Navi Mumbai: नवी मुंबईच्या ‘इलेक्ट्रिक ताफ्यात’ आणखी 25 बसेस! लवकरच निविदा प्रक्रिया सुरु करणार
Navi Mumbai: नव्याने येणाऱ्या बसेस दोन टप्प्यात आणण्यात आल्या. 180 बसेसचे ऑपरेशन सुरळीत चालल्यानंतर एनएमएमटी प्रशासनाने आणखी 25 इलेक्ट्रिक बसेस घेण्याचा निर्णय घेतला आहे.
नवी मुंबई: नवी मुंबईला पर्यावरणपूरक ठरणारी इलेक्ट्रिक बस (Electric Bus)! नवी मुंबई महापालिकेला (New Mumbai) सुरुवातीला केंद्राच्या फम योजनेमधून 30 इलेक्ट्रिक बसेस मिळाल्या. या बसेससाठी शिवसेनेच्या माध्यमातून मोठा पाठपुरावा करण्यात आला होता. नव्याने आलेल्या या बसेसचे ऑपरेशन यशस्वी झाल्यानंतर महापालिका प्रशासनाने आणखी 150 इलेक्ट्रिक बसेसचा समावेश एनएमएमटीच्या ताफ्यात करण्याचा निर्णय घेतला. त्यानुसार निविदा प्रक्रियाही राबवण्यात आली. नव्याने येणाऱ्या बसेस दोन टप्प्यात आणण्यात आल्या. 180 बसेसचे ऑपरेशन सुरळीत चालल्यानंतर एनएमएमटी (NMT) प्रशासनाने आणखी 25 इलेक्ट्रिक बसेस घेण्याचा निर्णय घेतला आहे.
आणखी 25 इलेक्ट्रिक बसेस दाखल
एनएमएमटीच्या ताफ्यात सध्या 567 बसेस आहेत. या सर्व बसेस सुमारे 74 बस मार्गावर धावतात. प्रत्येक दिवशी एनएमएमटीच्या बसेसमधून सुमारे एक लाख 80 हजार प्रवासी प्रवास करतात. एकूण बसेसपैकी 293 बसेस डिझेलवर आणि 133 बसेस सीएनजीवर धावतात. 180 बसेस इलेक्ट्रिक आहेत. आता नवी मुंबईच्या परिवहन सेवेत आणखी 25 इलेक्ट्रिक बसेस दाखल होणार आहेत. अर्थातच यामुळे इंधनामध्ये मोठी बचत होणार आहे. इलेक्ट्रिक बसेसची संख्या मोठ्या प्रमाणात वाढल्यामुळे नवी मुंबई पालिकेची पर्यावरणपूरक धाव यशस्वी झाली आहे.
निविदा प्रक्रिया सुरू करणार
इलेक्ट्रिक बसेसमुळे फक्त पर्यावरणाचा फायदा होत नाही तर इंधनामध्येही मोठी बचत होत आहे. एनएमएमटीच्या सर्वच बस मार्गावरील इलेक्ट्रिक बसेसला प्रवाशांचा चांगला प्रतिसाद मिळत आहे. त्यामुळे प्रशासनाने आणखी 25 इलेक्ट्रिक बसेस आणण्याची तयारी सुरू केली आहे. नव्याने येणाऱ्या या बसेससाठी लवकरच निविदा प्रक्रिया सुरू करण्यात येणार आहे, अशी प्रतिक्रिया एनएमएमटीचे महाव्यवस्थापक योगेश कडुसकर यांनी व्यक्त केली आहे.
