पुण्यापाठोपाठ मुंबईमध्येही ‘हिट अँड रन’, अल्पवयीन मुलाने एकाला उडवलं

पुण्यातील कोरेगाव पार्क येथील कल्याणीनगरमधील झालेला अपघाताने देशभर खळबळ उडाली होती. एका बिल्डरच्या मुलाने कोट्यवधींच्या पोर्ष गाडीने बाईकवर चाललेल्या तरूण-तरूणीला उडवत जागेवरच संपवलं होतं. पुण्यातील अपघात चर्चेत असताना आर्थिक राजधानी असलेल्या मुंबईमधुनही ‘हिट अंँड रन’ ची घटना समोर आली आहे. अल्पवयीन मुलाने एकाला उडवलं असून इरफान शेख नावाच्या 32 वर्षीय इसमाचा मृत्यू झाला आहे. पोलिसांनी मुलाच्या वडिलांना जे जे मार्ग येथून अटक केली आहे. अल्पवयीन मुलाची डोंगरीच्या बाल सुधारकारागृहात रवानगी करण्यात आलीये. पुण्यातील घटना ताजी असताना मुंबईतून ही बातमी समोर आली आहे.

पोलीस आता अशा प्रकरणाध्ये अल्पवयीन मुलांच्या वडिलांना ताब्यात घेत आहेत. पुण्यात झालेल्या अपघातामध्येही पोलिसांनी विशाल अग्रवाल याला अटक केलीये. वेदांत अग्रवाल याने पुण्यात रविवारी रात्री आपल्या पोर्ष या गाडीने तरूण-तरूणीला धडक दिली होती. यामध्ये दोघांचा जागीच मृत्यू झाला होता.  सुरूवातीला हे प्रकरण दाबलं गेल्याचे आरोप झाले, मात्र सोशल मीडियावर अपघाताचा व्हिडीओ व्हायरल  झाल्यावर हे प्रकरण तापलं.

या प्रकरणाबाबत राज्याचे उपमुख्यमंत्री देवेंद्र फडणवीस यांनी पत्रकार परिषद घेत माहिती दिली होती. कारण विरोधकांनी पुण्याचे पोलीस आयुक्त अमितेश कुमार यांच्यावरही या प्रकरणावरून टीका केलेली. मात्र फडणवीसांनी या प्रकरणातील आरोपींना शिक्षा होणार असल्याचं सांगितलं. आता पोलिसांनी विशाल अग्रवाल, सुरेंद्र अग्रवाल यांची चौकशी केली. तर बार मालकांनाही या प्रकरणामध्ये अटक केली गेली आहे.

दरम्यान,  आरोपी वेदांत अग्रवाल याला 14 दिवस बालसुधार कारागृहात ठेवण्यात आलं आहे. पोलीस आरोपींसह इतरांची चौकशी करत आहे. अपघातावेळी गाडीत असलेल्या ड्रायव्हरलाही पोलिसांनी अटक केली आहे. पोलिसांच्या तपासानंतर कोणाला शिक्षा होते याकडे अवघ्या राज्यासह देशाचं लक्ष लागलं आहे.