मोठी बातमी! शिंदेंचा शरद पवारांना मोठा धक्का, बड्या नेत्यानं सोडली साथ, शिवसेनेत मोठा पक्षप्रवेश
राजकीय वर्तुळातून मोठी बातमी समोर येत आहे, राष्ट्रवादी शरद पवार गटाला आता आणखी एक मोठा धक्का बसला आहे. बड्या नेत्यानं एकनाथ शिंदे यांच्या उपस्थितीमध्ये शिवसेना शिंदे गटात प्रवेश केला आहे.
लोकसभा निवडणुकीमध्ये महाविकास आघाडीला राज्यात मोठं यश मिळालं होतं, मात्र हे यश महाविकास आघाडीला विधानसभा निवडणुकीमध्ये टिकवता आलं नाही. विधानसभा निवडणुकीत महाविकास आघाडीचा मोठा पराभव झाला. राज्यात महायुतीचं सरकार आलं. दरम्यान विधानसभा निवडणुकीनंतर महाविकास आघाडीला गळती लागल्याचं पहायला मिळत आहे. महाविकास आघाडीमधील अनेक दिग्गज नेत्यांनी महायुतीमध्ये प्रवेश केला आहे . ही पक्षाला लागलेली गळती रोखण्याचं मोठं आव्हान महाविकास आघाडीसमोर आहे. याचा सर्वाधिक फटका हा शिवसेना ठाकरे गटाला आणि राष्ट्रवादी शरद पवार गटला बसला आहे. दरम्यान आता राजकीय वर्तुळातून आणखी एक मोठी बातमी समोर आली आहे. राष्ट्रवादी शरद पवार गटाला आणखी एक मोठा धक्का बसला आहे.
एकीकडे काही दिवसांपूर्वी राज्यात ऑपरेशन टायगर आणि ऑपरेशन तुतारीची जोरदार चर्चा सुरू होती. याच चर्चेदरम्यान उपमुख्यमंत्री एकनाथ शिंदे यांनी राष्ट्रवादी शरद पवार गटाला मोठा धक्का दिला आहे. माजी राज्य मंत्री आणि राष्ट्रवादी शरद पवार गटाचे माजी आमदार विनायकराव जाधव पाटील यांनी शिवसेना शिंदे गटात प्रवेश केला आहे, त्यांनी आपल्या कार्यकर्त्यांसह उपमुख्यमंत्री एकनाथ शिंदे यांच्या उपस्थितीमध्ये शिवसेनेत प्रवेश केला. दरम्यान विनायकराव जाधव यांच्यासोबतच बीआरएसचे माजी आमदार शंकर अण्णा धोंडगे यांनी देखील शिवसेनेत प्रवेश केला आहे.
शिंदे काय म्हणाले?
शिवसेना चांदा ते बांधा पर्यंत पोहचली आहे. आपल्याला संघटना मजबूत करायची आहे. मी सामान्य कार्यकर्ता आहे. मुख्यमंत्री लाडकी बहीण योजना, लेक लाडकी, पीक विमा , ज्येष्ठांसाठी योजना अशा अनेक योजना आपण आणल्या. जे बोलतो ते करतो, त्यामुळे लोक विश्वास ठेवतात. कोनीही मायका लाल आला तरी लाडकी बहीण योजना बंद होणार नाही. शिवसेनेचा भगवा डौलाने फडकत राहील, घर तिथे शिवसैनिक अभियान राबवा, एसआयआर यादीकडे लक्ष द्या, शिवसेनेत जो काम करेल तोच पुढे जाईल, असं यावेळी एकनाथ शिंदे यांनी म्हटलं आहे. दरम्यान दुसरीकडे आतापासूनच शिवसेनेकडून आगामी निवडणुकांची तयारी सुरू करण्यात आल्याचं पहायला मिळत आहे.
