Osmanabad | 26 हजारांची लाच घेणाऱ्या दोघांना अटक, उस्मानाबादेत ACB ची कारवाई

उस्मानाबादः 26 हजार रुपयांची लाच घेणाऱ्या दोघांना उस्मानाबादेत (Osmanabad) बेड्या ठोकण्यात आल्या आहेत. उस्मानाबाद लाचलुचपत प्रतिबंधक विभागाच्या वतीने ही कारवाई (Police arrest) करण्यात आली. सोमवारी रात्री उशीरा पोलिसांनी ही कारवाई केली. अंगणवाडी केंद्रांना (Anganwadi) पुरवठा केलेल्या पोषण आहाराचे बिल काढण्यासाठी ही लाच घेण्यात आली होती, अशी माहिती लाचलुचपत प्रतिबंधक विभागाच्या वतीने देण्यात आली. अंगणवाडी केंद्रांना पुरवठा केलेल्या पोषण आहाराचे बिल काढण्यासाठी 26 हजार रुपयांची लाच घेताना बालविकास प्रकल्प अधिकारी व कनिष्ठ सहायक या दोघांना उस्मानाबाद लाच लुचपत विभागाने अटक केली आहे. यानिमित्ताने पोषण आहार योजनेतील कारभारावर प्रश्नचिन्ह निर्माण झाले आहे.

तीन वेळा मागितली लाच..

एका तक्रारदार महिलेकडून एकात्मिक बालविकास सेवा योजना प्रकल्प वाशी येथील बालविकास प्रकल्प अधिकारी सतिश उद्धवराव मुंढे व कनिष्ठ सहायक शहाबुद्दीन महमंद शेख यांनी 32 हजारांची लाचेची मागणी करून 26 हजार रुपये लाच घेतली. या प्रकरणात तब्बल 3 वेळेस लाच मागणी करण्यात आल्याने अखेर फिर्यादी महिलेने यांना चांगलाच धडा शिकविला. 30 मार्च, 22 व 25 एप्रिल रोजी लाचेची मागणी करण्यात आली. तक्रारदार यांनी एकात्मिक बालविकास सेवा योजना ग्रामीण प्रकल्प वाशी अंतर्गत वाशी येथील अंगणवाडी केंद्रांना पुरवठा केलेल्या पोषण आहाराचे बिल काढण्यासाठी तसेच यापूर्वी काढलेल्या बिलाचा मोबदला म्हणून मुंडे यांनी 24 हजार रुपयाची मागणी करून पहिला हफ्ता म्हणून 20 हजार घेतले तर शेख यांनी स्वतः साठी 8 हजार मागणी करून 6 हजार रुपये घेतले, असे फिर्यादीत म्हटले आहे.

सापळा रचून पकडले

औरंगाबाद लाचलुचपत विभागाचे पोलीस अधीक्षक डॉ राहुल खाडे, अपर पोलीस अधीक्षक विशाल खांबे, पोलीस उप अधीक्षक प्रशांत संपते यांच्या मार्गदर्शनाखाली पोलीस निरीक्षक तथा सापळा अधिकारी अशोक हुलगे यांच्या पथकाने ही कारवाई केली. सापळा पथकात पोअ शिधेश्र्वर तावसकर, विशाल डोके ,विष्णु बेळे ,अविनाश आचार्य, चालक दत्तात्रय करडे यांनी काम केले.