हो नाही म्हणता म्हणता अखेर ठरलं; नवाब मलिक आज अर्ज दाखल करणार; कोणत्या पक्षाने दिला AB फॉर्म?

विधानसभा निवडणुकीसाठी उमेदवारी अर्ज दाखल करण्याचा आज शेवटचा दिवस आहे. या शेवटच्या दिवशी अखेर मुंबईतील शिवाजीनगर- मानखुर्द या विधानसभा मतदारसंघासाठी महायुतीच्या उमेदवारावर शिक्कामोर्तब झालं आहे. शिवाजीनगर- मानखुर्द या विधानसभा मतदारसंघातून राष्ट्रवादीचे नेते नवाब मलिक हे उमेदवारी अर्ज दाखल करणार आहेत. राष्ट्रवादी अजित पवार गटाकडून त्यांना एबी फॉर्म देण्यात आल्याची माहिती आहे. त्यामुळे थोड्याच वेळात नवाब मलिक हे त्यांचा उमेदवारी अर्ज दाखल करणार आहेत. बऱ्याच दिवसांनपासून सुरु असलेला नवाब मलिक यांच्या उमेदवारीबाबतचा खल आता थांबला आहे.

मलिकांच्या उमेदवारीला विरोध

नबाव मलिक यांच्यावर मनी लॉन्ड्रिंगचे आरोप आहेत. या आरोपांमुळे शिवसेना आणि भाजपकडून मलिकांच्या उमेदवारीला विरोध होता. त्यामुळे आज अर्ज भरण्याच्या शेवटच्या दिवसापर्यंत मलिकांच्या उमदेवारीबाबत निश्चितता नव्हती. मात्र आता अजित पवारांनी मलिकांना अखेर उमेदवारी दिल्याचं कळतं आहे. मलिकांकडे एबी फॉर्मदेखील पोहोचला आहे.

शिवाजीनगर- मानखुर्दमध्ये मैत्रीपूर्ण लढत?

शिवसेना शिंदे गटाकडून सुरेश पाटील यांना उमेदवारी देण्यात आली आहे. असं असताना आता मलिक आज अर्ज भरणार आहेत. कालच माध्यमांशी बोलताना कोणत्याही परिस्थितीत आपण निवडणूक लढणार असल्याचं मलिकांनी जाहीर केलं आहे. परिस्थिती निर्माण झाली तर आपण अपक्ष लढण्यास देखील तयार असल्याचं मलिकांनी म्हटलं होतं. त्यानंतर आता अखेर अजित पवारांकडून मलिकांना एबी फॉर्म देण्यात आला आहे. त्यामुळे शिंदे गट आणि नवाब मलिकांमध्ये मैत्रीपूर्ण लढत होणार? की कुणी उमेदवारी अर्ज मागे घेणार? हे पाहणं महत्वाचं असणार आहे.

नवाब मलिक यांच्या उमेदवारीवरून महायुतीत मतभेद होते. नवाब मलिक यांच्यावर मनी लॉन्ड्रिंगचे आरोप होते. भाजपच्या नेत्यांनी अनेकदा नवाब मलिक यांच्यावर टीका केली होती. त्यांच्यावर आरोप केले होते. अजित पवार भाजपसोबत गेले. त्यानंतर नवाब मलिक यांना जेव्हा जामिन मिळाला. तेव्हा ते अजित पवार गटासोबत गेले. तेव्हापासूनच मलिकांनी महायुतीत येण्याचा शिंदे गट आणि विशेषत: भाजपचा विरोध होता. त्याबाबत देवेंद्र फडणवीस यांनी अजित पवारांना पत्रदेखील लिहिलं होतं. मलिकांच्या विधानसभेच्या उमेदवारीलाही भाजपकडून कडाडून विरोध होता.