मुंबईत नोकरीसाठी फक्त गुजराती-मारवाडी उमेदवारांना प्राधान्य! वादग्रस्त जाहिरात व्हायरल

मुंबई ही स्वप्नांची नगरी म्हणून ओळखली जाते. मुंबईत अनेक रोजगाराच्या संधी उपलब्ध असतात. मुंबईतील नोकऱ्यांमध्ये स्थानिक मराठी उमेदवारांना पहिले स्थान मिळावे असा आग्रह स्थानिकांचा असतो. मात्र, सध्या सोशल मीडियावर व्हायरल झालेल्या एका जाहिरातीने सर्वांचे लक्ष वेधले आहे. या जाहिरातीमध्ये मुंबईतील नोकऱ्यांमध्ये स्थानिक मराठी उमेदवारांना डावलून केवळ गुजराती आणि मारवाडी समाजातील लोकांना प्राधान्य देण्याची स्पष्ट सूचना देण्यात आली आहे. या जाहिरातीमुळे मोठा वाद निर्माण झाला असून, मराठी तरुणांमध्ये संताप व्यक्त होत आहे.

नेमकं प्रकरण काय?

अहमदाबाद येथील एका भरती एजन्सीने नोकरी डॉट कॉम (Naukri.com) आणि लिंक्डइन या प्लॅटफॉर्मवर ही जाहिरात प्रसिद्ध केली आहे. जाहिरातीत मुंबईतील एका पदासाठी “Only Gujarati and Marwari candidates preferred” असे स्पष्टपणे नमूद करण्यात आले आहे. यामुळे स्थानिक मराठी उमेदवारांना जाणीवपूर्वक दुय्यम स्थान दिल्याचा आरोप करण्यात येत आहे.

मराठी एकीकरण समितीचा संताप

मराठी एकीकरण समितीचे गोवर्धन देशमुख यांनी या प्रकरणावर प्रतिक्रिया दिली आहे. नोकरी डॉट कॉम आणि लिंक्डइन या नोकरी शोधक संकेत स्थळावरती एक जाहिरात पाहिली. खरंतर ही जाहिरात आहे एजीएम आणि अकाऊंट, फायनान्सशी संबंधीत. त्यांना एक सीए हवा आहे. एक अहमदाबाद एजंसी आहे तिने ही जाहिरात टाकली आहे. 5 जून रोजी ही जाहिरात टाकण्यात आली आहे. नोकरी आहे मुंबईमध्ये आणि वेतन बघा तुम्ही 20 ते 25 लाख रुपये आहे. त्यांना हे मराठी माणसाला नाही द्यायचे. जाहिरातीवर काय लिहिले आहे “Only Gujarati and Marwari.” मराठी माणसाने कुठे जायचं? यावर शासन कडक भूमिका घेणार आहे की नाही? दरवेळी आम्ही कायदा हातात घेतला पाहिजे का? असा सवाल देशमुख यांनी केला आहे.

परप्रांतीयांना सतत संधीचा आरोप

मुंबई हे महाराष्ट्राची राजधानी असतानाही येथील बहुसंख्य नोकऱ्यांमध्ये बाहेरच्या राज्यातील लोकांना प्राधान्य दिले जाते, असा सातत्याने आरोप होत असतो. या पार्श्वभूमीवर ही जाहिरात समोर आल्याने मराठी तरुणांमध्ये असंतोष वाढला आहे.