Nashik Rain Video : सप्तश्रृंगी गडावर ढगफुटी सदृश्य पाऊस, 6 भाविक जखमी

नाशिक : साडेतीन शक्तीपीठांपैकी अर्धे पीठ असलेल्या नाशिक जिल्ह्यातील (Nashik Rain Update) सप्तश्रृंगी गड येथे ढगफुटी सदृश्य पाऊस झाला. सप्तशृंगी गडावर गेल्या चार दिवसापासून संततधार पाऊस पडत आहे. मुसळधार पावसामुळे सप्तशृंगी मंदिरातील (Saptashrungi Fort Cloudy Rain) परतीच्या मार्गावरील संरक्षक भिंतीवरील दगड, माती वाहून आल्याने 4 भाविक आणि 2 लहान मुले खाली कोसळून गंभीर जखमी झाले आहेत. सप्तश्रृंगी देवस्थान संस्थानच्या दवाखान्यात नेऊन त्यांच्यावर उपचार करण्यात आले आहेत. यामध्ये दोन महिला, दोन पुरूष व दोन लहान मुलांचा समावेश आहे. परतीच्या मार्गावरील डोंगरावरून मोठ्या प्रमाणावर पाऊस येत असल्याने या पाण्याचा जोर वाढला. हे पाणी संरक्षण भितीवरून मोठ्या प्रमाणात वाहू लागले आणि ही भिंत कोसळून पायरीवर मोठ्या प्रमाणावर पाणी येऊ लागले. यावेळी भाविक हे पायरी उतरत असतांना पाण्याचा प्रवाह जास्त असल्याने पायरीवरुन वाहत गेले.

या घटनेत भाविकांच्या डोक्यावर व हात पायाला गंभीर इजा झाली. याबाबत देवी संस्थान चे कर्मचारी व स्थानिक व्यापारी यांना समजल्याबरोबर तातडीने भाविकांवर देवी संस्थानच्या दवाखान्यात नेऊन उपचार करण्यात आले. या घटनेत निंबाबाई नानु नाईक वय 45 रा. एंरडोल, अशिष तांरगे वय 23 रा.नागपुर, मनिष राऊत वय 32 रा.नागपूर, पल्लवी नाईक वय 3 रा. एरंडोल, शैला आव्हाड वय 7 यांना पुढील उपचारासाठी वणी येथे पाठविण्यात आले आहे. डॉ. धनश्री घोडके, निशा गायकवाड, कंपाउंडर शाताराम बेनके यांनी जखमींवर उपचार केले.

गोदावरी नदीलाही पूर आला आहे. त्यामुळे नदीकाठच्या गावांना सतर्कतेचा इशारा देण्यात आला आहे. काही गाड्यादेखील या पावसाच्या पाण्यात बुडाल्याचं पाहायला मिळतंय. नाशिकला येणारे पर्यटक गोदाघाट परिसरात आपली वाहनं पार्क करत असतात. त्यामुळे ही वाहनं पाण्याखाली जातात. सतर्कतेचा इशारा देऊनही अनेकजण गोदाघाट परिसरात आपल्या गाड्या पार्क करतात. त्यामुळे ही एक गाडी पाण्यात बुडाल्याचं पाहायला मिळतंय. तर काही झाडं पूर्ण पाण्याखाली गेली आहेत. काही झाडं अर्धी पाण्याखाली गेली आहेत.

या पावसाळ्यात पहिल्यांदाच गोदावरी नदीला पूर आला आहे. नाशिक जिल्ह्यात सुरू असलेल्या पावसामुळे धरणसाठ्यातही मोठ्या प्रमाणावर वाढ झाली आहे. पाणलोट क्षेत्रात दमदार पाऊस झाल्याने गंगापूर धरण 65 टक्के भरलं आहे. काल धरणातून 10 हजार क्युसेक वेगाने पाण्याचा विसर्ग करण्यात आला होता. परिणामी गोदावरीला यंदाच्या मोसमातील पहिला पूर आलाय. या पूरामुळे रामसेतू पूल पाण्याखाली गेला आहे. तर दुतोंडया मारुती माने पर्यंत बुडाला आहे.