागी होण्यासाठी दीडशे विद्यार्थी रेल्वेने आले आहेत. अध्यक्षांचा राजीनामा झाल्याशिवाय आंदोलनातून उठणार नाही अशी भूमिका त्यांनी घेतली आहे.