ओव्हरटेक करण्याचा प्रयत्न अंगलट आला, शिवशाही स्कूल बसला धडकली !

शिर्डी / मनोज गाडेकर : ओव्हरटेक करण्याच्या प्रयत्नात शिवशाही बस स्कूल बसला धडकल्याची धक्कादायक घटना अहमदनगर जिल्ह्यातील लोणी गावात घडली. या अपघातात चार विद्यार्थी किरकोळ जखमी झाले आहेत. जखमी विद्यार्थ्यांना उपचारासाठी लोणी येथील प्रवरा रुग्णालयात दाखल करण्यात आले आहे. लोणी बाभळेश्वर रोडवर छत्रपती चौकात आज दुपारी साडेबारा वाजण्याच्या सुमारास ही घटना घडली. सुदैवाने यात कोणतीही जीवितहानी झाली नाही. अपघाताचा तपास सुरु असून, तपासानंतर गुन्हा दाखल करण्यात येईल.

ओव्हरटेकच्या नादात स्कूल बसला धडकली शिवशाही

शिर्डीहून पुण्याकडे जाणाऱ्या शिवशाही बसने रस्ता ओलांडत असलेल्या लिटील फ्लॉवर स्कुलच्या बसला जोराची धडक दिली. शिवशाही बस दुसर्‍या गाडीला ओव्हरटेक करण्याच्या प्रयत्नात स्कूल बसवर जाऊन धडकली. अपघाताची माहिती मिळताच पोलीस घटनास्थळी पोहचले. पोलिसांनी अपघाताचा तपास सुरू केला आहे. दोषींविरोधात गुन्हा दाखल केला जाणार आहे.

बसचा ब्रेक फेल झाल्याने अपघात झाल्याचे चालकाचे म्हणणे

हा अपघात शिवशाही बसचा चालक खंदारे याच्याकडून झाला. चालक खंदारे याने अपघातचे कारण बसचे ब्रेक फेल झाल्याचे संगितले. मात्र ओव्हरटेक करण्याच्या नादात शिवशाही बसकडून अपघात झाल्याचे प्रत्यक्षदर्शी नागरिकांनी सांगितले. सदर अपघाताचा लोणी पोलीस तपास करत आहेत. तपासाअंती अपघाताचे कारण उघड होईल.