2029 आधीच पंतप्रधान, गृहमंत्र्यांचा बाजार उठेल; संजय राऊत यांचा घणाघात

ठाकरे गटाचे नेते संजय राऊत यांनी पुन्हा एकदा पंतप्रधान नरेंद्र मोदी आणि केंद्रीय गृहमंत्री अमित शाह यांच्यावर जोरदार टीका केली आहे. अमित शाह यांच्या पुणे दौऱ्यात गोंधळ घातला तर जशास तसे उत्तर देऊ, असा इशारा भाजपने दिला आहे. भाजपच्या या इशाऱ्याच्या राऊत यांनी चिंधड्याच उडवल्या. तुम्हा काय हिंसेच्या गप्पा करता? तुमच्या लाठ्याकाठ्या खाऊन मुलं क्रांती करायला तयार झाली आहेत. तुम्ही आड येऊ नका. 2029च्या आधीच तुमचा बाजार उठलेला असेल. पंतप्रधान आणि गृहमंत्र्यांचा बाजार उठलेला असेल. यांच्या गृहखात्याचा लिलाव झालेला असेल, असा हल्लाच संजय राऊत यांनी चढवला.

संजय राऊत मीडियाशी संवाद साधत होते. काँग्रेस आणि इतरांनी आंदोलन करायचे ठरवलं हा त्यांचा अधिकार आहे. भाजपमध्ये हिंसा करण्याचा दम आहे का? रात्री 12 वाजता तुमचे पंतप्रधान व्हिडिओ टाकतात. दिवसा व्हिडिओ टाकायला घाबरतात. तुम्ही आम्हाला हिंसेच्या गप्पा मारता. त्या मुलांनी तुम्हाला नमवलं. तुम्हाला गुडघ्यावर आणलं, अशी टीका संजय राऊत यांनी केली.

लाज वाटली पाहिजे

यावेळी राऊत यांनी टिळक कुटुंबावरही टीका केली. लोकमान्य टिळकांच्या नावाने पुरस्कार दिला जातो. काय झालं काय टिळकांच्या कुटुंबाला? शिंदेंच्या गटात टिळकांचं कुटुंब गेलं. लाज वाटली पाहिजे. स्वाभिमानाचा लढा ज्यांच्या पूर्वजांनी लढला. मंडालेच्या तुरुंगात गेले. डोंगरीच्या तुरुंगात गेले. जालियनवाला बाग हत्याकांडाचा कडक शब्दात धिक्कार केला त्या टिळकांच्या नावाचा पुरस्कार ज्यांना दिला जातो, ज्यांच्या हस्ते दिला जातो. त्यांनी जंतरमंतर कांड केलं. जालियनवालानंतरचं हे कांड आहे, असा घणाघाती हल्लाही त्यांनी चढवला.

तुम्ही तर गुंड

गृहमंत्री येणार म्हणून पुण्यात आर्मी आणल्याचं कळलंय. महाराष्ट्राचा पोलीस फोर्स आणला. तुम्ही कशाला घाबरता? तुम्ही मूळचे गुंड आहात. तुम्ही एक तर गुंडासारखे वागा किंवा गृहमंत्र्यासारखे वागा. आम्हाला लोक गुंड म्हणतात. आम्ही गुंडासारखे वागतो, असंही ते म्हणाले. संजय राऊत यांनी यावेळी पंतप्रधान नरेंद्र मोदी यांच्या व्हिडिओवरूनही त्यांच्यावर टीका केली.