Sanjay Raut: रिक्षावाल्यांना मारतो, तसं नार्वेकरांना मारायचं का? विधानसभा अध्यक्षांच्या मराठीवरून संजय राऊतांचा खरमरीत टोला

हा महाराष्ट्रासाठी अत्यंत गंभीर विषय आहे. महाराष्ट्र विधानसभेच्या अध्यक्ष पदावर बसलेली व्यक्तीला मराठी बोलता येत नाही. मराठी बोलता येत नाही. मराठी वाचता येत नाही. मराठीत विचार करता येत नाही. हे नार्वेकर आहेत, युरोपमध्ये नॉर्वे या नावाचा देश आहे, हे नार्वेकर नाही तर नॉर्वेकर आहेत, असा चिमटा राऊतांनी काढला. नार्वेकर हे परकीय नागरिक तर नाही ना, याचा शोध घ्यावा लागेल. या महाराष्ट्रात मराठी भाषा अनिवार्य आहे. रिक्षावाल्यांना सुद्धा मराठी यायला हवे असा आपण आग्रह धरतो, कायदा करतो. राज्यात केवळ मराठीची सक्ती आहे, असे राज्याचे मुख्यमंत्री सांगतात. पण त्यांनी नेमलेल्या विधानसभा अध्यक्षांना मराठी येत नाही. ते मराठीचे धिंडवडे काढतात. पद्मविभूषण, स्वरसम्राज्ञी आशा भोसले यांचा शोक प्रस्ताव त्यांना वाचता येत नाही, मांडता येत नाही. राज ठाकरे यांनी म्हटलं आहे की ते भेळचा कागद वाचत होते का? हे बरोबर आहे.

ज्या विधानसभा अध्यक्षांना मराठी लिहिता, वाचता, बोलता येत नाही, मराठीत विचार करता येत नाही. त्यांच्या हृदयाची धडकनं मराठी नाहीत, ठोके मराठी नाहीत. असा माणूस तिथं बसवाला गेला. मराठीचा अपमान केला म्हणून ताबडतोब त्यांना या पदावरून दूर केले पाहिजे, अशी मागणी संजय राऊत यांनी केली.

त्यांना मराठी वाचता येत नसल्याने त्यांनी इंग्रजीत ती लिपी लिहून आणली. अशा प्रकारे लिहून ते तो शोक प्रस्ताव वाचण्याचा प्रयत्न करत होते. कारण त्यांना मराठी वाचता येत नाही असा माझा अनुभव आहे. अशा व्यक्तीला तुम्ही विधानसभेच्या अध्यक्ष पदी बसवता. मुख्यमंत्री छातीठोकपणे सांगतात की राज्यात सक्ती फक्त मराठीचीच. रिक्षावाल्यांना आपण मारतो मराठी येत नाही म्हणून, मग नार्वेकरांना मारायचं का? मराठी पाट्या करून म्हणून आपण सक्ती करतो. मग मराठी येत नसताना यांना त्या पदावर बसवले कोणी असा सवाल राऊतांनी केला.