Ram Purnekar : प्रदीप पूर्णेकर हत्या प्रकरणात मुलगा राम पूर्णेकर आक्रमक; मुख्यमंत्र्यांकडे केली मोठी मागणी

प्रदीप पूर्णेकर यांच्या हत्येला महिना उलटून गेला असला, तरी या प्रकरणावरून ठाण्यातील वातावरण अद्याप तापलेलं आहे. वडिलांच्या मारेकऱ्यांना शोधून त्यांना कठोर शिक्षा द्या आणि आम्हाला न्याय मिळवून द्या, अशी मागणी पूर्णेकर कुटुंबीयांकडून सातत्याने केली जात आहे. काही दिवसांपूर्वी कुटुंबीयांनी पोलिस ठाण्याबाहेर आंदोलन करत न्यायासाठी आवाज उठवला होता. दरम्यान, काल शिवसेना (ठाकरे गट) नेते आदित्य ठाकरे आणि खासदार संजय राऊत यांनी ठाण्यात जाऊन पूर्णेकर कुटुंबीयांची भेट घेतली. यावेळी त्यांनी कुटुंबीयांचं सांत्वन केलं. दुसरीकडे, या हत्या प्रकरणात शिंदे गटाच्या नेत्या मीनाक्षी शिंदे आणि त्यांचे पती राजेंद्र शिंदे यांना अटक करण्याची मागणी ठाकरे गटाकडून केली जात आहे. पूर्णेकर कुटुंबीयही या मागणीवर ठाम आहे.

दरम्यान काल पोलिसांनी पूर्णेकर आंदोलकांना, समर्थकांना ताब्यात घेतलं होतं, त्यांना अमानुष मारहाण केली असा आरोप करण्यात आला, तसेच आणखीही काही गंभीर आरोप करण्यात आले. याच पार्श्वभूमीवर आज प्रदीप पूर्णेकर यांचे पुत्र राम पूर्णेकर यांनी पुन्हा कापूरबावडी पोलीस ठाण्यात जाऊन पोलिसांची भेट घेतली. यावेळी कुटुंबीयांनी आक्रमक भूमिका घेतली. त्यानंतर राम पूर्णेकर यांनी प्रसारमाध्यमांशी संवाद साधत पोलिसांसोबत झालेल्या चर्चेची माहिती दिली.

काय म्हणाले राम पूर्णेकर?

काल पोलिसांनी आंदोलनकर्त्यांना आणि समर्थकांना ताब्यात घेतलं होतं. यावेळी त्यांना अमानुष मारहाण करण्यात आल्याचा आरोपही करण्यात आला होता. यासंदर्भात राम पूर्णेकर यांना प्रश्न विचारण्यात आला. त्यावर उत्तर देताना त्यांनी पोलिसांसोबत झालेल्या चर्चेचा तपशील सांगितला. “आमचे जे वकील सोबत आले होते, त्यांनी एक पत्र दिलं आहे. ज्यांनी हे कृत्य केलं आहे, त्यांना डीसीपी साहेबच शिक्षा देतील. आपण या प्रकरणात कायदेशीर मार्गाने पुढे जाऊया. यामुळे आपण सर्व पोलिसांना बदनाम करू शकत नाही,” असं राम पूर्णेकर म्हणाले. तसेच, पोलिस योग्य ती कारवाई करतील, असा विश्वासही त्यांनी व्यक्त केला.

यावेळी त्यांनी पोलिसांकडे एक महत्त्वाची विनंती केली. “आमचे जे समर्थक आहेत, त्यांना अटक करू नका. या प्रकरणातील मुख्य कलप्रीट मीनाक्षी शिंदे आणि राजेंद्र शिंदे या दोघांना अटक करा,” अशी मागणी त्यांनी केली. यासंदर्भात डीसीपी साहेबांशी आपलं बोलणं झालं असून त्यांना संपूर्ण माहिती दिल्याचंही राम यांनी सांगितलं. या प्रकरणात कठोर भूमिका घेणार असल्याचं पोलिसांनी आश्वासन दिल्याची माहिती त्यांनी दिली.

मुख्यमंत्र्यांकडे नेमकी काय मागणी?

या प्रकरणावरून राम पूर्णेकर यांनी मुख्यमंत्री एकनाथ शिंदे यांच्याकडेही न्यायाची मागणी केली आहे. “मुख्यमंत्र्यांना मी एवढंच सांगेन की, साहेब, ठाण्यामध्ये जे सुरू आहे ते खूप चुकीचं आहे. या प्रकरणातील मुख्य आरोपींना तुम्ही अटक करा, बाकीच्यांना जाऊ द्या,” असं ते म्हणाले.

वडिलांच्या हत्येला महिना उलटूनही न्यायासाठी सुरू असलेला पूर्णेकर कुटुंबीयांचा संघर्ष अद्याप थांबलेला नाही. त्यामुळे आता या प्रकरणात पोलीस नेमकी काय कारवाई करतात, याकडे सर्वांचं लक्ष लागलं आहे.