मुंबईकरांचा प्रवास होणार गारेगार, लवकरच 238 लोकल मिळणार; मुख्यमंत्र्यांनी दिली गुड न्यूज

मुख्यमंत्री देवेंद्र फडणवीस यांनी मुंबईकारांना मोठी गुड न्यूज दिली आहे. मुंबईतील सर्व लोकल लवकरच मेट्रो सारख्या एसी होणार आहेत. या ट्रेन बनविण्याचं काम सुरू आहे. 2029पर्यंत मुंबईच्या सर्व लोकल एसी होणार आहेत. मुंबईला एकूण 238 लोकल मिळणार आहेत. विशेष म्हणजे सेकंड क्लासची भाडेवाढही केली जाणार नाही, असं मुख्यमंत्री देवेंद्र फडणवीस यांनी सांगितलं. फडणवीस यांनी मीडियाशी संवाद साधताना मेट्रो बाबतची मोठी माहिती दिली.

मुंबईच्या लोकल ट्रेनला आधुनिक बनवू, असा निर्णय घेण्यात आला होता. मेट्रो सारख्या लोकल मिळाव्यात अशी चर्चा झाली होती. पण त्यात विलंब होत होता. ज्या गतीने काम सुरू होतं. त्या गतीने 2030च्या पूर्वी ट्रेन मिळाल्या नसत्या. त्यामुळे मध्यंतरी केंद्रीय रेल्वे मंत्र्याशी बैठक झाली, त्यात लोकलबाबतची चर्चा केली. काल रेल्वे मंत्री अश्विनी वैष्णव यांनी याबाबत निर्णय घेतला. केंद्राची तीन कोच फॅक्ट्री आहेत. तिथे वेगाने ट्रेन बनवण्याचं काम सुरू आहे. वंदे भारत ट्रेन बनत असलेल्या कारखान्यात ट्रेन तयार होत आहे, अशी माहिती मुख्यमंत्री देवेंद्र फडणवीस यांनी दिली.

भाडेवाढ होणार नाही

2027 मध्ये पहिली मालिका ट्रेनची यावी. त्यानंतर 2029 पर्यंत मुंबईच्या सर्व लोकल मेट्रो सारख्या आधुनिक, सुंदर आणि एसी व्हाव्यात. एसी झाल्या तरी सेकंड क्लासचं भाडं वाढणार नाही. मुंबईकरांना दिलासा मिळणार आहे. देशातील आधुनिक पद्धती तयार होत आहे, असं सांगत आधुनिक ट्रेन देत असल्याबद्दल फडणवीस यांनी पंतप्रधान नरेंद्र मोदी आणि रेल्वे मंत्री अश्विनी वैष्णव यांचे आभार मानले.

पुढच्या वर्षीपासूनच लोकल येणार

मुख्यमंत्र्यांच्या मागणीनुसार 238 एसी लोकल केंद्राने मंजूर केल्या आहेत. या लोकलसाठी 2030 पर्यंत करावी प्रतिक्षा करावी लागणार होती. आता मात्र 2027 पासून एसी लोकल सेवेत येण्यास सुरुवात होणार आहे. म्हणजे पुढच्या वर्षीच मुंबईकरांना एसी लोकलचा लाभ मिळणार असल्याचं मुख्यमंत्र्यांनी सांगितलं. तर 2029 पर्यंत सर्वच एसी लोकल ताफ्यात येणार असल्याचंही त्यांनी स्पष्ट केलं.

विरोधक पळपुटे

विरोधकांच्या गदारोळातच लोकसभेचं कामकाज तहकूब करण्यात आलं आहे. त्यावरही देवेंद्र फडणवीस यांनी प्रतिक्रिया व्यक्त केली आहे. संविधानात लोकशाहीचा मोठा फोरम संविधान आहे. पण विरोधक चर्चा करायला घाबरत आहेत. विरोधी पक्षात संसद फेस करण्याची हिंमत नाही. हे पळपुटे आहेत. चर्चेची जागा संसद आहे. चौक नाही. संविधानावर विश्वास असेल तर हिंमत दाखवा आणि संसदेत चर्चा करा. पहिल्यांदा बहाणा केला. अमित शाह येत नाही. अमित शाहांनी पत्र दिलं. त्यानंतर संसदेतून विरोधक तोंड लपवून पळाले, असं घणाघाती हल्लाही त्यांनी चढवला.