शरद पवारांच्या जुन्या सहकाऱ्याचे निधन, सुप्रिया सुळेंची भावनिक पोस्ट
शरद काळे सरांचे निधन हा आम्हा सर्वांची वैयक्तिक हानी आहे,जी कधीही भरुन येणार नाही.त्यांची उणीव आम्हा सर्वांना कायम जाणवत राहिल. या कठिण प्रसंगी आम्ही सर्वजण काळे कुटुंबियांच्या सोबत आहोत.
मुंबई : मुंबई महापालिकेचे माजी आयुक्त आणि यशवंतराव चव्हाण सेंटरचे ( Yashwantrao Chavan Centre ) विश्वस्त तथा आदरणीय पवार (sharad pawar) साहेबांचे सहकारी, आमचे मार्गदर्शक शरद काळे (Sharad kale) सर यांचे निधन झाले. ही अतिशय दुःखद बातमी आहे. शरद काळे सरांनी यशवंतराव चव्हाण सेंटरच्या माध्यमातून अतिशय भरीव असे काम केले. चव्हाण सेंटरच्या जडणघडणीत त्यांचे अतिशय महत्त्वाचे असे योगदान आहे. ते अतिशय कुशल असे प्रशासक होते. त्यांच्या प्रशासकीय कौशल्यामुळे त्यांनी अतिशय महत्त्वाच्या जबाबदाऱ्या अतिशय चोखपणे पार पाडल्या अशी भावनिक पोस्ट सुप्रिया सुळे यांच्या सोशल मीडियावर लिहिण्यात आली आहे.
त्यांचे बालपण आणि शालेय शिक्षण पुणे येथे झाले.त्यांनी १९६२ साली पुणे येथून गणित विषयात सुवर्ण पदक मिळविले होते. त्यानंतर ते १९६३ साली प्रशासकीय सेवेत दाखल झाले. यानंतर १९७२ साली हवाई विद्यापिठातून त्यांनी एमबीएची पदवी प्राप्त केली. राज्य व भारत सरकारच्या वेगवेगळ्या महत्त्वपूर्ण संस्थांच्या समित्यांवरही त्यांनी काम पाहिलेले होते. निवृत्तीनंतर त्यांनी १९९८ पासून यशवंतराव चव्हाण सेंटरच्या कामकाजाची धुरा यशस्वीपणे सांभाळली होती. त्यांच्या नेतृत्वाखाली चव्हाण सेंटरने अनेक महत्त्वपूर्ण उपक्रम पार पडले.
शरद काळे सरांचे निधन हा आम्हा सर्वांची वैयक्तिक हानी आहे,जी कधीही भरुन येणार नाही.त्यांची उणीव आम्हा सर्वांना कायम जाणवत राहिल. या कठिण प्रसंगी आम्ही सर्वजण काळे कुटुंबियांच्या सोबत आहोत. सरांच्या पार्थिवावर रविवारी अंतीम संस्कार करण्यात येतील. त्यांना भावपूर्ण श्रद्धांजली अशी पोस्ट लिहिली आहे.
यशवंतराव चव्हाण प्रतिष्ठानला त्यांनी अनेक चांगले उपक्रम राबविले आहेत. त्याचा उपक्रमाचा अनेकांना फायदा झाला आहे.