सभापती असलेले अद्वय हिरे यांचं बाजार समितीचं सदस्यत्वच रद्द, राजकीय वर्तुळात खळबळ

मालेगाव कृषी उत्पन्न बाजार समितीचे सभापती तथा शिवसेना उद्धव बाळासाहेब ठाकरे पक्षाचे उपनेते अद्वय हिरे यांचे बाजार समितीतील सदस्यत्व रद्द करण्यात आले आहे. याबाबतचा निर्णय नुकताच जिल्हा उपनिबंधकांनी दिला आहे. यामुळे राजकीय वर्तुळात खळबळ उडाली असून विविध चर्चांना उधाण आलं आहे. बाजार समितीच्या कार्यकाळात जास्तीत जास्त दिवस अनुपस्थित असल्याने तक्रारदाराने केलेले तक्रारीनंतर जिल्हा उपनिबंधकांनी अद्वय हिरे यांच्याविरोधात निकाल दिला आहे. अद्वय हिरे बाजार समितीचे सभासदत्व रद्द होणे म्हणजे हा त्यांच्यासाठी मोठा धक्काच मानला जातोय.

उपनिबंधकांनी निकालात काय म्हटलं आहे?

कृषी उत्पन्न बाजार समितीचे सभापती अद्वय हिरे हे बाजार समितीच्या दिनांक २८/११/२०२३, २७/०१/२०२४, २६/०३/२०२४, २५/०५/२०२४, १८/०७/२०२४ आणि २६/०८/२०२४ अशा एकूण ७ मासिक सर्वसाधारण सभांना गैरहजर असल्याचे सिध्द होत आहे. सदर बाबत महाराष्ट्र कृषी उत्पन्न पणन (विकास व विनिमयन) अधिनियम, १९६३ मधील कलम २४ ची तरतूद प्रभावित होते, असं उपनिबंधकांनी निकालाच्या विश्लेषणात म्हटलं आहे.

“सदरचा गैरहजर असल्याचा कालावधी हा ३० दिवसांपेक्षा अधिक असून रजेच्या मंजूरी संदर्भात महाराष्ट्र कृषी उत्पत्र खरेदी विक्री (विकास व विनियमन) नियम, १९६७ चे नियम ९३ मधील तरतुदीनुसार विहीत कार्यपद्धतीचे अनुपालन झालेले नसल्याचे स्पष्ट होते. त्यामुळे अद्वय प्रशांत हिरे यांना महाराष्ट्र कृषी उत्पन्न खरेदी-विक्री (विकास व विनिमयन) अधिनियम, १९६३ मधील कलम २४ मधील तरतुदीनुसार मालेगांव कृषी उत्पन्न बाजार समितीचे समिती सदस्यत्व रद्द करणेबाबत खात्री झालेली असल्याने मी खालीलप्रमाणे आदेश पारीत करीत आहे”, असं उपनिबंधकांनी म्हटलं आहे.

नेमकं आदेशात काय म्हटलं आहे?

“महाराष्ट्र कृषी उत्पन्न पणन (विकास व विनिमयन) अधिनियम, १९६३ मधील कलम २४ मधील तरतुदीनुसार अद्वय प्रशांत हिरे यांचे कृषी उत्पन्न बाजार समिती, मालेगांव, जि. नाशिक या बाजार समितीचे सदस्यत्व रद्द करीत आहे. सदर आदेश आज दिनांक २३ डिसेंबर, २०२४ रोजी माझे सही आणि शिक्क्यानिशी पारीत केला आहे”, असं उपनिबंधकांनी आदेशात म्हटलं आहे.