Mumbai DCC Bank Election: पाडव्याचा मुहूर्त, शिंदेंनी डाव टाकला; भाजपचं वर्चस्व मोडीत काढण्यासाठी रणनिती; पडद्यामागे काय घडतयं?

Mumbai DCC Bank Election:  एकत्र सत्तेत असूनही एकमेकांविरोधात आरोप- प्रत्यारोपाची राळ उडवणारी भाजप-शिवसेना आता निवडणुकीतही आमने-सामने येण्याची शक्यता आहे. मुंबई जिल्हा बँक निवडणुकीच्या निमित्ताने दोन्ही पक्षांमध्ये सामना होणार आहे. भारतीय जनता पक्षाचे वर्चस्व असलेल्या मुंबई जिल्हा बँकेच्या निवडणुकीसाठी एकनाथ शिंदेंच्या शिवसेनेने  मोर्चेबांधणी सुरु केली आहे. पडद्यामागे नेमकं काय घडतंय? जाणूुन घ्या सविस्तर…

मुंबई जिल्हा बँक निवडणुकीसाठी शिंदेंची मोर्चेबांधणी! 

याबाबत सविस्तर माहिती अशी की, मुंबई जिल्हा बँक निवडणुकीसाठी एकनाथ शिंदेंच्या शिवसेनेने स्वतंत्र लढवण्यासाठी चाचपणी सुरु केली आहे. याचसंदर्भात आज पाडव्याच्या मुहूर्तावर शिवसेना नेत्यांची बैठक पार पडली. बाळासाहेब भवन येथे झालेल्या बैठकीमध्ये उपसभापती सचिन आहिर, उपमहापौर संजय घाडी, मंगेश सातमकर आदी नेत्यांसह मुंबईमधील विभागप्रमुख तसेच शाखाप्रमुखही उपस्थित होते.

एकीकडे ही बैठक सुरु असतानाच मोठी घडामोड घडली. शिंदेंच्या नेत्यांची बैठक सुरु असतानाच संजय घाडींच्या पत्नी संजना घाडींनी सहकार पॅनलचे सिद्धार्थ कांबळें यांची भेट घेतली.यावेळी भारतीय जनता पक्षाचे नेते प्रविण दरेकर, शिवाजीराव नलावडे, नंदकुमार काटकर आदी नेते उपस्थित होते. या मोठ्या घडामोडींमुळे आणि एकनाथ शिंदे यांच्या शिवसेनेने ताकद लावल्याने या निवडणुकीत चांगलीच रंगत येण्याची शक्यता आहे.

दरम्यान, भारतीय जनता पक्षाचे नेते प्रवीण दरेकर आणि त्यांच्या समर्थकांचे मुंबई जिल्हा बँकेवर वर्चस्व आहे. सध्या या बँकेच्या संचालक मंडळात 20 सदस्य आहेत. आमदार प्रसाद लाड, तेजस्विनी घोसाळकर यांच्यासारख्या भाजप नेत्यांचा यामध्ये समावेश आहे. तसेच ठाकरेंच्या शिवसेनेचे आमदार सुनील राऊत यांचाही संचालक मंडळात समावेश आहे. अशातच आता एकनाथ शिंदेंनीही ताकद लावल्याने या निवडणुकीत रंगत निर्माण झाली आहे.