‘या महाराष्ट्रात, बघून घ्या महाराष्ट्र, महाराष्ट्रच तुम्हाला धडा शिकवणार’; उद्धव ठाकरे कडाडले

नाशिक | 23 जानेवारी 2024 : “पंतप्रधान नरेंद्र मोदींच्या वाऱ्या महाराष्ट्रात वाढल्या. दोन-चार दिवसांनी येत आहेत. आता पोहरादेवीला येत आहेत. या. बघून घ्या महाराष्ट्र. हा महाराष्ट्रच मोदींना धडा शिकवणार आहे”, अशा शब्दांत ठाकरे गटाचे प्रमुख उद्धव ठाकरे यांनी निशाणा साधला. उद्धव ठाकरेंची आज नाशिकमध्ये जाहीर सभा झाली. यावेळी ठाकरे बोलत होते. यावेळी त्यांनी भाजपवर सडकून टीका केली. “ही माझी वडिलोपार्जित संपत्ती आहे. मी वारसा घेऊन निघालो आहे. दंगल झाली की पळणारी ही अवलाद आहे. आमच्या नेत्यांवर ईडी आणि सीबीआयच्या धाडी टाकतात. घर माझ्या कार्यकर्त्याचं पाय ताणून बसतात हे नालायक लोकं. येऊ दे आमची सत्ता तुमच्या तंगड्या तुमच्या तंगड्या तुमच्या गळ्यात घालतो की नाही बघा”, अशा शब्दांत उद्धव ठाकरेंनी भाजपला इशारा दिला.

“एका बाजूला बंदोबस्तात राहणार. तुमच्या यंत्रणांचा पगार सामानान्यांच्या खिशातून जातात हे यंत्रणाने लक्षात ठेवावं. भेकड लेकाचे. बीजेपी म्हणजे भेकड जनता पार्टी. भेकडांची पार्टी आहे. स्वतमध्ये कर्तृत्व नाही. नेता तर देऊ शकत नाही. भाकड तर आहातच पण भेकडही आहात. आणि म्हणे हिंदुत्ववादी. हे कुठलं हिंदुत्ववादी?”, असा सवाल उद्धव ठाकरेंनी केला.

‘तिकडे गेले, अन् पाणबुडी प्रकल्प पळवला’

“मिंधे मिंधे जे बोलतातना यांनी बाळासाहेबांचे विचार सोडले. अरे मिंध्या तुझ्यासमोर महाराष्ट्र लुटला जातोय, तू शेपूट हलवत दिल्लीची चाकरी करत आहे. शेपूट हलवत बसतोय खुर्चीसाठी. हे बाळासाहेबांचे विचार? हे बाळासाहेबांचं हिंदुत्व? काही दिवसांपूर्वी पंतप्रधान कोकणात गेले. सिंधुदुर्गात. नौदल दिन होता. बरं वाटलं. बळेबळे शिवाजी महाराजांचा पुतळा बसवला. लोकांना वाटलं काही तरी कोकणासाठी देईल. पण कसलं काय. तिकडे गेले, अन् पाणबुडी प्रकल्प पळवला. क्रिकेटची मॅचही तिकडे गेली. नाही तर आपण जिंकलो असतो”, असा टोला उद्धव ठाकरेंनी लगावला.

“आता तर मधल्या काळात हेच लोकं बोंबलून ओरडत होती ना बॉयकॉट बॉलिवूड. काल बॉलिवूडच होते. शंकराचार्य नाही. हे यांचं थोतांड. आता फिल्मफेअरचा सोहळाही गुजरातला घेऊन जात आहे. महसूल मिळण्याची ठिकाणं गुजरातला नेत आहे. महाराष्ट्राने असं काय पाप केलंय की आमच्या मुळावर येत आहात. महाराष्ट्राच्या मुळावर का घाव घालत आहे का. मी एक तरी बाळासाहेबांचा विचार सोडला हे सांगा. तुम्ही सांगा. मी आहे ते पद सोडायला तयार आहे, जसं मुख्यमंत्रीपद सोडलं. जा त्या नार्वेकरला सांगा, लबाडाला सांगा, हिंमत असेल तर इकडे येऊन बोल मी तुझ्याबरोबर येतो. सांग शिवसेना कुणाची”, अशा खोचक शब्दांत उद्धव ठाकरेंनी मुख्यमंत्री एकनाथ शिंदेंवर टीका केली.