विधानसभा निवडणूक, पक्षादेश अन् महायुती; अर्ज भरण्याआधी छगन भुजबळ काय म्हणाले?

राज्यात विधानसभा निवडणूक होत आहे. उमेदवारी अर्ज दाखल करायला आजपासून सुरुवात झाली आहे. आज बरेच राजकीय नेते आपला उमेदवारी अर्ज दाखल करणार आहेत. राष्ट्रवादी अजित पवार गटाचे नेते छगन भुजबळ हे देखील काहीच वेळाच अर्ज दाखल करणार आहेत. सकाळी 10 वाजता छगन भुजबळ हे उमेदवारी अर्ज दाखल करणार आहेत. उमेदवारी अर्ज भरण्याआधी छगन भुजबळ यांनी टीव्ही 9 मराठीशी संवाद साधला. तेव्हा त्यांनी विविध मुद्द्यांवर भाष्य केलं. केलेल्या कामांच्या जोरावर आपण ही निवडणूक जिंकू, असा विश्वास छगन भुजबळ यांनी व्यक्त केला आहे.’

उमेदवारीबाबत छगन भुजबळ काय म्हणाले?

महायुती आणि आमच्या राष्ट्रवादी अजित पवार गटाने आदेश दिल्याने पुन्हा निवडणुकीला उभं राहिलो. 1985 पासून मी विधानभवनात आहे. तुमच्या आशीर्वादाने आणखी पाच वर्ष बसणार आहे. नेहमीच्या निवडणुकीमध्ये थोडी स्पष्टता असायची कोण कुठे आहे. आता मात्र अजून मला कळत नाही कोण कुठे आहे ते. कोण कुठून उभा राहतोय कोण कुठून उभा राहतोय काहीच समजत नाही. लोकसभेच्या वेळी महायुतीला फार मोठा सेटबॅक बसला. मात्र नंतरच्या काळात महायुतीने फार मोठी आघाडी घेतली आहे. आता आमची खात्री झाली आहे की, महायुतीचं शासन पुन्हा एकदा येईल, असं छगन भुजबळ म्हणालेत.

नागरी समस्या अन् विकासकामांवर भाष्य

येवला मतदार संघातील रस्त्याचा पाण्याचा प्रश्न सुटलाय. विकासकामं झाली आहेत, बरंचस काम झालं आहे. महिलांना पाणी आणण्यासाठी बाहेर जावे लागणार नाही. आमच्या पक्षाने मला सांगितलं परत तुम्हालाच उभं राहायचं आहे. येवला लासलगाव मतदार संघातील नागरिकांचा देखील आग्रह आहे. त्यामुळे फॉर्म भरतोय, असं भुजबळ म्हणालेत.

कोणीही जरी आलं, तरी एक विरोधी पक्ष म्हणून आपण त्याचा सन्मान केला पाहिजे. मी कुणालाही शत्रूपक्ष समजत नाही, विरोधी पक्ष असतात. लोक ज्या कुणाला निवडून देतील त्याने लोकांची काम करायची. काम करण्याची लहानपणापासून सवय आहे. महिनाभर मला वाटत नाही, मला काही काम आहे. आता एकदा फॉर्म भरायला जाऊ आणि नंतर शेवटी भाषण करायला जाऊ, असंही भुजबळांनी म्हटलं आहे.