Shivsena Operation Tiger:डिनर डिप्लोमसीतून शिंदे सेना करणार गेम? ठाकरे सेनेचे दोन खासदार उपस्थित, ऑपरेशन टायगर पुन्हा चर्चेत

Shivsena Operation Tiger: उपमुख्यमंत्री एकनाथ शिंदे यांनी सरत्या महिन्याच्या अखेरीस दिल्लीवारी केली. त्यानंतर खासदार ज्योती वाघमारे यांनी शरद पवार राष्ट्रवादीचे अथवा उद्धव सेनेचे काही खासदार संपर्कात असल्याची आणि ऑपरेशन टायगर अथवा ऑपरेशन तुतारी होण्याची शक्यता वर्तवली. त्यानंतर दिल्लीत सालाबादाप्रमाणे केंद्रीय मंत्री आणि एकनाथ शिंदे यांच्या शिवसेनेचे खासदार प्रतापराव जाधव यांनी स्नेहभोजनाचा कार्यक्रम आयोजित केला. त्याला ठाकरे सेनेचे दोन खासदार उपस्थित होते. गेल्यावर्षी सुद्धा हे खासदार उपस्थित होते. त्यावेळी त्यांच्या उपस्थितीबाबत मातोश्रीवरून नाराजी व्यक्त करण्यात आली होती. तरीही यावेळी हे खासदार उपस्थित असल्याने राजकीय विश्लेषकांच्या भुवया उंचावल्या आहेत. ऑपरेशन टायगरची चर्चा रंगली आहे.

दिल्लीत काय घडामोड?

राज्यात ऑपरेशन टायगरची मोठी चर्चा सुरू असतानाच दिल्लीत खासदार प्रतापराव जाधव यांनी कार्यक्रम आयोजित केला होता. या कार्यक्रमाला हिंगोलीचे खासदार नागेश पाटील-आष्टीकर आणि यवतमाळ-वाशिम जिल्ह्याचे खासदार संजय देशमुख हे उपस्थित होते. गेल्यावर्षी सु्द्धा आष्टीकर स्नेहभोजनाच्या कार्यक्रमाला उपस्थित होते. पक्ष वेगळे झाले तरी मित्र असल्याने त्यावेळी हजेरी लावण्यात आल्याचे सांगण्यात आले. तर यावेळी आष्टीकरांना ऑपरेशन टायगरच्या चर्चेत काहीच तथ्य नसल्याचे म्हटले आहे. जाधव यांच्या ॲनिव्हर्सरीचा कार्यक्रम असल्याने अवघ्या काही मिनिटांसाठी त्यांचे भेट घेतल्याचे त्यांनी स्पष्ट केले.

ऑपरेशन टायगरची सुरुवात?

तर या ताज्या घडामोडींमुळे ऑपरेशन टायगरची सुरुवात झाल्याचा दावा करण्यात येत आहे. शिंदे यांच्या दिल्लीवारीनंतर उद्धव ठाकरे यांनी मातोश्रीवर खासदारांची बैठक बोलावली होती. त्यावेळी त्यांनी खासदारांवर विश्वास असल्याचे म्हटले होते. तर राज्यसभेची जागा राष्ट्रवादी काँग्रेसला सोडल्याने प्रियंका चतुर्वेदी यांनी नाराजी व्यक्त केल्याचे म्हटले जात होते. या बैठकीत मोठी खडाजंगी झाल्याचेही बोलले जात आहे. तर या बैठकीला कोण खासदार गैरहजर होता आणि तो का गैरहजर होता यावरून चर्चांना उधाण आले आहे. त्यातच दिल्लीतील डिनर डिप्लोपसी शिंदे सेनेच्या पथ्यावर पडते का? याकडेही सर्वांचे लक्ष लागले आहे. येत्या एक दोन महिन्यात वेट अँड वॉचची स्थिती असल्याचे म्हटले जात आहे. त्यातच आज संजय राऊत यांनी घेतलेल्या पत्रकार परिषदेत न्याय व्यवस्थेवर आसूड ओढले आहे. त्यांनी अंतिम सुनावणीसाठी तारीख पे तारीख मिळत असल्याने नाराजी व्यक्त केली आहे. या सर्व घाडमोडी येत्या दोन-तीन महिन्यात मोठ्या घडामोडींकडे लक्ष तर वेधत नाहीत ना, अशी चर्चा सुरू झाली आहे.