बदलापुरात केमिकल कंपनीत स्फोट, एकाचा मृत्यू, दोघे जखमी

ठाणे : बदलापूर एमआयडीसीतील के. जे. रेमेडीज या केमिकल कंपनीत ड्रायरचा स्फोट होऊन एका कामगाराचा मृत्यू तर दोन कामगार गंभीररित्या जखमी झाले आहेत. या स्फोटानंतर आजूबाजूचा परिसर अक्षरक्ष: हादरला. स्फोटामुळे कंपनीला भीषण आग लागली (Fire in Badlapur chemical company). आगीमुळे कंपनीतील बराच सामान जळून खाक झाला.

के. जे. रेमेडीज या केमिकल कंपनीत आज सकाळी (22 जानेवारी) नऊ वाजता ड्रायरचा स्फोट झाला. या स्फोटानंतर परिसरात मोठा आवाज आला. दरम्यान, या दुर्घटनेबाबत माहिती मिळताच अग्निशमन दलाच्या गाड्या घटनास्थळी दाखल झाल्या. अग्निशमन दलाच्या जवानांनी केलेल्या अथक प्रयत्नांमुळे त्यांना आगीवर नियंत्रण मिळवण्यात यश आले (Fire in Badlapur chemical company). जवानांनी कंपनीत अडकलेल्यांना बाहेर काढले. या स्फोटात एका कामगाराचा मृत्यू झाला तर दोन कामगार गंभीररित्या जखमी झाले. दोघांना जवळील रुग्णालयात दाखल करण्यात आल्याची माहिती मिळत आहे. या दुर्घटनेमुळे परिसरात हळहळ व्यक्त केली जात आहे.

काही दिवसांपूर्वी पालघरच्या तारापूर औद्योगिक क्षेत्रातील ए. एन. के. फार्मा कंपनीतही असाच स्फोट झाला होता. या स्फोटात 7 जणांचा मृत्यू तर 7 जण गंभीर जखमी झाले होते. स्फोट हा इतका भीषण होता की याचा आवाज आजूबाजूच्या परिसरात दूरपर्यंत ऐकू आला. सुरुवातीला या परिसरात भूकंप झाल्याचा भास झाला. मात्र, नंतर एका कंपनीत स्फोट झाल्याचं स्पष्ट झालं. या स्फोटानंतर परिसरातील वीज पुरवठा बंद करण्यात आला होता.